កំណែទម្រង់​ជា​កញ្ចប់ សម្រាប់ SME ដែល​រដ្ឋាភិបាល​ដាក់ចេញ ​មាន​អ្វីខ្លះ​?

44753

ភ្នំពេញ​៖ រដ្ឋាភិបាល​ក្រោម​ការដឹកនាំ​របស់​សម្ដេច​តេ​ជោ ហ៊ុន សែន បានប្រកាស​ចេញ​នូវ​កំណែទម្រង់​ជា​កញ្ជប់ ដើម្បី​លើកកម្ពស់​ការអភិវឌ្ឍ​សហគ្រាស​ធុន​តូច និង​មធ្យម​, ពង្រឹង​ការប្រកួតប្រជែង និង​បង្កើន​សមត្ថភាព​ផលិតកម្ម នៅក្នុង​វេទិកា​រាជរដ្ឋាភិបាល​-​ផ្នែក​ឯកជន កាលពី​ថ្ងៃទី​២៩ ខែមីនា ឆ្នាំ​២០១៩​។​

វិស័យ​អាទិភាព ដែល​ទទួលបាន​ការលើក​ទឹកចិត្ត រួមមាន​ដូចជា​៖

  • ​សហគ្រាស​ផលិត និង​ផ្គត់ផ្គង់​ទឹកស្អាត
  • ​ផលិតកម្ម​កសិកម្ម ឬ​ក​សិ​-​ឧស្សាហកម្ម​
  • ​ផលិតកម្ម​ផលិត និង​កែច្នៃ​ម្ហូបអាហារ​
  • ​កម្មន្តសាល​ផលិត​ទំនិញ បម្រើឱ្យ​ការនាំចេញ​
  • ​កម្មន្តសាល​ផលិត​ទំនិញប្រើប្រាស់​ក្នុងស្រុក​, ការកែឆ្នៃ​កាកសំណល់ និង​ផលិត​ទំនិញ​សម្រាប់​វិស័យ​ទេសចរណ៍​
  • ​កម្មន្តសាល​ផលិត​នៃ​ផលិតផល​សម្រេច ឬ​លទ្ធផល​ពាក់កណ្ដាល​សម្រេច ឬ ផ្នែក ឬ​គ្រឿង​បង្គុំ ដើម្បី​ផ្គត់ផ្គង់​ឲ្យ​កម្មន្តសាល​ដទៃទៀត​
  • ​ការស្រាវជ្រាវ និង​អភិវឌ្ឍ​បច្ចេកវិទ្យា​ព័ត៌មាន ដែលមាន​លក្ខណៈ​នវានុវត្តន៍​
  • ​ការអភិវឌ្ឍ​តំបន់​ប្រមូលផ្ដុំ​សហគ្រាស​ធុន​តូច និង​មធ្យម​

​គោលនយោបាយ​កំណែទម្រង់​ជា​កញ្ចប់ ដែល​រាជរដ្ឋាភិបាល​បាន​ដាក់ចេញ​រួមមាន៖

  • អនុក្រឹត្យ​លេខ​១២៤ ស្ដីពី​ការលើកទឹកចិត្ត​ផ្នែក​ពន្ធដារ សម្រាប់​សហគ្រាស​ធុន​តូច និង​មធ្យម ដែល​ក្នុងនោះ​មាន​៖ ការលើកលែង​ពន្ធ​ប្រាក់ចំណូល រយៈពេល ៣ ទៅ​៥​ឆ្នាំ​, ការលើកលែង​ការបង់ប្រាក់​រំដោះ​ពន្ធ​លើ​ប្រាក់ចំណូល និង​ពន្ធ​អប្បបរមា និង​ការលើកលែង​ប្រាក់​ចំណាយ ដែល​បាន​កាត់កង​បាន ពី​១៥០% ទៅ ២០០% ។​
  • អនុក្រឹត្យ​ទី​៥០ ចុះ​ថ្ងៃទី​២៥ ខែមីនា ឆ្នាំ​២០១៩ ស្ដីពី​ការលើកទឹកចិត្ត​ផ្នែក​គយ សម្រាប់​សហគ្រាស​ធុន​តូច និង​មធ្យម ដែល​ក្នុងនោះ​រួមមាន​៖ ការលើកលែង​ពន្ធគយ លើ​សម្ភារៈ​បរិក្ខារ​ផលិតកម្ម​, សម្ភារៈ​សាងសង់ និង​ធាតុ​ចូល​ផលិតកម្ម សម្រាប់​សហគ្រាស​ផលិត និង​ផ្គត់​ផ្គង​ទឹកស្អាត​, សហគ្រាស​បម្រើ​ឲ្យ​ការនាំចេញ និង​សហគ្រាស​ជា​ប្រភេទ​ឧស្សាហកម្ម​គាំទ្រ​។ អ្នក​អភិវឌ្ឍន៍​តំបន់​ប្រមូលផ្ដុំ​សហគ្រាស​ធុន​តូច និង​មធ្យម និង​សហគ្រាស​បម្រើ​តម្រូវការ​ក្នុងស្រុក ទទួលបាន​ការលើកលែង​ពន្ធគយ​លើ​សម្ភារៈ​បរិក្ខារ​ផលិតកម្ម និង​សម្ភារៈ​សាងសង់​។ សហគ្រាស​ផ្នែក​ស្រាវជ្រាវ និង​អភិវឌ្ឍន៍​បច្ចេកវិទ្យា​ព័ត៌មាន ទទួលបាន​លើកលែង​ពន្ធគយ លើ​សម្ភារ​បរិក្ខា​សម្រាប់​តម្លើង និង​ប្រើប្រាស់​ក្នុងការ​ស្រាវជ្រាវ និង​អភិវឌ្ឍន៍​បច្ចេកវិទ្យា​ព័ត៌មាន​ដែលមាន​លក្ខណៈ​នុ​វា​នុ​វត្ត ។​
  • ​អនុក្រឹត្យ​លេខ​៥១ ចុះ​ថ្ងៃទី​២៥ ខែសីហា ឆ្នាំ​២០១៩ ស្ដីពី​ការកែសម្រួល​អត្រាពន្ធគយ​, អត្រា អាករ​ពិសេស និង​អត្រា​ការនាំចេញ ដើម្បី​លើកទឹកចិត្ត​ដល់​វិស័យ​កសិកម្ម និង​សហគ្រាស​ធុន​តូច និង​មធ្យម និង​ការថែរក្សា​បរិស្ថាន​។
  • ​ការរៀបចំ​ដាក់ឱ្យ​ដំណើរការ នៅក្នុង​ឆ្នាំ​២០១៩ នៅ​ធនាគារ​សហគ្រាស​ខ្លួន​តូច និង​មធ្យម​ដែលមាន​កញ្ចប់​ទឹកប្រាក់​ដំបូង​ប្រមាណ​១០០​លាន​ដុល្លារ ចេញពី​ប្រាក់​សន្សំ​របស់​រាជរដ្ឋាភិបាល ដើម្បី​គាំទ្រ​ដល់​សហគ្រាស​ធុន​តូច និង​មធ្យម ដែលមាន​សក្តានុពល ក្នុងការ​ពង្រីក​អាជីវកម្ម ក្នុង​បង្កើត​ការងារ ។​
  • ​ក្រសួង​ឧស្សាហកម្ម និង​សិប្បកម្ម កំពុងតែ​ដឹកនាំ​រៀបចំ​គោលនយោបាយ​ជា​កញ្ចប់ សម្រាប់​លើកស្ទួយ​សហគ្រាស​ធុន​តូច និង​មធ្យម ព្រមទាំង​ពង្រីក​ឡើងវិញ​នូវ​និយមន័យ​រួម​របស់ SMEs សម្រាប់​ការផ្ដល់​ការលើកទឹកចិត្ត​នានា ឱ្យបាន​ចប់សព្វគ្រប់​នៅក្នុង​ឆ្នាំ​២០១៩​នេះ ។ បន្ថែម​លើ​នេះ ក្រសួង​ឧស្សាហកម្ម និង​សិប្បកម្ម ត្រូវបាន​សម្ដេច​ស្នើ​ឲ្យ​ធ្វើការ​សិក្សា និង​ពិនិត្យ​លទ្ធភាព​រៀបចំ​ច្បាប់​ស្ដីពី​សហគ្រាស​ធុន​តូច និង​មធ្យម​ផងដែរ​។​
  • ​រាជរដ្ឋាភិបាល​បាន​បង្កើតឡើង​នៃ មូលនិធិ​សហគ្រិនភាព ដែលមាន​ថវិកា​៥​លាន​ដុល្លារ​ក្នុង មួយឆ្នាំ និង មជ្ឈមណ្ឌល​ធុរកិច្ច​ថ្មី តេ​ជោ ក្នុង​បំណង​ជួយ​ជា​ធនធាន​ហិរញ្ញវត្ថុ បច្ចេកទេស​. ទំនាក់ទំនង​ទីផ្សារ​, ការផលិត ការបណ្ដុះបណ្ដាល និង​ការប្រឹក្សា​យោបល់ ដល់​សហគ្រាស​ធុន​តូច និង​មធ្យម និង​ក្រុមហ៊ុន​តូចៗ ដែល​ទើបបាន​បង្កើតឡើង​។

ជាមួយនឹង​ការដាក់​នូវ​គោលនយោបាយ ជួយ​ដល់​សហគ្រាស​ធុន​តូច និង​មធ្យម អ្វីដែល​រាជរដ្ឋាភិបាល​ចង់បាន​ពី​សហគ្រាស​ធុន​តូច និង​មធ្យម មកវិញ គឺ​ការចុះបញ្ជី និង​ការ​កាន់​បញ្ជី​គណនេយ្យ​ឲ្យ​បាន​ត្រឹមត្រូវ​។​

បន្ថែម​ទៅលើ​ការដាក់ចេញ​នូវ​កំណែទម្រង់​នេះ សម្ដេច ហ៊ុន សែន បានស្នើ​ឲ្យ​មានការ​បញ្ចុះតម្លៃ នៅ​កំពង់ផែ​ទាំងពីរ​របស់​កម្ពុជា​, តម្លៃ​អគ្គិសនី​នឹងមាន​ការចុះ​បន្ថែមទៀត​នាពេលខាងមុខ​, សាង​សាង​កន្លែង​ផលិត​ថាមពល​អគ្គិសនី​មួយចំនួន​ទៀត​, និង​សម្រេច​លុប​ថ្ងៃ​ឈប់សម្រាក​ចំនួន​៧​ថ្ងៃ​ជាដើម​៕