អ្នកនាំពាក្យ​៖ ​ទូត​អាល្លឺម៉ង់​ ​ចង់​ឲ្យ EBA មាន​លក្ខណៈវិជ្ជមាន ដល់​កម្ពុជា​

3274

​លោក Christian Berger ឯកអគ្គរដ្ឋទូត​អាល្លឺម៉ង់​ថ្មី​ប្រចាំ​កម្ពុជា បានបង្ហាញ​ជំហរ​គាំទ្រ ឲ្យ​ប្រទេស​កម្ពុជា តតាំង​ជាមួយ​សហភាព​អឺរ៉ុប ទាក់ទិន​បញ្ហា EBA ខណៈ​ដែលមាន​បណ្ដា​ប្រទេស​ជាច្រើន គាំទ្រ​ចេញមុខ​គាំទ្រ​ឲ្យ​សភាព​អឺរ៉ុប រក្សា​ប្រព័ន្ធ​អនុគ្រោះ​ពន្ធ លើ​មុខទំនិញ​គ្រប់​ប្រភេទ លើកលែងតែ​អាវុធ (EBA) ដល់​កម្ពុជា​ដដែល នៅក្នុង​ជំនួប​ជាមួយ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស​ខ្មែរ​។​

​សហភាព​អឺរ៉ុប បានចាប់ផ្តើម​នីតិវិធី​ជា​ផ្លូវការ ផ្អាក​ជា​បណ្តោះអាសន្ន លើ​ប្រព័ន្ធ​អនុគ្រោះ​ពន្ធ​លើ​មុខ ទំនិញ​គ្រប់​ប្រភេទ​លើកលែងតែ​អាវុធ កាលពី​ថ្ងៃទី​១៣ ខែកុម្ភៈ ឆ្នាំ​២០១៩ មុននឹង​អាចឈាន​ទៅរក​ការព្យួរ​នា​ខែកុម្ភៈ ឆ្នាំ​២០២០ ប្រសិនបើ​រកឃើញថា កម្ពុជា​អនុវត្ត​មិន​ត្រឹមត្រូវ ទៅរក​ភាពល្អប្រសើរ​គ្រប់គ្រាន់ លើ​បញ្ហា​សិទ្ធិមនុស្ស និង​ប្រជាធិបតេយ្យ ។​

​ក្រោយ​បញ្ចប់​ជំនួប​រវាង លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស​ខ្មែរ និង​ឯកអគ្គរដ្ឋទូត​អាល្លឺម៉ង់​ ​កាលពី​ថ្ងៃទី​២៤ តុលា​នេះ លោក កុយ គួ​ង អ្នកនាំពាក្យ​ក្រសួងការបរទេស​ខ្មែរ បាន​ថ្លែងប្រាប់​អ្នកសារព័ត៌មាន​ថា លោក​ទូត​អាល្លឺម៉ង់​ថ្មី បានបង្ហាញ​នូវ​ឆន្ទៈ​យ៉ាង​មុតមាំ គឺ​ធ្វើយ៉ាងណា ឲ្យ​កិច្ចសហប្រតិបត្តិការ រវាង​ប្រទេស​ទាំងពីរ កាន់តែ​ស៊ីជម្រៅ និង​រីកចម្រើន​បន្ថែមទៀត ។​

​លោក​បន្តថា ភាគី​ទាំងពីរ ក៏បាន​លើកឡើង​ពី​បញ្ហា EBA ដែល​កម្ពុជា​-​អាល្លឺម៉ង់ បាន​បង្ហាញថា EBA គឺជា​រឿង​សំខាន់​រវាង​កម្ពុជា​-​សហភាព​អឺរ៉ុប ក៏ដូចជា​ប្រទេស​នីមួយៗ នៅក្នុង​សហភាព​អឺរ៉ុប ។ លោក​ថា ភាគី​កម្ពុជា​-​អាល្លឺម៉ង់ ក៏បាន​ឯកភាពគ្នា ធ្វើយ៉ាងណា​ជំរុញ​បញ្ហា EBA នេះ​ឲ្យ​មាន​លក្ខណៈ​ជឿនលឿន​ទៅមុខ និង​ទទួលបាន​លទ្ធផល​វិជ្ជមាន ។​

​អ្នកនាំពាក្យ​បញ្ជាក់ថា «​ដូច​ខ្ញុំ​បានបញ្ជាក់​ចឹ​ង ទាំង​គាត់ (​ទូត​អាល្លឺម៉ង់​) និង​ឧបនាយករដ្ឋមន្ត្រី ប្រាក់ សុខុន គឺ​បង្ហាញ​ឆន្ទៈ​ចង់​ឲ្យ ដំណើរការ EBA ហ្នឹង​មាន​លក្ខណៈ​វិជ្ជមាន សម្រាប់​កម្ពុជា​ផង សម្រាប់​សហភាព​អឺរ៉ុប​ផង​… ដូច​ខ្ញុំ​បានបញ្ជាក់​មិញ​ហ្នឹង អីចឹង​កាលណា​ចង់​ឲ្យ EBA មាន​លក្ខណៈ វិជ្ជមាន ដល់​កម្ពុជា ដល់​អឺរ៉ុប មានន័យថា អាល្លឺម៉ង់​ចង់​ឲ្យ EBA ហ្នឹង​នៅ​ដំណើរការ​ដដែល កុំ​ឲ្យ​មាន​លក្ខណៈ​អាក់ខាន រវាង​ភាគី​ទាំងពីរ​» ។​

​លោក កុយ គួ​ង គូសបញ្ជាក់ថា ដូច​អ្វីដែល​សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​បំពេញ​ទស្សនកិច្ច នៅ​បណ្ដា​ប្រទេស​មួយចំនួន កាលពីពេល​កន្លងមក គឺមាន​ប្រទេស​ជាច្រើន បានបង្ហាញ​ឆន្ទៈ​គាំទ្រ​ឲ្យ​សហភាព​អឺរ៉ុប រក្សា​ប្រព័ន្ធ​អនុគ្រោះ​ពន្ធ​លើ មុខទំនិញ​គ្រប់​ប្រភេទ​លើកលែងតែ​អាវុធ (EBA) ដល់​កម្ពុជា​ដដែល ព្រោះ​ប្រទេស​ទាំងនោះ​យល់ថា នេះ​ជា​រឿង​សំខាន់ សម្រាប់​ជា​ប្រយោជន៍​ដល់ក​ម្មករ កម្មការិនី​កម្ពុជា​ផងដែរ ។​

​លោក​បន្ថែមថា បញ្ហា EBA នេះ ទោះបី​មាន ឬ​គ្មាន​លក្ខ​ខ័​ណ្ឌ ពី​សហភាព​អឺរ៉ុប ក៏​កម្ពុជា​បានធ្វើ និង​កំពុង​ធ្វើ ជាពិសេស​គឺ​ស្របទៅនឹង​លក្ខ​ខ័​ណ្ឌ ដែល​គេ​ចង់បាន ។ កិច្ចការ​ទាំងនេះ ទោះបី​គ្មាន​អនុសាសន៍​ពី​អ្នកណា ក៏​រាជរ​ដ្ខា​ភិ​បាល បានធ្វើ​រួចហើយ​តាំងពី​វិស័យ​ដីធ្លី និង​វិស័យ​ជាច្រើន​ទៀត ព្រមទាំង​ផលប្រយោជន៍​របស់​កម្ម​ករ គឺ​រាជរដ្ឋាភិបាល បានធ្វើ​តាំងពី​មិនទាន់​កើតមាន​បញ្ហា ពាក់ព័ន្ធ​នឹង EBA ។​

​ទាក់ទង​ពាណិជ្ជកម្ម​លោក​លើកឡើងថា កាលពី​ឆ្នាំ​២០១៨ ទំហំ​ពាណិជ្ជកម្ម រវាង​កម្ពុជា​-​អាល្លឺម៉ង់ មាន​ជាង ១២០០​លាន​ដុល្លារ ក្នុងនោះ​កម្ពុជា​នាំ​ចេញទៅ​អាល្លឺម៉ង់​ជាង ១០០០​លាន​ដុល្លារ និង​អាល្លឺម៉ង់​នាំចូល​ម​កម្ពុជា មាន​ជាង ១០០​លាន​ដុល្លារ ។ រយៈពេល ៦​ខែ ឆ្នាំ​២០១៩​នេះ ទំហំ​ពាណិជ្ជកម្ម​កម្ពុជា​-​អាល្លឺម៉ង់ មាន​ចំនួន​ប្រមាណ​ជា ៥៥០​លាន​ដុល្លារ ។ ក្នុងចំណោម​ប្រទេស​ទាំង ២៨ នៅក្នុង​សហភាព​អឺរ៉ុប គឺ​ទំហំ​ពាណិជ្ជកម្ម​កម្ពុជា​-​អាល្លឺម៉ង់ គឺមាន​ទំហំ​ធំជាងគេ បន្ទាប់មក​ចក្រភព​អង់គ្លេស និង​បារាំង ។ លោក​បន្តថា ជា​មធ្យម​ក្នុង​មួយឆ្នាំៗ ភ្ញៀវទេសចរ អាល្លឺម៉ង់ មក​ទស្សន​កម្សាន្ត នៅ​ព្រះរាជាណាចក្រ​កម្ពុជា មាន​ជាង ១០​ម៉ឺន​នាក់ ។​

​សូមបញ្ជាក់ថា ប្រទេស​ដែល​ទទួលបាន ការអនុគ្រោះ​ពន្ធ​លើ​គ្រប់​មុខទំនិញ លើកលែង​សព្វាវុធ ពី​សហភាព​អឺរ៉ុប​មាន​៤៩​ប្រទេស ។ ក្នុងនោះ​បណ្ដា​ប្រទេស​នៅ​អាហ្វ្រិក មាន​ចំនួន​ច្រើនជាងគេ​។ ក្នុងករណី​សហភាព​អឺរ៉ុប សម្រេច​ជា​ផ្លូវ​ការដក EBA ពី​កម្ពុជា សម្ដេច​តេ​ជោ ហ៊ុន សែន ប្រមុខ​រាជរដ្ឋាភិបាល​កម្ពុជា​អះអាងថា ទីផ្សារ​អឺរ៉ុប នៅតែ​បើកចំហ​សម្រាប់​ក​ម្ពុ​ជា​ដដែល ប៉ុន្តែ​គ្រាន់​តែមាន​បន្ថែម តម្លៃ​ពន្ធដារ​មួយចំនួន​ប៉ុណ្ណោះ​។ កម្ពុជា​ត្រូវតែ​ខិតខំ​កសាង អភិវឌ្ឍន៍​ខ្លួន​ឲ្យ​រួច​ផុតពី​ភាពក្រីក្រ ដើម្បី​មាន​កម្លាំង​សេដ្ឋកិច្ច​រឹងមាំ នៅពេលនោះ​ហើយ EBA ក៏​នឹងត្រូវ​ដកចេញ​ជា​ស្វ័យប្រវត្តិ​។ ការផ្តល់​នូវ​ប្រព័ន្ធ អនុគ្រោះ​ពាណិជ្ជកម្ម EBA គឺ​សម្រាប់​ប្រទេស​ក្រីក្រ ក្នុងការ​នាំយក​ផលិតផល និង​ទំនិញ​នានា​មកកាន់​ទីផ្សារ EU ដោយមាន​ការអនុគ្រោះ​ពន្ធ ហើយ​មិនអាច​ផ្តល់ជូន ជា​រៀងរហូត​នោះបាន​ឡើយ ៕​