លោក លឺ ឡាយស្រេង អាច​វិល​ត្រលប់មក​កម្ពុជា​វិញ “​គ្មាន​នរណា​ចាប់​នោះទេ​”

44873

ភ្នំពេញ​៖ សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បានប្រកាសថា លោក លឺ ឡាយស្រេង អាច​វិល​ត្រលប់មក​ប្រទេស​កំណើត​វិញ ខណៈ​ដែលសម្ដេច​អញ្ជើញ​ផ្តល់​កិត្តិយស ​ប្រគល់​សញ្ញាបត្រ​ដល់​និស្សិត​ចំនួន ៣,២១៣​នាក់ នៃ​វិទ្យាស្ថាន​វ៉ាន់ដា នៅ​កោះ​ពេជ្រ​ កាលពី​ព្រឹក​ថ្ងៃទី​១ ខែមេសា ឆ្នាំ​២០១៩ ។​

​សម្តេច​តេ​ជោ ហ៊ុន សែន បានប្រកាស​ជា​សាធារណៈ​ថា នឹង​គ្មាន​ការចោទប្រកាន់​ទៅលើ​រូបលោក លឺ ឡាយស្រេង ទេ ហើយ​បាន​ប្រាប់​ទៅ​អាជ្ញាធរ និង​សមត្ថកិច្ច កុំអោយ​ចាប់ចង​រូបលោក​ទៀតផង បន្ទាប់ពី​កាល​ថ្មីៗ​នេះ សម្តេច​តេ​ជោ បានឃើញ ព័ត៌មាន​តាមរយៈ​បាងកក​ប៉ុ​ស្ត៍ ដែល​លោក លឺ ឡាយស្រេង បាន​អំពាវនាវ​សុំ​ការសណ្តោស​លើកលែង​ពី សម្តេច​តេ​ជោ ដើម្បី​បាន​វិលត្រឡប់​ចូលមក​រស់នៅ សម្រាប់​ជីវិតចុងក្រោយ​របស់ខ្លួន​នៅក្នុង​ប្រទេស​កំណើត​។​

លោក លឺ ឡាយស្រេង និងសម្ដេច ហ៊ុន សែន

​លោក លឺ ឡាយស្រេង បាន​បង្ហោះ​នៅក្នុង​គណនី​ហ្វេ​ស​ប៊ុ​ក​របស់លោក​ កាលពី​ថ្ងៃ​ព្រហស្បតិ៍​​ សប្ដាហ៍​មុន​ថា​៖ “​គួរ​ឲ្យ​ស្រណោះ​ចាស់​ម្នាក់ ធ្វើ​ខុស​បន្តិចបន្តួច​រត់​មក​នៅ​ប្រទេស​គេ ហើយ​ប្រទេស​គេ​នេះ​មិន​ដូច​ប្រទេស​យើង នឹក​បងប្អូន​ណាស់ នឹក​ប្រទេសជាតិ​ណាស់​។ មិនដឹង​ជា​ថ្ងៃ​ណា​នឹង​បាន​ចូលទៅ​វិញ​ឬក៏​ចោល​ឆ្អឹង​នៅ​ស្រុក​គេ​ក៏​មិនដឹង ព្រោះ​ចេះតែមាន​ជំងឺ​មានអី​ផង​។ ខ្ញុំ​បាន​និយាយ​ច្រើនដង​ហើយ សុំ​ឲ្យ​សម្ដេចនាយក​អនុគ្រោះ​និយាយ​ខុសត្រូវ​អី ខុស​អី​តិចតួច​ហ្នឹង​ទុកជា​មោ​ឃៈ​ទៅ​។ អនុញ្ញាត​ឲ្យ​ខ្ញុំ​ទៅ​ស្រុក​វិញ​ទៅ​ពីព្រោះ​ខ្ញុំ​បាន​បម្រើ​ជាមួយ​សម្ដេច​ហ្នឹង ៣ អាណត្តិ​មកហើយ ខ្ញុំ​បាន​និយាយ​ច្រើនដង​ហើយ​រឿង​ហ្នឹង​។​”

​ចំណែក​នៅក្នុង​វីដេអូ​ឃ្លី​ប លោក លឺ ឡាយស្រេង បាន​និយាយថា​៖ “​សម្ដេច​អើយ ធ្លាប់​ធ្វើការ​ជាមួយគ្នា​ដែរ គួរ​ណាស់​អនុគ្រោះ​ឲ្យ​ខ្ញុំ​ទៅ​ស្រុក​វិញ​ទៅ បាន​ទៅ​រួបរួម​ជាមួយ​ប្រទេសជាតិ ជាមួយ​បងប្អូន​ទាំងអស់​។​”

លោក លឺ ឡាយស្រេង

​គួរ​រំ​ម្លឹ​ក​ផងដែរ​ថា លោក លឺ ឡាយស្រេង បាន​ជាប់​បណ្ដឹង​ចំនួន ៣ នៅ​ឆ្នាំ ២០១៧ ក្រោយពេល​លោក​សន្ទនា​ឯកជន​ជាមួយ លោកស្រី គី លំអង ដែល​បន្ទាប់មក​សារ​សន្ទនា​នោះ ត្រូវបាន​បែកធ្លាយ ពី​ការដែល​លោក ប្រមាថ​ដល់​អង្គ​ព្រះមហាក្សត្រ​។​

លោក លឺ ឡាយស្រេង ក៏ត្រូវ​បាន​ប្ដឹង​ដោយ​សម្ដេច​តេ​ជោ ហ៊ុន សែន តាមរយៈ​មេធាវី​តំណាង ក្នុងករណី​ដែលថា​សម្ដេច​តេ​ជោ បាន​សូកប៉ាន់​ឲ្យ​គណបក្ស​ហ្វ៊ុនស៊ិនប៉ិច ទទួលយក​កៅអី​ទំនេរ ក្រោយពី​គណបក្ស​សង្គ្រោះ​ជាតិ ត្រូវបាន​រំលាយ​។​

​ហើយលោក​ ក៏​ត្រូវបាន​គណបក្ស​ហ្វ៊ុនស៊ិនប៉ិច ប្ដឹងចោទប្រកាន់​ពីបទ​បរិហារកេរ្តិ៍​ផងដែរ ដោយសារតែ​លោក​លើកឡើងថា អ្នក​ដែល​ទទួល​កៅអី ជា​តំណែង​តំណាងរាស្ត្រ ពី​គណបក្ស​សង្គ្រោះ​ជាតិ ត្រូវ​ផ្ដល់ប្រាក់ ២ ម៉ឺន​ដុល្លារ​ម្នាក់ ទៅ​មេដឹកនាំ​គណបក្ស​ហ្វ៊ុនស៊ិនប៉ិច​។​

​កាលពីដើម​ឆ្នាំមុន លោក លឺ ឡាយស្រេង ត្រូវបាន​សាលាដំបូង​រាជធានី​ភ្នំពេញ កាត់​ក្ដីឲ្យ​ចាញ់​បណ្ដឹង​របស់​សម្ដេច ហ៊ុន សែន ដោយ​ផ្ដន្ទាទោស​ឲ្យ​សងជំងឺចិត្ត ៥០០ លាន​រៀល​ដែល​ស្មើនឹង​ប្រមាណ ១២ ម៉ឺន ៥ ពាន់​ដុល្លារ​៕