ព្រះមហាក្សត្រ ស្តេចយាងចែកព្រះរាជអំណោយ នៅស្រុកថ្ពង ខេត្តកំពង់ស្ពឺ

1507

កំពង់ស្ពឺ៖ ព្រះករុណា ព្រះបាទ សម្តេច ព្រះបរមនាថ នរោត្តមសីហមុនី ព្រះមហាក្សត្រ នៃព្រះរាជាណាចក្រកម្ពុជា បានយាងចែក ព្រះរាជអំណោយជូនពលរដ្ឋកម្ពុជា ជួបការលំបាកចំនួន ៥៦០គ្រួសារ រស់នៅភូមិទឹកលង១ និងភូមិទឹកលង២ ឃុំរុងរឿង ស្រុកថ្ពង ខេត្តកំពង់ស្ពឺ  កាលពីព្រឹកថ្ងៃទី៣០ ខែមករា ឆ្នាំ២០២០កន្លងទៅនេះ។

ព្រះមហាក្សត្រ បានមានព្រះរាជបន្ទូលសំណេះសំណាល និងបណ្តាំផ្ញើដោយក្តីនឹករលឹកពីសម្តេចព្រះមហាក្សត្រី នរោត្តម មុនិនាថ សីហនុ ព្រះវរាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជូនចំពោះកូន ចៅ ចៅទួត របស់ព្រះអង្គ ប្រកបដោយក្តីនឹករលឹកបំផុតពីចម្ងាយ។

ជាមួយគ្នានោះ ព្រះមហាក្សត្រ ព្រះអង្គ បានកោតសសើរចំពោះសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចជាកាល បានយកចិត្តទុកដាក់ សុខទុក្ខរបស់ប្រជាពលរដ្ឋជាកូនជាចៅរបស់ព្រះអង្គ។

ព្រះមហាក្សត្រ ទ្រង់បានយាងចែកព្រះរាជអំណោយជូនប្រជារាស្ត្រដោយផ្ទាល់ ចំនួន ៤៦៩គ្រួសារ និងស្តេចយាងតាមព្រះរាជទីនាំងទត កូនចៅ ដែលឈរចាំទទួលអមតាមដងផ្លូវ ដោយព្រះរាជហាទ័យរីករាយក្រៃលែង មុនព្រះអង្គស្តេចយាងនិវត្តមកកាន់ព្រះមរម្យរាជវាំងវិញ៕