ភ្នំពេញ៖ អភិក្រមទី៥ «វះកាត់» ចំពោះមន្ត្រីរាជការស៊ីវិល និងមន្ត្រីកងកម្លាំងប្រដាប់អាវុធណា ដែលបំពានលើផលប្រយោជន៍ប្រជាជន ដែលជាម្ចាស់ឆ្នោត ត្រូវបានសម្ដេចតេជោ ហ៊ុន សែន ប្រកាសចាប់ផ្តើមអនុវត្ត និងយ៉ាងម៉ឺងម៉ាត់ហើយ នៅក្នុងពិធីបើកការដ្ឋានសាងសង់មន្ទីរពេទ្យ «មិត្តភាពកម្ពុជា-ចិន ត្បូងឃ្មុំ» មានតម្លៃជិត ៥០លានដុល្លារអាមេរិក ដែលជាជំនួយរបស់ប្រទេសចិន នៅថ្ងៃទី០១ ខែមីនា ឆ្នាំ២០១៩នេះ នៅខេត្តត្បូងឃ្មុំ។
សម្ដេច ហ៊ុន សែន បានថ្លែងថា៖ “មន្ត្រីរាជការណាដែលធ្វើអំពើផ្តេសផ្តាស់ ត្រូវតែទទួលនូវវិន័យ ដែលពួកគេនឹងត្រូវទទួលនូវការបណ្តេញចេញ ឬក៏ត្រូវទទួលវិន័យធ្ងន់ធ្ងរជាងនេះ ដូចជាការផ្តន្ទាទោសដោយច្បាប់”។
សម្ដេច ហ៊ុន សែន បានប្រដូច ជនទាំងឡាយណា ដែលធ្វើទុក្ខបុកម្និញ ប្រជាពលរដ្ឋដែលជាម្ចាស់ឆ្នោត ទៅនឹងគ្រាប់គ្រួស ឬខ្សាច់ ដោយថ្លែងថា៖ “យើងត្រូវធ្វើដំណើរដោយស្វាហាប់ ហើយយើងត្រូវតែយកចេញពីក្នុងស្បែកជើងរបស់យើង គ្រាប់គ្រួសក៏ដោយ ខ្សាច់ក៏ដោយ ត្រូវយកចេញពីជើងរបស់យើងឱ្យអស់ បើមិនដូច្នោះទេ យើងមិនអាចដើរទៅមុខទៀតបានទ ឬក៏យើងដើរទៅវាពងជើងរបស់យើង ឈឺជើងរបស់យើង”។
សម្ដេចបានបញ្ជក់ច្បាស់ថា៖”ទាំងមន្ត្រីរាជការស៊ីវិល ទាំងកម្លាំងប្រដាប់អាវុធ កុំថាអ្នកឯងពាក់ផ្កាយ ពាក់លោកខែក៏ខ្ញុំយកចេញ ពាក្យថា ខ្លាក៏វ៉ៃ ពស់ក៏វ៉ៃ កណ្តុរក៏វ៉ៃ កន្លាត់ក៏វ៉ៃ រុយក៏វ៉ៃ វ៉ៃទាំងអស់ ព្រោះនេះ ខ្ញុំចង់ឱ្យល្បឿននៃការអភិវឌ្ឍរបស់យើងវាទៅមុខ ដោយមិនឈប់ឈរ ហើយឱ្យប្រជាជនទទួលស្គាល់ថា អ្វីដែលគាត់បានប្រឹងបោះឆ្នោតឱ្យគណបក្សប្រជាជន ពួកគាត់នឹងទទួលផលពិតប្រាកដ ពីការអភិវឌ្ឍរបស់យើង ដោយគ្មានការរំខានពីមន្ត្រីដែលស៊ីប្រាក់ខែរបស់រដ្ឋនោះទេ»។
ជាសាក្សីភាព ជាក់ស្ដែង នៃអភិក្រមទី៥ «វះកាត់» របស់សម្ដេច អភិបាលរងខេត្តព្រះសីហនុ ២រូប គឺ លោក ស្រ៊ុន ស្រ៊ន់ និងលោក ផៃ ប៊ុនវណ្ណៈ ត្រូវបានដកតំណែង ហើយហើយប្រគល់ទៅឲ្យអង្គភាពប្រឆាំងអំពើពុករលួយ និងក្រសួងមហាផ្ទៃ ចាត់ការបន្ត។
គួររំម្លឹកថា អភិក្រមចំនួន៥ ក្នុងនោះរួមមាន៖ «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» ត្រូវបានដាក់ចេញដោយរាជរដ្ឋាភិបាលកម្ពុជា នៃរដ្ឋសភា នីតិកាលទី០៦ ដើម្បីធ្វើកំណែទម្រង់ស៊ីជម្រៅ បម្រើដល់ផលប្រយោជន៍ប្រជាពលរដ្ឋដែលជាម្ចាស់ឆ្នោត។ អភិក្រមថ្មី វះកាត់ មានន័យថា មន្ត្រីណាដែលបានប្រព្រឹត្តិកំហុស នឹងមិនទុកទៀតទេ គឺត្រូវតែ វះកាត់ចេញ តែម្ដង៕
