“​បច្ចេកវិជ្ជា​ជប៉ុន មិនមែនជា​បច្ចេកវិជ្ជា ធ្លាក់​ពីលើ​មេឃ​មក​ទេ​” បើ​ប្រជាពលរដ្ឋ​មិន​គោរព​ច្បាប់​ចរាចរណ៍ គឺ​មិនអាច​ដោះស្រាយ​បញ្ហា​កា​រក​ស្ទះចរាចរណ៍​បានទេ​

44205

​ភ្នំពេញ​៖ លោកស្រី ផេង ផា​រី​ណែ​ត ប្រធាន​មជ្ឈមណ្ឌល​គ្រប់គ្រង​ចរាចរណ៍ ក្នុង​រាជធានី​ភ្នំពេញ បាន​អះអាងថា បើទោះបី​ជាមាន​ប្រព័ន្ធគ្រប់គ្រង​ចរាចរណ៍​វៃឆ្លាត យ៉ាងណាក៏ដោយ ក៏​មិនអាច​ដោះស្រាយ​បញ្ហា កា​រក​ស្ទះចរាចរណ៍​បានដែរ ប្រសិនបើ​ប្រជាពលរដ្ឋ​មិន​គោរព​ច្បាប់​ចរាចរណ៍ បើកបរ​តាម​កន្លង​កំណត់ ជាដើម​នោះ​។​

​លោកស្រី ផេង ផា​រី​ណែ​ត បាន​លើកឡើងថា​៖ “​ដូចដែល​លោក​ឯកអគ្គរដ្ឋទូត​ជប៉ុន គាត់​ធ្លាប់បាន​ធ្វើជា​វីដេអូ​មួយ​រួចមកហើយ ពាក់ព័ន្ធ​ជាមួយនឹង​ការតំឡើង​ប្រព័ន្ធ​ភ្លើង​សញ្ញា​ចរាចរណ៍​ហ្នឹង គាត់​និយាយថា ទោះបីជា​បច្ចេកវិជ្ជា​ហ្នឹង​វៃឆ្លាត​ប៉ុណ្ណា ទំនើប​ប៉ុណ្ណា ប្រសិនបើ​ប្រជាពលរដ្ឋ​អត់​គោរព​ច្បាប់​ចរាចរណ៍​ទេ ក៏​វា​មិនអាច​ដោះស្រាយ​នូវ​ប្រព័ន្ធ​ចរាចរណ៍​បានដែរ​”​។​

បន្ទប់គ្រប់គ្រងចរាចរណ៍ នៃមជ្ឍមណ្ឌលគ្រប់គ្រងចរាចរណ៍

“​ព្រោះ​បច្ចេកវិជ្ជា​ជប៉ុន មិនមែនជា​បច្ចេកវិជ្ជា​ធ្លាក់​ពីលើ​មេឃ​មក ដាក់​មក​ភ្លាម​គឺ​ត្រូវតែ​ដោះស្រាយ​ចរាចរណ៍​បាន​នោះទេ ដូច្នឹង​ភ្លើងស្តុប​គឺ​តំឡើង​ដើម្បី​ឲ្យ (​ប្រព័ន្ធ​ចរាចរណ៍​អាច​ដំណើរការ​ដោយ​) រលូន​ទៅបាន លុះត្រាតែ​មនុស្ស​គោរព​គន្លង​ចរាចរណ៍​, គោរព​គន្លង​បត់​ឆ្វេង បត់​ស្ដាំ​, ហើយ​បើ​គាត់​អត់​គោរព​ទេ ក៏​ប្រព័ន្ធ​ចរាចរណ៍​អត់​អាចជួយ​អី​បានដែរ ដូច្នឹង​វា​នៅតែ​ជា​បញ្ហា​ប្រឈម​ធំ​មួយ​” លោកស្រី ផេង ផា​រី​ណែ​ត បញ្ជាក់បន្ថែម​។​

​ដោយសារតែ​ស្ថានភាព​ចរាចរណ៍ និង​គ្រោះថ្នាក់​ចរាចរណ៍​នៅក្នុង​រាជធានី​ភ្នំពេញ កាន់តែ​អាក្រក់​ទៅៗ នាពេល​ប៉ុន្មាន​ឆ្នាំ​ចុង​ក្រោយនេះ បណ្ដាលមកពី​ចំនួន​យានយន្ត មានការ​កើនឡើង​យ៉ាង​លឿន ប្រមាណ​ជា ៣៧៥% ព្រោះតែ​សេដ្ឋកិច្ច​ប្រទេស​កម្ពុជា​មានការ​រីកចម្រើន​នោះ សាលា​រាជធានី​ភ្នំពេញ បាន​កំពុង​ព្យាយាម​ដោះស្រាយ​បញ្ហា​ទាំងនេះ ដោយបាន​ដាក់ចេញ​នូវ​វិធានការ​ជាច្រើន មានដូចជា ការតំឡើង​ភ្លើង​សញ្ញា​ចរាចរណ៍ កែលម្អ​ស្ថានភាព​ផ្លូវ​ប្រសព្វ សាងសង​ស្ពាន​អាកាស និង​ពង្រីក​ផ្លូវថ្នល់​។​ល​។​

​ដើម្បី​ចូលរួម​កែលម្អ​ជីវិត​រស់នៅ របស់​ប្រជាជន​កម្ពុជា​ឲ្យ​បានល្អ​ប្រសើរ តាមរយៈ​ការកាត់បន្ថយ​ការកកស្ទះ​ចរាចរណ៍ និង​ចូលរួម​លើកកម្ពស់​សេដ្ឋកិច្ច​ក្នុង​រាជធានី​ភ្នំពេញ រាជរដ្ឋាភិបាល​ជប៉ុន បានផ្ដល់​នូវ​ជំនួយឥតសំណង ប្រមាណ​ជា ១៦​លាន​ដុល្លារ​អាមេរិក ដើម្បី​តំឡើង​ភ្លើង​សញ្ញា​ចរាចរណ៍​ចំនួន ១១៥​ទីតាំង​នៃ​ផ្លូវ​ប្រសព្វ​, បង្កើត​មជ្ឍមណ្ឌល​គ្រប់គ្រង​ចរាចរណ៍​, បំពាក់​ឧបករណ៍​ចាប់​រូបភាព​ចំនួន ១៩៤, កាមេរ៉ា​សុវត្ថិភាព ២៦ និង​គូស​គំនូស​សញ្ញា​ចរាចរណ៍​នៅតាម​ដងផ្លូវ​។​

​ការ​រពឹង​ទុក​នៃ​គម្រោង​នេះ​គឺ អាច​កែលម្អ​រយៈពេល​ធ្វើ​ដំណើរ​នៅក្នុង​ទីក្រុង ១៤% ពី​ល្បឿន ១២.៥​គីឡូម៉ែត្រ​/​ម៉ោង ទៅ​ល្បឿន ១៤.២​គីឡូម៉ែត្រ​/​ម៉ោង​, កាត់​បន្ថយថ្លៃ​ធ្វើដំណើរ ២.៥​លាន​ដុល្លារ​អាមេរិក សម្រាប់​អ្នកប្រើប្រាស់​យានយន្ត តាម​មហាវិថី​ព្រះមុនីវង្ស​, កាត់បន្ថយ​កា​រប​ញ្ចូ​ន​ប៉ូលីស​ចរាចរណ៍ ទៅកាន់​ទីតាំង​ផ្លូវ​ប្រសព្វ​ចំនួន ២០% និង​កាត់បន្ថយ​គ្រោះថ្នាក់​ចរាចរណ៍​ជាដើម​។​

​គម្រោង​ដែលមាន​ទំហំ​ទឹកប្រាក់​ប្រមាណ​ជា ១៦​លាន​ដុល្លារ របស់​រដ្ឋាភិបាល​ជប៉ុន និង​ប្រជាជន​ជប៉ុន​នេះ ហាក់បីដូច​ស្ថិតនៅ​ឆ្ងាយ​ពី​ការរំពឹងទុក ដោយសារ​បញ្ហា​ប្រឈម​មួយចំនួន ជាពិសេស​គឺ​កត្តា​ធនធានមនុស្ស ដែលជា​អ្នកគ្រប់គ្រង​និង​បញ្ជា​ប្រព័ន្ធ និង​ការយល់ដឹង​របស់​ប្រជាពលរដ្ឋ អំពី​ការប្រើប្រាស់​ផ្លូវថ្នល់ និង​ការគោរព​ច្បាប់​ចរាចរណ៍​ជាដើម​៕​