ក្នុងចំណោម​ប្រទេស​នៅ​អាស៊ាន កម្ពុជា ជា​ប្រទេស​ទី​១ ដែល​បាន​ចុះ​កិច្ចព្រមព្រៀង​អភិវឌ្ឍន៍​បច្ចេកវិទ្យា 5G

469

ភ្នំពេញ​៖ បើ​យោងតាម​ការលើកឡើងរ​ប​ស់លោក Li Jinge ប្រធាន​ក្រុមហ៊ុន HUAWEI Technology ប្រចាំ​តំបន់​អាស៊ីអាគ្នេយ៍ កម្ពុជា គឺជា​ប្រទេស​ដំបូង​គេ​នៅ​អាស៊ាន ដែល​បាន​ចុះ​កិច្ចព្រមព្រៀង​លើ​ការអភិវឌ្ឍន៍​បច្ចេកវិទ្យា 5G​។​

​ការលើកឡើង​នេះ ត្រូវបាន​ធ្វើឡើង​នៅក្នុង​ពេលដែល​លោក Li Jinge បាន​ជំនួប​សម្តែង​ការគួរសម​ជាមួយ​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា នាទី​ក្រុង​ប៉េកាំង ប្រទេស​ចិន កាល​ថ្ងៃទី​២៨ ខែមេសា ឆ្នាំ​២០១៩ កន្លងទៅនេះ​។​

​លោក​ប្រធាន​ក្រុមហ៊ុន HUAWEI Technology បាន​ជម្រាបជូន​សម្តេច​តេ​ជោ​នាយករដ្ឋមន្ត្រី​ថា ក្រុមហ៊ុន HUAWEI Technology បាន​បើក​ការិយាល័យ​នៅក្នុង​ប្រទេស​កម្ពុជា តាំងពី​ឆ្នាំ​១៩៩៩​មកម្ល៉េះ ដែល​មកដល់​បច្ចុប្បន្ន​មាន​រយៈពេល ២០​ឆ្នាំ​ហើយ​។ មកដល់ពេលនេះ ក្រុមហ៊ុន​ទទួលបាន​ជោគជ័យ​សម្រាប់​ការវិនិយោគ នៅក្នុង​ប្រទេស​កម្ពុជា និង​បាន​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍​កម្ពុជា​ផងដែរ​។

​លោក​បាន​បន្តទៀតថា ក្រុមហ៊ុន​របស់លោក ទទួលបាន​ការគាំទ្រ​យ៉ាងច្រើន​ពី​សំណាក់​ប្រជាពលរដ្ឋ​កម្ពុជា ក៏ដូចជា​ទូទាំង​ពិភពលោក​ផងដែរ ដោយសារ​ក្រុមហ៊ុន HUAWEI Technology មាន​ឯកទេស​គ្រប់គ្រាន់​ក្នុង​ការបម្រើ​សេវាកម្ម និង​ជា​ក្រុមហ៊ុន​មួយ​ឈានមុខ​គេ នៅក្នុង​វិស័យ​ទូរគមនាគមន៍ ដូចជា​ការផ្ដល់​បច្ចេក​វិទ្យា​ផងដែរ​។​

​បច្ចុប្បន្ន​ក្រុមហ៊ុន HUAWEI បាន​ចុះហត្ថលេខា​ជាមួយ​បណ្ដា​ប្រទេស​ប្រមាណ​ជា ៤០​ប្រទេស​រួចមកហើយ ក្នុងការ​អភិវឌ្ឍ​ន៍ប​ច្ចេក​វិទ្យា 5G ហើយ​ប្រទេស​កម្ពុជា គឺជា​ប្រទេស​ទី​១ នៅក្នុង​តំបន់​អាស៊ាន ដែល​បាន​ចុះហត្ថលេខា​លើ​កិច្ចព្រមព្រៀង អភិវឌ្ឍ​ទៅលើ​បច្ចេកវិទ្យា 5G​។​

​ក្រុមហ៊ុន HUAWEI នឹង​បន្ត​សហការ​ជាមួយ​ក្រសួង​ស្ថាប័ន របស់​រាជរដ្ឋាភិបាល​កម្ពុជា​បន្ថែមទៀត ព្រមទាំង​ពង្រឹង​បន្ថែម​ជាមួយ​ក្រសួង​ស្ថាប័ន​នានា ទៅលើ​វិស័យ​ឌីជីថល​នៅ​កម្ពុជា ដើម្បី​ចូលរួម​ប្រែក្លាយ​សេដ្ឋកិច្ច​ប្រទេស​កម្ពុជា ទៅជា​សេដ្ឋកិច្ច​ឌីជីថល (Digital Economic)៕​