កម្ពុជា​បាន​នាំចេញ​បន្លែស្រស់ ទៅកាន់​ទីផ្សារ​សហភាព​អឺរ៉ុប​បាន​ជាង​៣៣​តោន​

2579

ភ្នំពេញ៖ នៅក្នុង​វេទិកាសាធារណៈ ស្តីពី​វិស័យ​កសិកម្ម រុក្ខាប្រមាញ់ និង​នេសាទ រៀបចំឡើង​នៅ​ទីស្តីការក្រសួង​ថ្ងៃទី​២៦ ខែកុម្ភៈ​នេះ លោក វេ​ង សាខុន រដ្ឋមន្ត្រី​ក្រសួងកសិកម្ម បាន​បញ្ជាក់ថា ថ្មីៗ​នេះ​កម្ពុជា​បាន​នាំចេញ​បន្លែស្រស់ ទៅកាន់​ទីផ្សារ​សហភាព​អឺរ៉ុប​បាន​ជាង​៣៣​តោន ដែល​នេះ​ជា​មោទនភាព នៃ​ការសម្រេចបាន​នូវ​គោលនយោបាយ របស់​រាជរដ្ឋាភិបាល​ក៏ដូចជា​របស់​ក្រសួង ក្នុងការ​ជំរុញ​កំណើន​ផលិតកម្ម​កសិកម្ម​ក្នុងស្រុក ជំរុញ​ការនាំចេញ​លើកកម្ពស់​សក្តានុពល ក្នុងការ​ប្រកួតប្រជែង​ទីផ្សារ​ទាំង​ក្នុង និង​ក្រៅប្រទេស​។​

គួរ​រម្លឹក​ផងដែរ​ថា នៅ​ឆ្នាំ​២០១៨​កន្លងទៅ កម្ពុជា​បាន​នាំចេញ​ចេកអំបូង​លឿង​ជាង​១​ម៉ឺន​តោន និង​ស្វាយ​កែ​រមៀត​ប្រមាណ​ជាង​១​ម៉ឺន​តោន ទៅកាន់​ទីផ្សារ​អន្តរជាតិ​។ សម្រាប់​ដំណាំ​ស្រូវ​វិញ កម្ពុជា​បាន​ផលិត​ស្រូវ​បាន ១០.៨​លាន​តោន ហើយ​បានធ្វើ​ការនាំចេញ​អង្ករ​បាន ៦២៦​ពាន់​តោន​។​

លោក វេ​ង សាខុន រដ្ឋមន្ត្រី​ក្រសួងកសិកម្

​លោក​រដ្ឋមន្ត្រី វេ​ង សាខុន បាន​បញ្ជាក់ថា ក្រសួង​បាន និង​កំពុង​បន្ត​ផ្សព្វផ្សាយ​ពូជ​ដំណាំ មាន​ផលិតភាព​ខ្ពស់​ធន់​ទ្រាំ​នឹង​ការប្រែប្រួល​អាកាសធាតុ ឆ្លើយតប​តាម​តម្រូវការ​ទីផ្សារ ព្រមទាំង​ការអនុវត្ត​បច្ចេកវិទ្យា​សមស្រប ការអនុវត្ត​កសិកម្ម​ល្អ (GAP) ការអនុវត្ត​ចិញ្ចឹមសត្វ​ល្អ ការ​បង្កាត់​ពូជ​សិប្បនិម្មិត ការអនុវត្ត​វារីវប្បកម្ម​ល្អ នៅក្នុង​ខ្សែ​ច្រវាក់​ផលិតកម្ម​កសិកម្ម ដែលជា​ធាតុ​ចូល​ប្រកបដោយ​សក្ដានុពល​សម្រាប់ លើកកម្ពស់​ការនាំចេញ​។​

​ទន្ទឹមនឹង​នេះដែរ នៅក្នុង​វិស័យ​កសិកម្ម លោក​រដ្ឋមន្ត្រី​បានលើកឡើង​ពី​បញ្ហា​ប្រឈម​មួយចំនួន​ដូចជា​៖

  • ​ផលិតភាព​នៅមានកម្រិត​ទាប​ទាំង​បរិមាណ និង​គុណភាព​
  • ការអភិវឌ្ឍ​ខ្សែ​ច្រវាក់​ផ្គត់ផ្គង់​កសិផល​មិនទាន់​ឆ្លើយតប​នឹង​តម្រូវការ​ទីផ្សារ
  • ​យន្តការ​សម្រួល​ការនាំ​ចេញ​នៅ​មិនទាន់មាន​ភាព​ប្រទាក់ក្រឡា​
  • ការផ្សព្វផ្សាយ​បច្ចេកទេស​ថ្មីៗ​ទៅដល់​កសិករ និង​សហគមន៍​ដែល​នៅ​ឆ្ងាយ​នៅមានកម្រិត
  • ​កង្វះ​យន្តការ​ផ្សារភ្ជាប់​ទីផ្សារ​ជាមួយនឹង​ផែន​ការដាំដុះ និង​ប្រមូល​ផល
  • ​ប្រព័ន្ធ​អនាម័យ និង​ភូតគាម​អនាម័យ​នៅ​មិនទាន់​រឹងមាំ
  • ​កង្វះ​យន្តការ​ផ្តល់ព័ត៌មាន​ទី​ផ្សារ
  • ​កង្វះ​ផែន​ការដាំដុះ
  • ​ការកំណត់​តំបន់​ដាំ​ដុះ​ឱ្យ​ត្រូវ​តាម​សក្តានុពល​ដី
  • ​កង្វះ​ហេដ្ឋារចនាសម្ព័ន្ធ តម្លៃ​អគ្គិសនី ប្រព័ន្ធ​ស្រោចស្រព​នៅ​ពុំទាន់​បាន​គ្របដណ្តប់​លើ​ផ្ទៃដី​ដាំ​ដុះ
  • ​ការដាំដុះ​នៅមាន​ការពឹង​ពាក់​លើទឹក​ភ្លៀង​។​ល​។

​ភ្ជាប់​ជាមួយ​បញ្ហា​ទាំងអស់នេះ លោក​រដ្ឋមន្ត្រី​បាន​បញ្ជាក់ថា ក្រសួង​បាន និង​កំពុង​ខិតខំ​ប្រឹងប្រែង​ដោះស្រាយ​បញ្ហា​ប្រឈម​ទាំងអស់នេះ ជា​បន្តបន្ទាប់ ជំហានៗ​ជាមួយ​អន្តរ​ស្ថាប័ន​ពាក់ព័ន្ធ ដៃគូ​អភិវឌ្ឍ​សហគមន៍ វិស័យ​ឯកជន ហើយ​លោក​ស្នើសុំ​ភាគី​គ្រប់​ពាក់ព័ន្ធ​បន្ត​សហការ​ឲ្យ​បាន​ពេញលេញ ចូលរួម​រិះរក​វិធានការ ឬ​មធ្យោបាយ គ្រប់បែបយ៉ាង ដើម្បី​ជំរុញ​ការអភិវឌ្ឍ​វិស័យ​កសិកម្ម​កម្ពុជា ឲ្យ​មានការ​រីកចម្រើន​ឡើង​ថែមទៀត​៕​