ភ្នំពេញ៖ ម្តាយបង្កើតរបស់សពកញ្ញា ឌុំ រីដា បានដាក់ពាក្យបណ្ដឹងទារសំណងជំងឺចិត្ត រដ្ឋប្បវេណីចំនួន២០ម៉ឺនដុល្លារ ពីជនបង្កឈ្មោះ យិន ម៉ាណា ភេទស្រី ដែលបានបើករថយន្តទៅបុកកូនស្រីរបស់ខ្លួន បណ្តាលឲ្យស្លាប់ភ្លាមៗ នៅកន្លែងកើតហេតុ កាលពីថ្ងៃទី២៦ ខែមីនា ឆ្នាំ២០១៩ ស្ថិតនៅត្រង់ចំណុចផ្លូវលេខ៣១៧ កែង ផ្លូវ៥២៨ ខណ្ឌទួលគោក រាជធានីភ្នំពេញ។
ពាក្យបណ្តឹងរបស់ម្តាយជនរងគ្រោះ ឌុំ រីដា បានធ្វើឡើងតាមរយៈក្រុមមេធាវីស្ម័គ្រចិត្តសម្តេចតេជោ ហ៊ុន សែន ក្រោមការដឹកនាំរបស់លោកមេធាវី គី តិច មួយថ្ងៃបន្ទាប់ពីកើតហេតុ ដើម្បីការពារ និងស្វែងរកយុត្តិធម៌ជូនក្រុមគ្រួសារជនគ្រោះ។
ដោយឡែកជនបង្ក កញ្ញា យិន ម៉ាណា បានចូលខ្លួនមកទទួលទោសកំហុស ត្រូវបានសមត្ថកិច្ចបញ្ជូនដល់សាលាដំបូងរាជធានីភ្នំពេញ ដើម្បីបន្តនីតិវិធីតាមផ្លូវច្បាប់ កាលពីម៉ោងប្រមាណ ១០ព្រឹកថ្ងៃទី២៩ ខែមីនា ឆ្នាំ២០១៩នេះ ហើយរហូតមកដល់រសៀលថ្ងៃដដែលនេះ ជនបង្កកំពុងស្ថិតក្រោមការសួរនាំរបស់តំណាងអយ្យការនៅឡើយ។
គួររំម្លឹកផងដែរថា នារីរងគ្រោះមានឈ្មោះ ឌុំ រីដា អាយុ២២ឆ្នាំ ស្រុកកំណើតភូមិកំពង់ដំរី ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល ត្រូវបានជនបង្កឈ្មោះ យិន ម៉ាណា បើកបររថយន្តម៉ាក Rang Rover ពាក់ស្លាកលេខភ្នំពេញ 2AF-7777 ក្នុងល្បឿនយ៉ាងលឿនទៅបុកម៉ូតូជនរងគ្រោះ ទាំងកម្រោល ដែលកំពុងធ្វើដំណើរយឺតៗ បណ្តាលឲ្យប៉ើងផ្ទប់នឹងរបងផ្ទះនៅក្បែរនោះ ស្លាប់ភ្លាមៗនៅនឹងកន្លែងកើតហេតុ យ៉ាងអាណោចអធមបំផុត កាលពីថ្ងៃទី ២៦ ខែមីនា ឆ្នាំ២០១៩ កន្លងទៅនេះ នៅចំណុចផ្លូវលេខ៣១៧ កែង ផ្លូវ៥២៨ ខណ្ឌទួលគោក រាជធានីភ្នំពេញ៕
