អាជ្ញាប័ណ្ណធ្វើអាជីវកម្មកាស៊ីណូ នៅកម្ពុជា សរុបទាំងអស់មានចំនួន ១៥០

1302

ភ្នំពេញៈ ​​គិតត្រឹមចុងឆ្នាំ២០១៨ រដ្ឋាភិបាលកម្ពុជា បានផ្ដល់អាជ្ញា​ប័ណ្ណ​ធ្វើអាជីវកម្ម​កាស៊ីណូ សរុបចំនួន ១៥០ ដែលភាគច្រើននៃអាជ្ញា​ប័ណ្ណនោះ សម្រាប់ធ្វើ​ប្រតិបត្តិ​ការ​​​នៅ​ខេត្ត​ព្រះ​សីហនុ។

​អគ្គនាយក​ដ្ឋាន​ឧស្សាហ​កម្ម​ហិរញ្ញវត្ថុ​នៃ​ក្រសួង​សេដ្ឋកិច្ច​ និង​ហិរញ្ញវត្ថុ​ ដែល​ជា​និយតករ​អាជីវ​កម្ម​​​កាស៊ីណូ បានរាយការណ៍ថា បើធៀបទៅនឹងឆ្នាំ២០១៧ ចំនួន​​​អាជ្ញា​ប័ណ្ណ​ធ្វើអាជីវ​កម្ម​កាស៊ីណូ មានការកើនឡើងចំនួន ៥៣ភាគរយ​ នៅក្នុងឆ្នាំ២០១៨ ក្នុងនោះខេត្តព្រះសីហនុ មានចំនួន ៨៨ អាជ្ញា​ប័ណ្ណ។

លោក រស់ ភីរុណ អគ្គនាយក​រង​នៃ​អគ្គនាយក​ដ្ឋាន​ឧស្សាហ​កម្ម​ហិរញ្ញវត្ថុ​នៃ​ក្រសួង​សេដ្ឋកិច្ច និង​ហិរញ្ញវត្ថុ​ បាន​ប្រាប់ភ្នំពេញប៉ុស្តិ៍ថា៖ «តាម​ផែន​ការ យើង​បាន​កំណត់​ទិស​ដៅ​​ប្រមូល​​ប្រាក់​ចំណូល ៥៦ ​លាន​ដុល្លារ​​​នៅ​ឆ្នាំ​នេះ​»។

លោកបានបន្តទៀតថា៖ «​យើង​កំពុង​ធ្វើ​ការងារ​យ៉ាង​សកម្ម​ដើម្បី​ព្រាង​​​​ច្បាប់​​គ្រប់គ្រង​កាស៊ីណូ និង​អាជីវ​កម្ម​ភ្នាល់​​ល្បែង​ ហើយ​នៅ​ពេល​ណា​ច្បាប់​នេះ​ត្រូវ​បាន​បញ្ចប់​ និង​​ដាក់​ឲ្យ​អនុវត្ត​នោះ​ យើង​សង្ឃឹម​ថា ​ប្រាក់​ចំណូល​​​បាន​ពី​វិស័យ​នេះ​​នឹង​កាន់​តែ​កើន​ច្រើន​ឡើង»។​

ការ​វិនិយោគ​លើ​កាស៊ីណូ​ បាន​ផ្ដល់​​ផល​ប៉ះ​ពាល់​វិជ្ជមាន​​មួយ​ចំនួន​ដូច​ជា ​​ឱកាស​ការងារសម្រាប់ប្រជាជនកម្ពុជា និងប្រាក់ចំណូលជាតិ ដែលបានពីការប្រមូលពន្ធ។ ចំណែកឯផល​អវិជ្ជមានរួមមាន សណ្ដាប់​ធ្នាប់​សាធារណៈ និងអសន្ដិសុខ​ក្នុងសង្គម។

រដ្ឋាភិបាលកម្ពុជា គួរតែពន្លឿន សេចក្ដីព្រាងច្បាប់គ្រប់គ្រង ការធ្វើអាជីវ​កម្មកាស៊ីណូ និងពង្រឹងការអនុវត្តន៍ច្បាប់ឲ្យតឹងរឹងខ្លាំងជាងនេះបន្ថែមទៀត៕