កីឡាករ ចាន់ វឌ្ឍនាកា ចូលរួម​ជាមួយ​ក្លឹប​កំពូល​មួយ របស់​ម៉ាឡេស៊ី ក្នុងតម្លៃ​ខ្លួន​មិនត្រូវ​បាន​គេ​ដឹង​

1022

​ភ្នំពេញ​៖ កីឡាករ​ខ្សែ​ប្រយុទ្ធ​ល្បីឈ្មោះ​របស់​កម្ពុជា​​ លោក ចាន់ វឌ្ឍនាកា បាន​ចាក​ចេញពី​កម្ពុ​ជា ដើម្បី​ទៅ​ប្រកប​អាជីព​ក្រៅ​ស្រុក ជាមួយ​ក្លឹប PKNP FC ជាលី​គ​កំពូល​មួយ​របស់​ម៉ាឡេស៊ី​ ក្នុងតម្លៃ​ខ្លួន​បិទ​ជិត នៅ​ថ្ងៃ​ព្រហស្បតិ៍​ទី​១៧ ខែមករា ឆ្នាំ​២០១៩នេះ​។​

​នេះ​ជា​លើក​ទី​៣​ផងដែរ ដែល​កីឡាករ​ជំនាញ​ជើងឆ្វេង មកពី​ខេត្តកំពត ទៅ​ប្រកប​អាជីព​បាល់ទាត់​នៅក្រៅ​ស្រុក បើគិត​ចាប់តាំងពី​ឆ្នាំ​២០១៧មក។ លើកទី១ ចូលរួមជាមួយ​ក្លឹប Fujieda MYFC លេង​ក្នុង​លី​គ​ទី​៣ របស់​ជប៉ុន និង​លើកទី២ ក្នុងឆ្នាំ​២០១៨ ទៅលេងឲ្យ​ក្លឹប Pahang FA លេង​ក្នុង​លី​គ​កំពូល​ម៉ាឡេស៊ី និង​ដើមឆ្នាំ​២០១៩​នេះ ផ្លាស់​ចេញពី​ក្លឹប​បឹងកេត​អែ​ហ្វ​ស៊ី ទៅលេង​ឲ្យ​ក្លឹប PKNP FC ដែលជា​អតីត​ក្លឹប​ចាស់​របស់​មិត្ត​រួម​ជាតិ ប្រាក់ មុនី​ឧ​ត្ត​ម កាល​ឆ្នាំ​២០១៨​។​

​យ៉ាងណាមិញ កីឡាករ​ដែលមាន​វ័យ​ទើបតែ​ជាង​២០​ឆ្នាំ ចាន់ វឌ្ឍនាកា ក៏​នឹងត្រូវ​ប្រជែង​ជាមួយ ធា​រី ចន្ថា​ប៊ី​ន ដែល​កំពុង​លេង​ឲ្យ​ក្លឹប Teerenganu FC ក្នុង​ក្របខណ្ឌ Malaysia-Super League ដែរនោះ​ក្នុង​រដូវ​កាល​ឆ្នាំ​២០១៩ ខាងមុខនេះ​។​

​ការចេញ​ទៅលេង​ឲ្យ​ក្លឹប​កំពូល​របស់​ម៉ាឡេស៊ី​នា​ព្រឹក​មិញ​នេះ បាន​កើតមានឡើង ក្រោយ​ពេលដែល ចាន់ វឌ្ឍនាកា បាន​ចុះ​កុងត្រា​ថ្មី​ជាមួយ​ក្លឹប​នេះ​កាលពី​ថ្ងៃទី​១៥ ខែមករា ឆ្នាំ​២០១៩​កន្លង ទៅ​ថ្មីៗ​។​

​សូមបញ្ជាក់ថា ក្លឹប​ថ្មី​នេះ​ឈ្មោះ PKNS ទទួលបាន​លេខ​៣ កាលពី​រដូវ​កាល​មុន ខណៈដែល​ក្លឹប​មុន​ឈ្មោះ Pahang បាន​លេខ​៤​។ សម្រាប់​កីឡាករ ចាន់ វឌ្ឍនាកា ក៏ត្រូវ​បាន​ឪពុក​របស់ខ្លួន លោក ចាន់ ចេស្តា បច្ចុប្បន្ន​ជា​អនុរដ្ឋលេខាធិការ​ក្រសួងកសិកម្ម ក៏បាន​រាយការណ៍​ជូន និង​សុំ​យោ​ប់ណែ​នាំ​ពី​លោក ហ៊ុន ម៉ា​នី ក្នុងនាម​ជា​ប្រធាន​សហភាព​សហព័ន្ធ​យុវជន​កម្ពុជា អំពី​ការជ្រើសរើស​ក្លឹប​ដែល​ត្រូវ​ទៅលេង​។ ក្នុងនោះ​រួមមាន ក្លឹប​ខេត្ត​ឈៀង​រ៉ៃ ប្រទេស​ថៃ​ផងដែរ​។​

​បើតាម​កីឡាករ ចាន់ វឌ្ឍនាកា ក្លឹប​នៅ​ប្រទេស​ម៉ាឡេស៊ី ទទួលបាន​ប្រាក់កំរៃ​ខ្ពស់ជាង​ថៃ ប្រហែល​ពីរដង និង​មាន​លក្ខខណ្ឌ​ងាយស្រួល​ច្រើនជាង​ផងដែរ​៕