គ្រាប់បែក​កែច្នៃ បាន​ផ្ទុះឡើង​នៅ​ភាគ​កណ្ដាល​ទីក្រុង​បាងកក កន្លែង​រៀបចំ​កិច្ចប្រជុំ​រដ្ឋមន្ត្រីការបរទេស​អាស៊ាន​

362

យ៉ាងហោចណាស់​មាន គ្រាប់បែក​កែច្នៃ បាន​ផ្ទុះឡើង​នៅ ០៣ ទីតាំង​ផ្សេងគ្នា ក្នុង​ទីក្រុង​បាងកក នៅ​ព្រឹក​ថ្ងៃ​សុក្រ​ទី​២ ខែសីហា នេះ ដែល​បាន​បណ្ដាល​ឲ្យ មនុស្ស ៣​នាក់ បាន​រងរបួស​ស្រាល​។​

​យោងតាម​ប្រព័ន្ធ​ផ្សព្វផ្សាយ​ក្នុងប្រទេស​ថៃ​ផ្ទាល់ ហេតុការណ៍​ខាងលើនេះ បានកើត​ឡើង នៅ​តំបន់​ភាគ​កណ្តាល​នៃ​ទីក្រុង​បាងកក ដែលជា​ជាទី​កន្លែង កំពុង​ទទួល​រៀបចំ​កិច្ចប្រជុំ​រដ្ឋមន្ត្រីការបរទេស មកពី​បណ្តា​ប្រទេស​ក្នុង​សមាគម​អាស៊ាន និង​មកពី​បណ្តា​ប្រទេស​មហាអំណាច រួមមាន​សហរដ្ឋអាមេរិក ចិន និង​រុស្ស៊ី​។​

​អាជ្ញាធរ​ថៃ​កំពុងបើក​ការស៊ើបអង្កេត ចំពោះ​ហេតុការណ៍​នេះ ដើម្បី​ស្វែងរក​ជនបង្ក និង​មូលហេតុ​នៃ​ការ​បំផ្ទុះ​នេះ ទោះ ពុំមាន​មនុស្ស​បាត់បង់​ជីវិត និង​រងរបួស​ធ្ងន់ធ្ង​រ​ខ្លាំង​ក៏ដោយ​។​

​រដ្ឋាភិបាល​ថៃ បាន​អំពាវនាវ​ឲ្យ​សាធារណជន កុំ​ភ័យ​ស្លន់ស្លោ ខណ​ប៉ូលីស ធ្វើការ​រឹតបន្តឹង​ផ្នែក​សន្តិសុខ​។​

​លោកនាយក​រដ្ឋមន្ត្រី ប្រា​យុទ្ធ ចាន់​អូ​ចា បាន​ថ្កោលទោស​អ្នក​ដែល​នៅ​ពីក្រោយ​ការ​បំផ្ទុះ​នេះ ដោយបាន​ថ្លែងថា​៖ “​ចំពោះ​ការ​បំផ្ទុះ​គ្រាប់បែក​នៅ​ព្រឹក​នេះ ខ្ញុំ​សូម​ថ្កោលទោស​ចំពោះ​អ្នក​ដែល​បង្ក ដើម្បី​បំផ្លាញ​សុខសន្តិភាព និង​ធ្វើឱ្យ​ខូច​មុខមាត់​ប្រទេស​។ ខ្ញុំ​បាន​ណែ​នាំឱ្យ​មន្ត្រី​ទាំងអស់ យកចិត្តទុកដាក់​លើ​សុវត្ថិភាព​សាធារណៈ និង​អ្នក​ដែល​រងគ្រោះ​ឲ្យ​ទាន់ពេលវេលា​”៕​ ប្រភព៖ ST