ប្រទេសកម្ពុជា ​មិន​ទាន់​ទទួលផលប៉ះពាល់ “​អវិជ្ជមាន” ពី​សង្គ្រាម​ពាណិជ្ជកម្ម ចិន-អាមេរិក ​ទេ​

848

ភ្នំពេញ៖ សង្គ្រាម​ពាណិជ្ជកម្ម​របស់​ប្រទេស​មហាអំណាច ចិន-អាមេរិក នឹង​ជះ​ផលប៉ះពាល់ជា​ “អវិជ្ជមាន” ​ចំពោះ​​ប្រទេស​ទាំងអស់ បើទោះ​ជា​ប្រទេសនោះ ​មាន​សេដ្ឋកិច្ច​តូចក្តី ធំក្តី តែ​ចំពោះ​ប្រទេសកម្ពុជា ​នៅ​ពុំ​ទាន់​ទទួលផលប៉ះពាល់​ណាមួយ ​ចេញពី​សង្គ្រាមពាណិជ្ជកម្មនេះ​នៅឡើយទេ។

នេះគឺជាការ​ថ្លែងបញ្ជាក់របស់ លោកទេសរដ្ឋមន្រ្តី អូន ព័ន្ធមុនីរ័ត្ន រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ ដែលបានធ្វើឡើងនៅ​ក្នុង​កិច្ច​ជំនួប​ជាមួយ ​គណៈប្រតិភូ​ក្រុមប្រឹក្សា​ពាណិជ្ជកម្ម​អឺរ៉ុប​-​អាស៊ាន នៅ​កាលពី​ថ្ងៃ​ទី​៣០ ខែឧសភា ឆ្នាំ២០១៩ កន្លងទៅនេះ។

លោកទេសរដ្ឋមន្រ្តី អូន ព័ន្ធមុនីរ័ត្

លោកទេសរដ្ឋមន្រ្តីបាន​ថ្លែងថា ចំពោះ​ប្រទេសកម្ពុជា ក្នុង​រយៈពេល​ខ្លី និង​មធ្យម យើង​មិន​ទាន់​ទទួល​ផលប៉ះពាល់ ​អវិជ្ជមាន ​ភ្លាមៗ កើតចេញ​ពី​សង្គ្រាម​ពាណិជ្ជកម្ម ចិន-អាមេរិក ​នេះ​នោះទេ ព្រោះថា សេដ្ឋកិច្ចប្រទេស​កម្ពុជា ទោះបីជា​សេដ្ឋកិច្ច​តូច តែ​បើកចំហ មាន​ភាព​អំណោយផល ទីផ្សារ​ផលិតផល​នាំ​ចេញ​របស់​កម្ពុជា​ចម្រុះ សម្រាប់​ទាំង​ទីផ្សារ​សហរដ្ឋអាមេរិក ក៏ដូចជា​សហភាព​អឺរ៉ុប ។

លោក​ទេសរដ្ឋមន្ត្រី អូន ព័ន្ធមុនីរ័ត្ន បានបញ្ជាក់​ថា តាម​ទិន្នន័យ​ស្ថិតិ​ចុងក្រោយ ការនាំចេញ ក៏ដូចជា វិនិយោគ​ផ្ទាល់​ពី​បរទេស​មក​កម្ពុជា នៅតែ​បន្ត​មាន​កំណើន​ល្អប្រសើរ។ ប្រការនេះ អាច​មានន័យថា សង្គ្រាម​ពាណិជ្ជកម្ម ចិន-អាមេរិក ក៏​អាច​បង្កើត​ជា​ឱកាស​សម្រាប់​ប្រទេស​កំពុង​អភិវឌ្ឍ​ដូចជា​ប្រទេសកម្ពុជា ក្នុងការ​ពង្រីក​ទីផ្សារ​នាំ​ចេញ​របស់​ខ្លួន និង​ទាញ​យក​លំហូរ​វិនិយោគ​បន្ថែមទៀតដែរ។​

​ទោះជាយ៉ាងណាក៏ដោយ ​លោកទេស​រដ្ឋមន្ត្រី​ បានបញ្ជាក់ថា ក្នុងករណី​សង្គ្រាម​ពាណិជ្ជកម្ម ចិន-អាមេរិក ​នៅ​តែ​អូសបន្លាយ​រយៈពេល​វែងនោះ ប្រទែសកម្ពុជា ​អាច​នឹង​ប្រឈម​ផលប៉ះពាល់​ អវិជ្ជមាន ដូចជា ការថយចុះ​នៃ​លំហូរ​ភ្ញៀវ​ទេសចរ​អន្តរជាតិ និង​លំហូរ​ទុនវិនិយោគ​បរទេស ដែល​បណ្តាល​មក​ពី​កំណើន​យឺត នៃ​សេដ្ឋកិច្ច​សកលលោក។

​លោក​ទេសរដ្ឋមន្ត្រី បានបន្ថែមទៀត​ថា ក្នុង​វេទិកា​ផ្នែក​ឯកជន និង​រដ្ឋាភិបាល​លើ​ក​ទី​១៨ នា​ពេល​ថ្មីៗ​នេះ សម្ដេចតេជោ ហ៊ុន សែន នាយក​រដ្ឋមន្ត្រីកម្ពុជា ក៏​បាន​ដាក់ចេញ​នូវ​វិធានការ​មុត​ស្រួច​ជា​កញ្ចប់​មួយចំនួន ក្នុង​គោលដៅ​បង្កើន​ភាព​ប្រកួតប្រជែង​របស់​កម្ពុជា ក៏ដូចជា ដើម្បី​ទាក់ទាញ​ការវិនិយោគ​ពី​បរទេស​បន្ថែមទៀត ដែល​ក្នុងនោះរួមមាន ការលើកកម្ពស់​កិច្ច​សម្រួល​ពាណិជ្ជកម្ម​, ការកាត់បន្ថយ​ថ្លៃ​អគ្គិសនី​, ការ​បន្ត​កសាង​ហេដ្ឋារចនាសម្ព័ន្ធ​រូប​វ័ន្ត និង​ការបន្ត​កំណែទម្រង់​ស្ថាប័ន​ជា​ដើម៕