តើ កិច្ចព្រមព្រៀង​លុបបំបាត់ ការយកពន្ធ​ត្រួតគ្នា​រវាង កម្ពុជា​-​ម៉ាឡេស៊ី ផ្តល់​អត្ថប្រយោជន៍​អ្វីខ្លះ​?

2223

ភ្នំពេញ​៖ អគ្គនាយកដ្ឋាន​ពន្ធដា​រ នៃ​ក្រសួង​សេដ្ឋកិច្ច​និង​ហិរញ្ញវត្ថុ បានចេញ​សេចក្តីប្រកាស​ព័ត៌មាន កាលពី​ថ្ងៃទី​០៣ ខែកញ្ញា ឆ្នាំ​២០១៩ បញ្ជាក់​ប្រាប់ថា ការចុះហត្ថលេខា​លើ​កិច្ចព្រមព្រៀង រវាង​រាជរដ្ឋាភិបាល​នៃ​កម្ពុជា និង​រដ្ឋាភិបាល​នៃ​ម៉ាឡេស៊ី ស្តីពី​ការលុបបំបាត់​ការយកពន្ធ​ត្រួតគ្នា ពាក់ព័ន្ធ​នឹង​ពន្ធ​លើ​ប្រាក់ចំណូល និង​ការបង្ការ​ការ​គេចវេះ​ពន្ធ និង​ការចៀសវាង​ពន្ធ ផ្តល់​អត្ថប្រយោជន៍​ជាច្រើន​ដល់​ប្រទេស​ហត្ថលេខី​ទាំង​២​។​

​តើ​មាន​អត្ថប្រយោជន៍​អ្វីខ្លះ​?

​អគ្គនាយកដ្ឋាន​ពន្ធដា​រ បាន​ប្រាប់ថា កិច្ចព្រមព្រៀង​នេះ​ផ្តល់​អត្ថប្រយោជន៍​ដល់​ភាគី​ហត្ថលេខី លើ​កិច្ច​ការពង្រឹង​កិច្ចសហប្រតិបត្តិការ​ទ្វេភាគី ធ្វើឱ្យ​ប្រាកដប្រជា​ក្នុងការ​កំណត់​សិទ្ធិ​នៃ​ការយកពន្ធ​, កំណើន​មូលដ្ឋាន​គិត​ពន្ធ​តាមរយៈ​ការទាក់ទាញ​វិនិយោគ​ដោយផ្ទាល់​, លំហូរ​មូលធន​, ការផ្ទេរ​បច្ចេកវិទ្យា​និង​ជំនាញ​ពី​បរទេស​, ការការពារ​និវាស​ន​ជន​ពី​ប្រព្រឹត្ត​កម្ម​មិន​ត្រឹមត្រូវ​ពាក់ព័ន្ធ​នឹង​ពន្ធ​, និង​ការការពារ​ចំណូល​ពន្ធ​ក្នុងស្រុក​តាមរយៈ​កិច្ចសហប្រតិបត្តិការ​ប្រយុទ្ធ​ប្រឆាំងនឹង​ការ​គេចវេះ​ពន្ធ រវាង​ប្រទេស​ទាំងពីរ​។​

កិច្ចព្រមព្រៀងស្ដីពីការលុបបំបាត់យកពន្ធត្រួតស៊ីគ្នា លើកលែងពន្ធលើប្រាក់ចំណូល និង ការបង្ការការគេចវេះពន្ធ និងការចៀសវាងពន្ធ ត្រូវបានចុះហត្ថលេខាដោយលោក អូនព័ន្ធ មុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក សៃហ្វូឌីន អាប់ឌុលឡា រដ្ឋមន្ត្រីការបរទេសម៉ាឡេស៊ី កាលពីថ្ងៃទី៣ ខែកញ្ញា ឆ្នាំ២០១៩ កន្លងទៅនេះ។

​មិនមែន​មានតែ ប្រទេសម៉ាឡេស៊ី​ទេ កម្ពុជា ក៏​បាននិងកំពុង​ធ្វើការ​ចរចា លើ​កិច្ចព្រមព្រៀង​ស្តីពី​ការចៀសវាង​ការយកពន្ធ​ត្រួតគ្នា និង​ការបង្ការ​ការ​កិបកេង​បន្លំ​ពន្ធ​ពាក់ព័ន្ធ នឹង​ពន្ធ​លើ​ប្រាក់ចំណូល ជាមួយ​បណ្តា​ប្រទេស​ដៃគូ​មួយចំនួនទៀត​ដូចជា ហ្វីលីពីន​, កូរ៉េ​, ជប៉ុន​, តួ​ក​គី​, និង​តំបន់​រដ្ឋបាល​ពិសេស​ម៉ា​កាវ នៃ​សាធារណរដ្ឋ​ប្រជាមានិត​ចិន ជាដើម​៕