៦​ខែ​ដំបូង នៃ​ឆ្នាំ​២០១៩​នេះ តើ កម្ពុជា សម្រេចបាន​អ្វីខ្លះ ជា​ដុំកំភួន​?

358

ភ្នំពេញ​៖ តាមរយៈ​សន្និសីទ​ព័ត៌មាន ក្រោម​ប្រធានបទ “​សមិទ្ធផល​១​ឆ្នាំ ក្រោយ​ការបោះឆ្នោត​” កាលពី​ព្រឹក​ថ្ងៃទី​០១ ខែសីហា ឆ្នាំ​២០១៩​នេះ របស់​អង្គភាព​អ្នកនាំពាក្យ​រាជរដ្ឋាភិបាល​កម្ពុជា បាន​ឲ្យ​ដឹងថា រាជរដ្ឋាភិបាល​អាណត្តិ​ទី​៦ ទទួលបាន​ជោគជ័យ​យ៉ាង​ធំធេង គឺមាន​សុខសន្ដិភាព មាន​ស្ថេរភាព​នយោបាយ និង​រក្សាបាន​នូវ​កំណើនសេដ្ឋកិច្ច ក្នុង​រង្វង់​៧​ភាគរយ ក្នុង​មួយឆ្នាំ​។​

លោក ផៃ ស៊ី​ផាន បាន​ឲ្យ​ដឹងថា ក្នុង​រយៈពេល ៦​ខែ នៃ​ឆ្នាំ​២០១៩​នេះ សម្ដេច​តេ​ជោ ហ៊ុន សែន នាយករដ្ឋមន្ដ្រី​នៃ​កម្ពុជា បាន​អញ្ជើញ​ទៅ​បំពេញការងារ​នៅ​បរទេស ក៏ដូចជា​ការស្វែងរក​ដៃគូ ក្នុង​ការងារ​ពាណិជ្ជក​ម្ម ចំនួន​១៨​លើក ក្នុងនោះ សម្ដេច​បាន​ចូលរួម​ក្នុ​ហ​វេទិកា​ធំៗ ដូចជា​នៅ​អង្គការសហប្រជាជាតិ​ជាដើម​។​

លោក ផៃ ស៊ី​ផាន

១. ផ្នែក​វិនិយោគ​

​នៅ​រយៈពេល​៦​ខែ​ដំបូង ឆ្នាំ​២០១៩​នេះ កម្ពុជា អនុញ្ញាត​ឲ្យ​បង្កើត​គម្រោង​វិនិយោគ​ថ្មី​ចំនួន​១៥៣ ក្រោម​ទុនវិនិយោគ​៥,១៨១​លាន​ដុល្លារ​អាមេរិក ដែល​គម្រោង​នេះ​បាន​បង្កើត​ការងារ​ចំនួន ១៦៧,៣៣០​កន្លែង​។ បើ​ប្រៀបធៀប​រយៈពេល​ដូចគ្នា ឆ្នាំ​២០១៨ គឺមាន​ចំនួន​១០៥​គម្រោង ក្នុងនោះ​គម្រោង​ក្រៅ​តំបន់​សេដ្ឋកិច្ច​ពិសេស​មាន ៧៤​គម្រោង និង​គម្រោង​ក្នុង​តំបន់​សេដ្ឋកិច្ច​ពិសេស​មាន ៣១​គម្រោង​។ ក្នុង​ឆមាស​ទី​១ ឆ្នាំ​២០១៨ ទឹកប្រាក់​វិនិយោគ​សរុប​មាន​ជាង ៣,៥០០​លាន​ដុល្លារ​អាមេរិក​។​

២. ការប្រមូល​ពន្ធ​

​នៅ​ឆមាស​ទី​១ ឆ្នាំ​២០១៩​នេះ អគ្គនាយកដ្ឋាន​ពន្ធដា​រ បាន​ប្រមូល​ចំណូល​ពន្ធ​សម្រាប់​ថវិកាជាតិ មាន​ចំនួន ៦,១០៦.១៧​ប៊ី​លាន​រៀល ស្មើនឹង​ប្រមាណ ១,៥២៦.៥៤​លាន​ដុល្លារ​អាមេរិក កើនឡើង​២៨.៩៤​ភាគរយ បើ​ធៀប​នឹង​រយៈពេល​ដូចគ្នា​ឆ្នាំ​២០១៨ ដែល​អាច​ឲ្យ​រាជរដ្ឋាភិបាល បាន​សល់​នូវ​ប្រាក់​បម្រុង​មួយចំនួន ដើម្បី​ត្រៀម​ទុក​ប្រើប្រាស់​នៅពេល​មាន​អាសន្ន ឬ​ការចាំបាច់​ណាមួយ​។ ថវិកា​ទាំងអស់នោះ អាច​យកទៅ​ប្រើប្រាស់ ដើម្បី​បើកប្រាក់​បៀវត្ស​ដល់​មន្ដ្រីរាជការ កងកម្លាំងប្រដាប់អាវុធ បាន​យ៉ាងហោចណាស់​មួយឆ្នាំ​ជាង​ផងដែរ​។​

៣. វិស័យ​ទេសចរណ៍​

​រយៈពេល​៧​ខែ ដើមឆ្នាំ​២០១៩​នេះ មាន​ភ្ញៀវទេសចរ​បរទេស​ជិត ១.៤​លាន​នាក់ បាន​ទិញ​បណ្ណ​ចូល​ទស្សនា​រមណីយដ្ឋាន​អង្គរ និង​ទទួលបាន​ចំណូល​ជាង ៦២​លាន​ដុល្លារ​។ ដោយឡែក បើ​គិត​ក្នុង​រយៈពេល​ពេញ​១ ខែកក្កដា ឆ្នាំ​២០១៩ មាន​ភ្ញៀវទេសចរ​បរទេស ជាង​១៤​ម៉ឺន​នាក់ បាន​ទិញ​បណ្ណ​ចូល​ទស្សនា​រមណីយដ្ឋាន​អង្គរ និង​ទទួលបាន​ចំណូល​ជាង​៦​លាន​ដុល្លារ​៕