ភ្នំពេញ៖ ការហូរចូលនូវចំនួនវិនិយោគ មកពីប្រទេសចិន និងភ្ញៀវទេសចរចិន គឺកើតមានឡើងនៅគ្រប់ប្រទេស និងតំបន់នៅក្នុងពិភពលោក គឺមានលក្ខណៈជាសកល ហើយវាតែងតែផ្ដល់ផលល្អ និងផលអាក្រក់។ នេះគឺជាការលើកឡើងរបស់ លោក វង្សី វិស្សុត រដ្ឋលេខាធិការប្រចាំការ ក្រសួងសេដ្ឋកិច្ច និងហិរញ្ញវត្ថុ នៅក្នុងវេទិកាសាធារណៈ ស្តីពីការគ្រប់គ្រងម៉ាក្រូសេដ្ឋកិច្ច និងថវិកាឆ្នាំ២០១៩ នៅក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១៥ ខែមករា ឆ្នាំ២០១៩នេះ។
![](http://cambodianews.today/wp-content/uploads/2019/01/fn-2019-01-15-18-27-04-1-1024x768.jpg)
ក្តីបារម្ភមួយចំនួន ត្រូវបានមហាជនលើកយកមកធ្វើជាប្រធានបទក្ដៅ ក្នុងការពិភាក្សាគ្នា ដោយសារតែមានការកើតឡើងនូវករណីបទល្មើស ដែលបង្កឡើងដោយជនជាតិចិន ឬពាក់ព័ន្ធជាមួយជនជាតិចិន កាន់តែច្រើនឡើងៗ ស្របពេលមានវិនិយោគិនចិន និងជនជាតិចិន ចូលមកច្រើនឡើងៗនោះ។
ទាក់ទងទៅនឹងចំនុចនេះ លោក វង្សី វិស្សុត លើកឡើងថា លំហូរនៃសាកលភាវូបនីយកម្ម វាតែងតែមានចំណុចល្អ និងចំណុចអាក្រក់។ ដូចគ្នានេះដែរ ចំពោះលំហូរជនជាតិចិន ទៅប្រទេសនានាលើសកលលោក ក៏មានចំណុចល្អ និងចំណុចអាក្រក់ដូចគ្នា ដូច្នេះត្រូវចេះប្រើប្រាស់ច្បាប់ ដើម្បីគ្រប់គ្រង។
![](http://cambodianews.today/wp-content/uploads/2019/01/phnom-penh-city-1-1.jpg)
លោកបន្តថា «យើងទៅប៉ារីសមើល សណ្ឋាគារ ភោជនីយដ្ឋានសុទ្ធតែចេះនិយាយចិន អ្នកលក់ហាងប្រេនដ៍ សុទ្ធតែនិយាយចិនទាំងអស់ សុទ្ធតែមុខចិនទាំងអស់ អត់មានមុខបារាំងទេឥឡូវ។ អ្នកជេរចិននោះ តាមពិតគាត់ចង់បានចិនទៅស្រុកគាត់វិនិយោគក្តី ទេសចចរណ៍ក្តី….ប្រទេសយើង ខ្ញុំថាត្រូវចេះប្រើប្រាស់ គ្រប់គ្រងលំហូរចិន បើចេះគ្រប់គ្រងចិនមកអត់ឈប់ទេ ប្រទេសនោះមានសល់ធនធានច្រើន»។