ស្ពាន​ជ្រោយចង្វារ​ទី​១ អាច​ប្រើ​បាន​ប្រមាណ ៥០​ឆ្នាំ​ទៀត ប្រសិនបើ​ប្រជាពលរដ្ឋ​ទាំងអស់​ចេះ​ថែរក្សា​

43564

ភ្នំពេញ​៖ លោក ឈឹម ផល្លា ប្រធាន​យក​ដ្ឋា​ន​ផ្លូវថ្នល់ នៃ​ក្រសួង​សាធារណការ​និង​ដឹកជញ្ជូន បាន​ថ្លែង​ឲ្យ​ដឹងថា ស្ពាន​មិត្តភាព​កម្ពុជា​-​ជប៉ុន ឬ​ស្ពាន​ជ្រោយចង្វារ​ទី​១ ត្រូវបាន​វិស្វករ​ជំនាញ​ធំៗ​របស់​ប្រទេស​ជប៉ុន ធ្វើការ​វាយតម្លៃថា បន្ទាប់ពី​ធ្វើការ​ជុស​ជុល​រួច ស្ពាន​នេះ​អាច​ប្រើប្រាស់​បាន​ប្រមាណ​ជា ៥០​ឆ្នាំ​តទៅទៀត នៅក្នុង​លក្ខខណ្ឌ​ប្រើប្រាស់​ត្រឹមត្រូវ និង​មានការ​ចូលរួម​ថែទាំ​ទាំងអស់គ្នា​។​

ស្ពាន​មិត្តភាព​កម្ពុជា​-​ជប៉ុន

​លោក ឈឹម ផល្លា បាន​លើកឡើងថា​៖ “​សូម្បីតែ​សំរាម​ប​ន្ថិ​ច​ក៏​ពួក​ខ្ញុំ​រើស​ដែរ​… គឺថា​ស្រឡាញ់​ណាស់ ស្រឡាញ់​ជាង​គ្រួសារ​ទៀត​… បន្ទាប់ពី​យើង​ប្រើប្រាស់​ទៅ ទាល់តែ​យើង​ជួយ​ថែទាំ​ទាំងអស់គ្នា​… ការ​ឌី​ហ្សា​ញ​នេះ​គឺ​សម្រាប់​ប្រើប្រាស់ ៥០​ឆ្នាំ​ទៅមុខទៀត​”​។

លោក ឈឹម ផល្លា ប្រធាន​យក​ដ្ឋា​ន​ផ្លូវថ្នល់ នៃ​ក្រសួង​សាធារណការ​និង​ដឹកជញ្ជូន (កាន់ឧបករណ៍បំពងសម្លេង)

​លោក ឈឹម ផល្លា បាន​បន្តទៀតថា ស្ពាន​មិត្តភាព​កម្ពុជា​-​ជប៉ុន ឬ​ស្ពាន​ជ្រោយចង្វារ​ទី​១ នឹងដាក់​ឲ្យ​ដំណើរការ​ឡើងវិញ នៅ​ថ្ងៃទី​៣ ខែមេសា ឆ្នាំ​២០១៩ ក្រោម​អធិប​តិ​ភាព​សម្ដេច​តេ​ជោ ហ៊ុន សែន បន្ទាប់ពី​បាន​ផ្អាក​មិន​ឲ្យ​ប្រើប្រាស់ ដើម្បី​ធ្វើការ​ជួសជុល​នៅ​ថ្ងៃទី​១ ខែតុលា ឆ្នាំ​២០១៧​កន្លងមក​។ បន្ទាប់ពី​ការខិតខំ​ប្រឹងប្រែង​ធ្វើ​ទាំងថ្ងៃទាំងយប់ អស់​រយៈពេល​ប្រមាណ ២​ឆ្នាំ​រួចមក គម្រោង​ជួសជុល​ស្ដារឡើងវិញ ស្ពាន​មិត្តភាព​កម្ពុជា​-​ជប៉ុន ឬ​ស្ពាន​ជ្រោយចង្វារ​ទី​១ បានបញ្ចប់​មុន​កាលកំណត់​រយៈ ២​ខែ ដោយ​រលូន ពុំមាន​គ្រោះថ្នាក់​ដល់​អ្នកណា​ម្នា​ក់ឡើ​យ​។​

លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន (អាវពណ៌ខៀវចាស់ ខោ
ពណ៌ស)

​លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន នៅ​ព្រឹក​ថ្ងៃទី​៣១ ខែមីនា ឆ្នាំ​២០១៩​នេះ បាន​អំពាវនាវ​ទៅដល់​អ្នក​ដឹកជញ្ជូន ជួយ​ចូលរួម​ថែរក្សា​ស្ពាន​ដោយ​កុំ​ដឹក​លើស​ទម្ងន់ ហើយ​ក៏បាន​អំពាវនាវ​ទៅដល់​ប្រជាពលរដ្ឋ ឲ្យ​ចូលរួម​គោរព​ច្បាប់​ចរាចរណ៍ និង​បើកបរ​ដោយ​ការប្រុងប្រយ័ត្ន កុំ​មានការ​មាន​គ្រោះថ្នាក់​ដល់​អាយុជីវិត ក្នុងពេល​បើកបរ​ទៅលេង​កម្សាន្ត​នៅ​ស្រុកកំណើត ក្នុងពេល​បុណ្យចូលឆ្នាំថ្មី​ខាងមុខនេះ​។

​សូមបញ្ជាក់ថា ស្ពាន​មិត្តភាព​កម្ពុជា​-​ជប៉ុន មាន​ប្រវែង ៩៧១​ម៉ែត្រ ទទឹង ១៣​ម៉ែត្រ ស្ថិតនៅតាម​បណ្តោយ​ផ្លូវជាតិ​លេខ​៦A ក្នុងភូមិ​សាស្ត្រ​ទឹកដី​រាជធានី​ភ្នំពេញ ត្រូវបាន​សាងសង់ និង​សម្ភោ​ធ​ឱ្យប្រើ​ប្រាស់​ក្នុង​ឆ្នាំ​១៩៦៣ ក្រោម​ជំនួយឥតសំណង​របស់​ប្រទេស​ជប៉ុន​។

ស្ពាន​មិត្តភាព​កម្ពុជា​-​ជប៉ុន

ស្ពាន​នេះ​ត្រូវបាន​ខូចខាត​ដោយ​សង្គ្រាមស៊ីវិល​នៅ​កម្ពុជា និង​ត្រូវបាន​សាងសង់​ឡើងវិញ​នៅ​ឆ្នាំ​១៩៩២ ដោយ​ប្រទេស​ជប៉ុន ហើយ​ត្រូវបាន​ប្តូរ​ឈ្មោះ​ទៅជា​ស្ពាន​មិត្តភាព​កម្ពុជា​-​ជប៉ុន ដោយ​ព្រះមហា​វិ​រៈ​ក្សត្រ ព្រះ​បរម​រតន​កោដ្ឋ សម្ដេច​ព្រះបាទ ន​រោ​ត្ដម សីហនុ​។ ដោយសារ​ស្ពាន​នេះ​មាន​អាយុកាល​ដ៏​ចំណាស់ ហើយ​ស្របពេល​កំណើនសេដ្ឋកិច្ច និង​លំហូរ​ចរាចរណ៍​កើនឡើង​ជា​លំដាប់​នោះ ស្ពាន​នេះ​តម្រូវឱ្យមាន​ការជួសជុល​ឡើងវិញ​ជាបន្ទាន់ ដោយ​ចំណាយ​ថវិកា​អស់​ប្រមាណ ៣០​លាន​ដុល្លារ​អាមេរិក ក្រោម​ជំនួយឥតសំណង​របស់​រដ្ឋាភិបាល​ជប៉ុន​៕ ​

ស្ពាន​មិត្តភាព​កម្ពុជា​-​ជប៉ុន