សង្គ្រាម​ពាណិជ្ជកម្ម​៖ អាមេរិក ប្រកាស​យកពន្ធ ១០% លើ​ផលិតផល​នាំចូល​ពី​ប្រទេស​ចិន មានតម្លៃ​៣០០​ពាន់​លាន​ដុល្លារ​

320

​បន្ទាប់ពី​កិច្ចចរចា​ពាណិជ្ជកម្ម​ទ្វេភាគី រវាង​ក្រុមមន្ត្រី​អាមេរិក និង​ចិន ដើម្បី​រក​ដំណោះស្រាយ​ចំពោះ សង្គ្រាម​ពាណិជ្ជកម្ម នៅ​ទីក្រុង​សៀង​ហៃ ក្នុង​សប្ដាហ៍​នេះ មិន​ទទួលបាន​លទ្ធផល​អ្វី​នោះ ប្រធានាធិបតី​អាមេរិក លោក ដូ​ណា​ល់ ត្រាំ បានប្រកាសថា សហរដ្ឋអាមេរិក នឹង​យកពន្ធ​១០​ភាគរយ ទៅលើ​ផលិតផល​នាំចូល​ពី​ប្រទេស​ចិន បន្ថែមទៀត ដែល​សរុប​ទាំងអស់​មានតម្លៃ​ប្រមាណ ៣០០​ពាន់​លាន​ដុល្លារ​។​

​លោក ដូ​ណា​ល់ ត្រាំ ក៏បាន​រិះគន់​ប្រទេស​ចិន​ថា មិន​គោរព​តាម​ពាក្យសន្យា​ក្នុង​ការទិញ​ផលិតផល​កសិកម្ម ពី​សហរដ្ឋអាមេរិក ក្រោយ​ជំនួប​នៅ​ប្រទេស​ជប៉ុន និង​ថា ប្រហែលជា​ប្រទេស​ចិន ចង់​ពន្យា​ពេល​សម្រាប់​លទ្ធផល​បោះឆ្នោត​នៅ​ឆ្នាំ​២០២០ ខាងមុខនេះ ដើម្បី​ចរចារ​ជាមួយ​ប្រធានាធិបតី​ថ្មី​។​

(AP Photo/Ng Han Guan, Pool)

​លោក ដូ​ណា​ល់ ត្រាំ បាន​លើកឡើងថា ប្រសិនបើ​លោក​ជាប់ឆ្នោត​ទៀត​នោះ ចំពោះ​ការចរចា​ពាណិជ្ជកម្ម​មួយ ប្រទេស​ចិន នឹង​កាន់តែ​ពិបាក​ជាងនេះទៅទៀត​។​

​ការយកពន្ធ ១០​ភាគរយ លើ​ផលិតផល​របស់​ប្រទេស​ចិន បន្ថែមទៀត​នេះ នឹងត្រូវ​ចូល​ជាធរ​មាននៅ​ថ្ងៃទី​០១ ខែកញ្ញា ឆ្នាំ​២០១៩ ហើយ​ផលិតផល ត្រូវ​យកពន្ធ ក្នុងនោះ​មាន​ចាប់ពី​ទូរស័ព្ទដៃ​ស្មា​ត​ហ្វូ​ន រហូតដល់​សំ​ម្លៀ​ក​បំពាក់​៕​