(សេអ៊ូល)៖ អ្នកគ្រប់គ្រងរបស់ក្រុមចម្រៀង BTS ទទួលរងការរិះគន់ជាច្រើនពីអ្នកលេងបណ្តាញសង្គម បន្ទាប់ពីបានប្រើប្រាស់រថយន្តរបស់ក្រុមហ៊ុន ក្នុងគោលបំណងផ្ទាល់ខ្លួន ជូនមិត្តស្រីធ្វើដំណើរកំសាន្ត។ នេះបើយោងតាមការចេញផ្សាយពីសារព័ត៌មាន allkpop នៅថ្ងៃទី១៩ ខែឧសភា ឆ្នាំ២០២០។
ជាការកត់សម្គាល់ កាលពីថ្ងៃទី១៨ ខែឧសភា សហគមន៍អនឡាញ បានលើកឡើងថា អ្នកគ្រប់គ្រងរបស់ក្រុមចម្រៀងបុរស BTS ប្រើប្រាស់រថយន្តរបស់ក្រុមហ៊ុន ក្នុងគោលបំណងផ្ទាល់ខ្លួន ក្នុងដំណើរកំសាន្តជាមួយមិត្តស្រី។ កាលពីឆ្នាំមុន មិត្តស្រីរបស់អ្នកគ្រប់គ្រងរូបនោះ បានបង្ហោះរូបភាពក្នុង Instagram ក្នុងន័យអបអរសាទរមិត្តប្រុសរបស់នាង ដែលបានក្លាយជាបុគ្គលិកនៃភ្នាក់ងាររបស់ BTS។
បន្ទាប់មក នាងបានបង្ហោះរូបភាពក្នុងរថយន្តរបស់ក្រុមហ៊ុន ដែលភ្ជាប់ជាមួយពាក្យពេជន៍ថា «Wow! នេះគឺជារថយន្តរបស់តារា»។
បើតាមសហគមន៍អនឡាញ ករណីនេះបានកើតឡើងច្រើនដងមកហើយ។ អ្នកលេងបណ្តាញសង្គម បានលើកឡើងថា អ្នកគ្រប់គ្រងរូបនោះ គួរតែចេញមុខមកពន្យល់ពីការប្រើប្រាស់រថយន្តរបស់ក្រុមហ៊ុន ក្នុងគោលបំណងផ្ទាល់ខ្លួន។ បន្ថែមពីនេះ អ្នកលេងបណ្តាញសង្គម ថា មិត្តស្រីរបស់អ្នកគ្រប់គ្រងរូបនោះអាចនឹងធ្វើឲ្យគូស្នេហ៍នាងបាត់បង់ការងារធ្វើ ដោយសារការបង្ហោះរូបភាពរបស់នាង ក្នុងបណ្តាញសង្គម៕