ចិន ​ចាត់ទុក​​ កម្ពុជា ជា​បងប្អូន​ដែលមាន​មិត្ត​ភាពជា​ដែកថែប​

2332

លោកនាយ​ឧ​ត្ត​ម​សេនីយ៍ ហាន វេ​ហ្គូ (HAN WEIGUO) មេបញ្ជាកា​កងទ័ពជើងគោក នៃ​កងទ័ព​រំដោះប្រជាជន​ចិន​បាន​លើកឡើងថា ប្រទេស​កម្ពុជា និង​ប្រទេស​ចិន ជា​បងប្អូន​ដែលមាន​មិត្ត​ភាពជា​ដែកថែប នៅក្នុង​ជំនួប​ជាមួយ លោក​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត អគ្គ​មេបញ្ជាការរង នៃ​កងយោធពល​ខេមរភូមិន្ទ មេបញ្ជាការ​កងទ័ពជើងគោក នៃ​ដំណើរ​ទស្សនកិច្ច​ផ្លូវការ នៅ​សាធារណរដ្ឋ​ប្រជាមានិត​ចិន​រយៈពេល​៥​ថ្ងៃ ចាប់ពី​ថ្ងៃទី​២៥ ខែកុម្ភៈ ដល់​ថ្ងៃទី​០១ ខែ​មិនា ឆ្នាំ​២០១៩​។​

មេបញ្ជាកា​កងទ័ពជើងគោក នៃ​កងទ័ព​រំដោះប្រជាជន​ចិន សង្ឃឹមថា​ប្រទេស​ទាំងពីរ​ចិន​-​កម្ពុជា នឹង​បន្ត​ពង្រឹង ពង្រីក ទំនាក់ទំនង និង​កិច្ចសហប្រតិបត្តិការ​ឲ្យ​កាន់តែ​រឹងមាំ​ថែមទៀត ក្រោម​យុទ្ធសាស្ត្រ​ចង្អុល​ទិស​របស់ ប្រធានាធិបតី ស៊ី ជីន​ពីង និង​សម្ដេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា ធ្វើយ៉ាងណា​ដើម្បី​អភិវឌ្ឍន៍​កិច្ចសហប្រតិបត្តិការ​គ្រប់​ជ្រុងជ្រោយ នៃ​ប្រទេស​ទាំងពីរ​។​

ជាមួយគ្នានេះ ឧ​ត្ត​ម​សេនីយ៍​ឯក ហ៊ុន ម៉ា​ណែ​ត បាន​ថ្លែងអំណរគុណ​យ៉ាង​ជ្រាលជ្រៅ ចំពោះ​មេបញ្ជាការ​កងទ័ពជើងគោក​នៃ​កងទ័ព​រំដោះប្រជាជន​ចិន ដែល​បានទទួល​ស្វាគមន៍​យ៉ាង​កក់ក្តៅ ចំពោះ​គណៈប្រតិភូ​កងទ័ពជើងគោក​កម្ពុជា​។ លោក​ឧ​ត្ត​ម​សេនីយ៍​ឯក បាន​បន្តថា កិច្ចពិភាក្សា​នេះ គឺជា​ការរក្សា​ការពង្រឹង ពង្រីក​ចំណងមិត្តភាព និង​កិច្ចសហប្រតិបត្តិការ​នៃ​កងទ័ព​ប្រទេស​ទាំងពីរ​កម្ពុជា​-​ចិន​។​

មេបញ្ជាការ​កងទ័ពជើងគោក​កម្ពុជា ក៏បាន​ថ្លែងអំណរគុណ​យ៉ាង​ចំពោះ​រដ្ឋាភិបាល កងទ័ព និង​ប្រជាជន​ចិន ដែល​បាន​ចូលរួម​គាំទ្រ​យ៉ាងសកម្ម នៅក្នុង​ដំណើរ​ការកសាង និង​អភិវឌ្ឍន៍​លើ​គ្រប់​វិស័យ​នៅក្នុង​ប្រទេស​កម្ពុជា​។

​បន្ថែម​ពីនេះ ឧ​ត្ត​ម​សេនីយ៍​ឯក ហ៊ុន ម៉ា​ណែ​ត បានស្នើ​សុំ​ឲ្យ​ភាគី​ចិន​បន្ត​គាំទ្រ និង​សហប្រតិបត្តិការ​លើ​គ្រប់​វិស័យ នៃ​ប្រទេស​ទាំងពីរ សំដៅ​ធ្វើយ៉ាងណា​អនុវត្ត​កិច្ចប្រតិបត្តិការ ជា​យុទ្ធសាស្ត្រ​គ្រប់​ជ្រុងជ្រោយ និង​ដ៏​រឹងមាំ​នៃ​ប្រទេស​ទាំងពីរ​កម្ពុជា​-​ចិន​។​

​សូមជម្រាបថា នៅក្នុង​ដំណើរ​បំពេញ​ទស្សនកិច្ច និង​ស្នាក់នៅ ក្នុង​សាធារណរដ្ឋ​ប្រជាមានិត​ចិន​នាឱកាស​នោះ ភាគី​កម្ពុជា នឹង​ជួប​សម្ដែង​ការគួរសម និង​ពិភាក្សា​ការងារ​ជាមួយ​ថ្នាក់ដឹកនាំ​ជាន់ខ្ពស់ នៃ​កងទ័ព​រំដោះប្រជាជន​ចិន​រួមមាន​៖ សមាជិក​ក្រុមប្រឹក្សារដ្ឋ និង​ជា​រដ្ឋមន្ត្រី​ក្រសួងការពារជាតិ នៃ​សាធារណរដ្ឋ​ប្រជាមានិត​ចិន​, អនុប្រធាន​គណៈកម្មកា​រ​យោធា​ម​ជ្ឈឹ​ម នៃ​កងទ័ព​រំដោះប្រជាជន​ចិន​, មេបញ្ជាការ​កងទ័ពជើងគោក នៃ​កងទ័ព​រំដោះប្រជាជន​ចិន និង​ថ្នាក់ដឹកនាំ​សំខាន់ៗ ជាច្រើនរូប​ទៀត​៕​