ភ្នំពេញ៖ នៅចំពោះមុខប្រធានាធិបតីចិន រួមនឹងបណ្តាមេដឹកនាំ និងតំណាងមកពីបណ្តាប្រទេសជាង ១០០នៅលើពិភពលោក សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានលើកឡើងថា ការផ្តល់ហិរញ្ញប្បទាននានាស្ថិតក្រោមគំនិតផ្តួចផ្តើម «ខ្សែក្រវាត់ និងផ្លូវ» របស់ចិន មិនមែនជាអន្ទាក់បំណុល ដូចការលើកឡើងទាំងនេះនោះឡើយ គឺបានផ្តល់ផលប្រយោជន៍យ៉ាងច្រើន ដល់ការអភិវឌ្ឍសេដ្ឋកិច្ច សង្គម និងវប្បធម៌។
សម្ដេចតេជោ ហ៊ុន សែន បានធ្វើការលើកឡើងបែបនេះ នៅក្នុងពិធីបើកវេទិកា «ខ្សែក្រវាត់ និងផ្លូវ» លើកទី២ ដែលបានប្រារព្ធធ្វើឡើងនៅថ្ងៃទី២៦ ខែមេសា ឆ្នាំ២០១៩នេះនៅទីក្រុងប៉េកាំង ប្រទេសចិន។
សម្ដេចតេជោ ហ៊ុន សែន ហ៊ានអះអាងបែបនេះ ដោយសារតែសម្រាប់ប្រទេសកម្ពុជា ការអភិវឌ្ឍតំបន់សេដ្ឋកិច្ចពិសេសខេត្តព្រះសីហនុ ដែលជាគម្រោងវិនិយោគដ៏ធំរបស់ចិន គឺជាសក្ខីភាពមួយយ៉ាងច្បាស់នៃការកសាងគម្រោងផែនការសហប្រតិបត្តិការ «ខ្សែក្រវាត់ និងផ្លូវ» ហើយការកសាងផ្លូវល្បឿនលឿនភ្នំពេញ-ព្រះសីហនុ ទៀតសោត ក៏នឹងក្លាយទៅជាកម្លាំងចលករមួយទៀត ចូលរួមកែប្រែវិមាត្រសេដ្ឋកិច្ចកម្ពុជា និងបង្កើនការតភ្ជាប់ក្នុងតំបន់ឱ្យកាន់តែប្រសើរឡើង ក៏ជាសមិទ្ធផលដ៏សំខាន់មួយ ដែលកើតចេញពីគំនិតផ្តួចផ្តើម «ខ្សែក្រវាត់ និងផ្លូវ» នេះផងដែរ។
សម្តេចតេជោ ហ៊ុន សែន បានបញ្ជាក់ថា “ដោយឈរលើស្មារតីខិតខំរួមគ្នា ចែករំលែកផលប្រយោជន៍ជាមួយគ្នា និងទទួលបានឱកាសដូចគ្នា។ ខ្ញុំយល់ថា គំនិតផ្តួចផ្តើម «ខ្សែក្រវាត់ និងផ្លូវ» នឹងមិនផ្តល់ផលប៉ះពាល់ជាអវិជ្ជមានដល់ប្រទេសណាមួយឡើយ។ ក្នុងនាមជាប្រទេសដែលមានអធិបតេយ្យ យើងមានសិទ្ធិ និងជម្រើសក្នុងការសម្រេចយកតែអ្វីដែលយើងចង់បាន និងប្រភេទហិរញ្ញប្បទានណាដែលយើងត្រូវការ ហើយអនុវត្តន៍គម្រោងទាំងនោះដោយឈរលើគោលការណ៍នៃការពង្រឹងភាពជាម្ចាស់ និងភាពជាអ្នកដឹកនាំការអភិវឌ្ឍជាតិរបស់ខ្លួន”។
សម្តេចតេជោ បានបន្តទៀតថា “ជាក់ស្តែងស្ថានភាពបំណុល របស់កម្ពុជាមកដល់ពេលនេះ ស្ថិតក្នុងលក្ខណៈល្អប្រសើរ ដោយសារយើងមានគោលនយោបាយ និងបានអនុវត្តន៍ការគ្រប់គ្រងម៉ាក្រូសេដ្ឋកិច្ច និងហិរញ្ញវត្ថុសាធារណៈប្រកបដោយវិន័យហ្មត់ចត់តឹងរឹង ព្រមទាំងផែនការ និងយុទ្ធសាស្ត្រអភិវឌ្ឍន៍ជាតិយ៉ាងច្បាស់ដោយផ្តល់អាទិភាព និងការរៀបចំអភិវឌ្ឍន៍ តាមលំដាប់លំដោយជាប្រព័ន្ធប្រទាក់ក្រឡាគ្នា និងធានាសង្គតិភាពរវាងផែនការសកម្មភាព និងគម្រោងថ្នាក់ជាតិជាមួយនឹងផែនការសកម្មភាព និងគម្រោងថ្នាក់ក្រោមជាតិ ក៏ដូចជាធានាសង្គតិភាពជាមួយផែនការសកម្មភាព និងគម្រោងនៃកិច្ចសហប្រតិបត្តិការទ្វេភាគី និងពហុភាគីទាំងអស់ ដើម្បីធានាឱ្យបាននូវភាពជាក់ស្តែងនិយមឆ្លើយតបទៅនឹងអាទិភាព និងប្រសិទ្ធភាពនៃការអនុវត្តន៍ផងដែរ”។
“ប្រទេសកម្ពុជាមិនត្រឹមតែអាចចរចា និងរៀបចំគម្រោងទាំងឡាយ ដោយឈរលើស្មារតីការពារផលប្រយោជន៍ជូនជាតិ និងប្រជាជនរបស់ខ្លួនដោយស្មើភាព និងស្មើសិទ្ធិប៉ុណ្ណោះទេ ប៉ុន្តែថែមទាំងអាចសម្រេចបាននូវការធ្វើវិស្វកម្មហិរញ្ញវត្ថុមួយ ដែលមិនបង្កើតបន្ទុកហិរញ្ញវត្ថុ និងបំណុលសាធារណៈដល់រដ្ឋថែមទៀតផង”៕
