ចិន ផ្ដល់​លុយ​ជិត ៩០​លាន​ដុល្លារ ដើម្បី​ជួយ​គាំពារ​វិស័យ​ការពារជាតិ​របស់​កម្ពុ​ជា​

656

​ទីក្រុង​ប៉េកាំង​៖ លោក ស៊ី ជីន​ពីង ប្រធានាធិបតី​ចិន បានប្រកាស​ផ្តល់ជំនួយ​ប្រមាណ ៦០០​លាន​យន់ ស្មើនឹង​ប្រមាណ​ជិត ៩០​លាន​ដុល្លារ​អាមេរិក ដើម្បី​លើកកម្ពស់​វិស័យ​ការពារជាតិ​របស់​ប្រទេស​កម្ពុជា ក្នុងការ​ការពារ​នូវ​បូរណភាព និង​អធិបតេយ្យភាព​របស់ខ្លួន​។​

​ជំនួប​ពិភាក្សា​ការងារ​រវាង​លោក ស៊ី ជីន​ពីង ជាមួយ​សម្ដេច​តេ​ជោ ហ៊ុន សែន គឺបានធ្វើឡើង​កាលព្រឹក​ថ្ងៃ​ចន្ទ ទី​២៩ ខែមេសា ឆ្នាំ​២០១៩ មុនពេល​សម្ដេច​តេ​ជោ ដឹកនាំ​គណៈ​ប្រតិភូ​ធ្វើ​មាតុភូមិនិវត្តន៍ ត្រលប់មក​ប្រទេស​កម្ពុជា​វិញ​។​

ជំនួប​ពិភាក្សា​ការងារ​រវាង​លោក ស៊ី ជីន​ពីង និងសម្ដេច​តេ​ជោ ហ៊ុន សែន

​ក្រៅពី​វិស័យ​ការពារជាតិ សម្តេច​តេ​ជោ ហ៊ុន សែន និង​លោក​ប្រធានាធិបតី​ចិន ស៊ី ជីន​ពីង ក៏បាន​លើកយក​បញ្ហា​ជាច្រើន​ទៀត ពាក់ព័ន្ធ​ទៅនឹង​ការពង្រឹង​ទំនាក់ទំនង ក៏ដូចជា​កិច្ចសហប្រតិបត្តិការ​​ លើ​ផ្នែក​នយោបាយ សេដ្ឋកិច្ច និង​ការធ្វើ​ពាណិជ្ជកម្ម នៃ​ប្រទេស​ទាំង​២​ផងដែរ​។ នេះ​បើតាម​ការ​ប្រាប់​ឲ្យ​ដឹង​ពី​លោក កៅ គឹមហួន រដ្ឋមន្ត្រី​ប្រតិភូ​អម​នាយករដ្ឋមន្ត្រី​។​

​សម្តេច​តេ​ជោ ហ៊ុន សែន បាន​ស្នើឱ្យ​ប្រធានាធិបតី​ចិន ស៊ី ជីន​ពីង បន្ត​ជួយ​គាំទ្រ​ដល់​រោងចក្រ​សហគ្រាស​របស់​ចិន​ប្រមាណ​៧០០ ដែល​កំពុង​រកស៊ី​នៅ​កម្ពុជា​ ឱ្យ​បន្ត​រកស៊ី​នៅ​កម្ពុជា​បន្ថែមទៀត ហើយ​ក៏បាន​ស្នើឱ្យ​ជំរុញ​អ្នកវិនិយោគ​ថ្មី​របស់​ចិន​បន្ថែមទៀត​ចូល​មក​រកស៊ី​នៅក្នុង​ប្រទេស​កម្ពុជា​។​

សម្តេច​តេ​ជោ ហ៊ុន សែន

​សម្តេច​តេ​ជោ ហ៊ុន សែន បានស្នើ​ទៅ​ប្រធានាធិបតី​ចិន ស៊ី ជីន​ពីង ឲ្យបើក​ទីផ្សារ​របស់ខ្លួន​ ឱ្យ​កាន់តែ​ទូលាយ​ថែមទៀត​ សម្រាប់​ផលិតផល​កម្ពុជា ដោយបាន​ប្រាប់ថា កម្ពុជា​បានធ្វើ​កំណែទម្រង់​ជាច្រើន ដើម្បី​កាត់បន្ថយ​ថ្លៃដើម​ផលិត ក៏ដូចជា​ការប្រតិបត្តិ​ការ​នានា​របស់​ក្រុមហ៊ុន និង​ធានាបាន​នូវ​ការប្រកួតប្រជែង​ផលិតផល​ ផលិត​នៅ​កម្ពុជា​លើ​ទីផ្សារ​អន្តរជាតិ ខណៈដែល​ប្រព័ន្ធ​អនុគ្រោះ​ពន្ធ (EBA) របស់​កម្ពុជា កំពុង​ត្រូវ​សហភាព​អឺរ៉ុប បើក​ការសិក្សា​ថា​តើគួរ​ដក ឬ​មិន​ដក​នេះ​។​

​ចំណែកលោក ស៊ី ជីន​ពីង បាន​លើកឡើងថា កម្ពុជា​ជា​មិត្ត​ដ៏​ស្មោះត្រង់​របស់​ចិន ដូច្នេះ ចិន​នឹង​បន្ត​គាំទ្រ​ដល់​ប្រទេស​កម្ពុជា ជាពិសេស​ក្នុង​ក្របខណ្ឌ​ជា​ដៃគូ​ នៃ​ទំនាក់​ទំនងជា​យុទ្ធសាស្ត្រ គ្រប់​ជ្រុងជ្រោយ​រវាង​ប្រទេស​ទាំងពីរ​។​

លោក ស៊ី ជីន​ពីង

ពាក់ព័ន្ធ​បញ្ហា EBA លោក​ប្រធានាធិបតី​ចិន បាន​អះអាងថា ចិន នឹង​ប្រឹងប្រែង​ជួយ​ដោះស្រាយ នូវ​បញ្ហា​ប្រឈម​នេះ ដោយ​ជំរុញ​អ្នកវិនិយោគ​ចិន មក​កម្ពុជា​ឱ្យ​កាន់តែច្រើន និង​បើក​ទីផ្សារ​ចិន សម្រាប់​ផលិតផល​កម្ពុជា​ ឱ្យ​កាន់តែ​ទូលាយ​ថែមទៀត​។​

​លោក ស៊ី ជីន​ពីង បាន​អះអាង​ផងដែរ​ថា តាមរយៈ​គំនិត​ផ្តួចផ្តើម «​ខ្សែក្រវាត់ និង​ផ្លូវ​» លោក​នឹង​ជំរុញឱ្យមាន​ការអភិវឌ្ឍ ​នៅ​តំបន់​សេដ្ឋកិច្ច​ពិសេស សាងសង់​ព្រលានយន្តហោះ និង​ផ្លូវ​ល្បឿន​លឿន​ជាដើម នៅក្នុង​ប្រទេស​កម្ពុជា​៕​