កម្ពុជា នាំ​អង្ករ ទៅ​សហភាព​អឺរ៉ុប នឹងត្រូវ​ជាប់ពន្ធ​គយ ចាប់ពី​ថ្ងៃទី​១៨​មករា​នេះ​តទៅ​

1108

ភ្នំពេញៈ គណៈកម្មការ​អឺរ៉ុប បានសម្រេច​ជា​ផ្លូវការ ក្នុង​ការយក​ពន្ធគយ ទៅលើ​ការ​នាំចូល​អង្ករ ពី​ប្រទេស​កម្ពុជា និង​ប្រទេស​មី​យ៉ាន់​ម៉ា ដោយ​វិធានការ​នេះ នឹងត្រូវ​អនុវត្ត​សន្សឹមៗ ក្នុង​រយៈពេល ៣ ឆ្នាំ បន្ទាប់ពី​មានការ​រកឃើញថា របស់​ប្រទេស​ទាំង​២​នេះ ប៉ះពាល់​ដល់​ប្រទេស​ផលិត​អង្ករ នៅក្នុង​សហភាព​អឺរ៉ុប​។ នេះ​បើ​យោងតាម​សេចក្តីប្រកាស​ព័ត៌មាន របស់​គណៈកម្មការ​អឺរ៉ុប បង្ហោះ​នៅលើ​គេហទំព័រ​ផ្លូវការ​របស់ខ្លួន​។​

​សេចក្តីប្រកាស​ព័ត៌មាន​របស់​គណៈកម្មកា​រ​អឺរ៉ុប បាន​បន្តទៀតថា គិត​ចាប់ពី​ថ្ងៃទី ១៨ ខែមករា​នេះ​តទៅ សហភាព​អឺរ៉ុប​ធ្វើការ​ដកហូត​ពន្ធគយ ឡើងវិញ​លើ​ការ​នាំចូល​អង្ករ មកពី​ប្រទេស​កម្ពុជា និង​ប្រទេស​មី​យ៉ាន់​ម៉ា ដោយ​ក្នុង​នៅក្នុង​ឆ្នាំ​ទី ១ ធ្វើការ​យកពន្ធ​ចំនួន ១៧៥ អឺរ៉ូ (​ប្រហែល ២០០ ដុល្លារ​) ក្នុង​មួយ​តោន​អង្ករ​, ឆ្នាំ​ទី​២ ចំនួន ១៥០ អឺរ៉ូ (​ប្រហែល ១៧០​ដុល្លារ​) ក្នុង​មួយ​តោន​អង្ករ​, នៅ​ឆ្នាំ​ទី​៣ ចំនួន ១២៥ អឺរ៉ូ (​ប្រហែល ១៤៥​ដុល្លារ​) ក្នុង​មួយ​តោន​អង្ករ​។​

សេចក្តីសម្រេច​នេះ​កើតមានឡើង បន្ទាប់ពី​ការស៊ើបអង្កេត​មួយ ត្រូវបាន​ធ្វើឡើង​កាលពី​ឆ្នាំមុន បន្ទាប់ពី​មាន​សំណើ​ពី​រដ្ឋាភិបាល​អ៉ី​តា​លី និង​មានការ​គាំទ្រ​ពី​ប្រទេស​ផលិត​អង្ករ​ផ្សេងទៀត ដូចជា អេ​ស្ប៉ា​ញ បារាំង ព័រទុយហ្កាល ក្រិច ហុង​គ្រី រ៉ូ​ម៉ា​នី និង​ប៊ុល​ហ្ការី ដោយសារតែ​គេ​បាន​រកឃើញថា ការ​នាំចូល​អង្ករ​ពី​ប្រទេស​កម្ពុជា និង​ប្រទេស​មី​យ៉ាន់​ម៉ា បាន​ប៉ះពាល់​ដល់​ប្រទេស​ផលិត​អង្ករ នៅ​សហភាព​អឺរ៉ុប​៕