តួនាទី​កាំកុងត្រូល​នៅ​ច្រកទ្វារព្រំដែន នឹងត្រូវ​ផ្ទេរ​ទៅ​ឲ្យ​គយ ទទួលខុសត្រូវ​វិញ ដែល​នឹង​ជួយ​ដល់​អ្នករកស៊ី​

898

ភ្នំពេញ​៖ មានតែ​ប្រទេស​កម្ពុជា​មួយគត់ ដែលមាន​មន្ត្រី​កាំកុងត្រូល​នៅតាម​ព្រំដែន ខុសពី​ប្រទេស​គេ​ផ្សេងៗ​ទៀត ហើយ​បើសិនជា ដក​កាំកុងត្រូល​ចេញពី​ច្រកទ្វារព្រំដែន ទុក​ឲ្យ​គយ​ជា​អ្នកគ្រប់គ្រង​វិញ វា​អាចជួយ​កាត់បន្ថយ​ការចំណាយ​របស់​រាជរ​ដ្ឋា​ភិ​បាល ដើម្បី​យកទៅ​ផ្គត់​ផ្គង​លើ​ចំណាយ​ផ្សេងៗ​វិញ​។ នេះ​គឺជា​ការលើកឡើង​របស់ លោក វ​ង្សី វិស្សុត រដ្ឋលេខាធិការ​ប្រចាំការ ក្រសួង​សេដ្ឋកិច្ច និង​ហិរញ្ញវត្ថុ នៅក្នុង​វេទិកាសាធារណៈ ស្តីពី​ការគ្រប់គ្រង​ម៉ាក្រូសេដ្ឋកិច្ច និង​ថវិកា​ឆ្នាំ​២០១៩ នៅ​ក្រសួង​សេដ្ឋកិច្ច និង​ហិរញ្ញវត្ថុ នា​ព្រឹក​ថ្ងៃទី​១៥ ខែមករា ឆ្នាំ​២០១៩​កន្លងទៅនេះ​។​

​លោក វ​ង្សី វិស្សុត បន្តថា ការដក​ស្ថាប័ន​កាំកុងត្រូល​នៅតាម​ព្រំដែន វា​មិនមែន​មានន័យថា បាត់​មុខងារ​ទាំងអស់​នោះទេ គឺ​គេ​ផ្ទេរ​វា​ឲ្យ​គយ ហើយ​គយ​អាច​មើល​ទាំងអស់​បាន​ដូចគ្នា​។

​សព្វថ្ងៃនេះ កម្ពុជា​យើង គឺ​ប្លែក​ពី​គេ​ខ្លាំងណាស់ រឿង​កាំកុងត្រូល​នោះ គឺ​មានតែ​ប្រទេស​យើង​មួយ​ទេ នៅ​ច្រកទ្វារព្រំដែន​។ បើ​គ្មាន​កាំកុងត្រូល​ទេ គឺ​វា​ល្អ​ទៅវិញ​ទេ ហើយ​ជួយ​ឲ្យ​អ្នករកស៊ី ឈប់​ចាយលុយ​នឹង​ទៀត យកលុយ​នោះ​ទុក​មក​បង់​របប​សោធន បង់​របប​សុខភាព​របស់​កម្មករ​វិញ គឺ​វា​ល្អ​។​…​ចំពោះ​រឿង​ព្រំដែន​ដែល​ទុក​ឲ្យ​តែ​មន្ត្រី​គយ និង​ប៉ូលិសអន្តោប្រវេសន៍ គឺ​ត្រឹមត្រូវ​ហើយ ជាការ​កសាង កែលម្អរ បរិយាកាស​វិនិយោគ និង​ធុរកិច្ច​។​

​ក្រសួង​សេដ្ឋកិច្ច និង​ហិរញ្ញវត្ថុ កំពុង​រៀបចំ​អនុក្រឹត្យ ដើម្បី​ដាក់ចេញ​នៅពេល​ឆាប់ៗ​ខាងមុខនេះ ពាក់ព័ន្ធ​នឹង​ការ​ទុក​តែ​ស្ថាប័ន​ចំនួន ២ នៅតាម​ច្រកទ្វារព្រំដែន គឺមាន​ស្ថាប័នគយ និង​ប៉ូលិសអន្តោប្រវេសន៍​។​

គួរ​រំ​ម្លឹ​ក​ផងដែរ​ថា ក្នុង​កម្មវិធី​ជួប​សំណេះសំណាល ជាមួយ​អ្នកសារព័ត៌មាន ប្រមាណ​ជាង​៥​ពាន់​នាក់ នៅ​មជ្ឈមណ្ឌល​សន្និបាត និង​ពិ​ពរ​ណ៌​កោះ​ពេជ្រ នាពេល​ថ្មីៗ​នេះ សម្ដេច​តេ​ជោ ហ៊ុន សែន បាន​បញ្ជា​ឲ្យ​ទុក​តែ​២​ស្ថាប័ន​ប៉ុណ្ណោះ គឺ​ស្ថាប័នគយ និង​នគរបាល​អន្ដោប្រវេសន៍ នៅតាម​ច្រកទ្វារព្រំដែន ហើយ​ក្រៅពី​ស្ថាប័ន​ពីរ​នេះ ត្រូវ​ដក​ចោល​ទាំងអស់​។​
​ពាក់ព័ន្ធ​នឹង​ការ​អនុវត្ដ​ការងារ​នេះ ក៏មាន​ការគាំទ្រ​ពី​សំណាក់​អ្នក​នាំចេញ នាំចូល​ដែល​កំពុងតែ​ប្រកប​របរ​រកស៊ី​នៅ​កម្ពុជា ថា​បាន​ជួយ​សំរួល​ដល់​ការធ្វើ​ធុរកិច្ច និង​កាត់បន្ថយ​ការចំណាយ រួមទាំង​ពេលវេលា​ផងដែរ​៕