ប្រទេស​ចិន ថា អត់​មាន “​មូលដ្ឋាន​យោធា​” របស់ ប្រទេស​ចិន នៅ​កម្ពុជា​ទេ​

555

​សិង្ហ​បុរី​៖ ឆ្លើយតប​ទៅនឹង​សំនួរ​ដែល​បាន​ចោទ​សួរថា តើ​មាន​មូលដ្ឋាន​យោធា របស់​ប្រទេស​ចិន នៅ​ទឹកដី​កម្ពុជា​ឬទេ​? លោក វ័យ ហ្វ៊ុ​ង​ហ​រ័ (Wei Fengh) រដ្ឋមន្ត្រី​ក្រសួងការពារជាតិ​ចិន បាន​បញ្ជាក់ថា យ៉ាងច្បាស់​ថា មិនមាន​មូលដ្ឋាន​យោធា​ចិន នៅលើ​ទឹកដី​កម្ពុជា​ទេ​។​

អត្ថបទទាក់ទង៖ តើ​គម្រោង​អភិវឌ្ឍន៍​ដ៏​ធំ​ក្នុង​ខេត្តកោះកុង នៃ​ប្រទេស​កម្ពុជា ធ្វើឡើង​សម្រាប់​បំរើភ្ញៀវ​ទេសចរ​ចិន ឬ​យោធា​ចិន​?

​លោក វ័យ ហ្វ៊ុ​ង​ហ​រ័ (Wei Fengh) រដ្ឋមន្ត្រី​ក្រសួងការពារជាតិ​ចិន បានបញ្ជាក់​បែបនេះ នៅក្នុង​កិច្ចប្រជុំ​កំពូល​សន្តិសុខ​អាស៊ី​លើក​ទី​១៨ នៅ​ប្រទេស​សិង្ហ​បុរី កាលពី​ថ្ងៃទី​០២ ខែមិថុនា ឆ្នាំ​២០១៩ កន្លងទៅនេះ​។​

លោក វ័យ ហ្វ៊ុ​ង​ហ​រ័ (Wei Fengh) រដ្ឋមន្ត្រី​ក្រសួងការពារជាតិ​ចិន

​ពាក់ព័ន្ធ​នឹង​មូលដ្ឋានទ័ព​បរទេស ជាពិសេស មូលដ្ឋាន​យោធា របស់​ប្រទេស​ចិន នេះ សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា ធ្លាប់បាន​បញ្ជាក់​ជំហរ យ៉ាងច្បាស់​ម្ដង​ហើយ​ម្ដង​ទៀ​ថា រាជរដ្ឋាភិបាល​កម្ពុជា មិន​អនុញ្ញាត​ឲ្យ​មាន​មូលដ្ឋានទ័ព​បរទេស នៅលើ​ទឹកដី​កម្ពុជា​នោះឡើយ ហើយ​សម្តេច​តេ​ជោ​នាយករដ្ឋមន្ត្រី ក៏បាន​ប្រកាស​ទៀតថា កម្ពុជា​ក៏​មិន​កែប្រែ​រដ្ឋធម្មនុញ្ញ ដើម្បី​អនុញ្ញាត​ឱ្យមាន​មូលដ្ឋានទ័ព​បរទេស ឬ​បញ្ជូន​យោធា​កម្ពុជា​ទៅ​ក្រៅប្រទេស ក្រៅពី​បេសកកម្ម​ជាមួយ អង្គការសហប្រជាជាតិ​ផងដែរ​។​

​កិច្ចប្រជុំ​កំពូល​សន្តិសុខ​អាស៊ី​លើក​ទី​១៨ នៅ​ប្រទេស​សិង្ហ​បុរី រយៈពេល​ពីរ​ថ្ងៃ នេះ ក៏មាន​ការចូលរួម​ពីស​ម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ ដោយមាន​ការរួម​ដំណើរ​ដោយ នាយ​ឧ​ត្ត​ម​សេនីយ៍ នាង ផាត រដ្ឋលេខាធិការ​ក្រសួងការពារជាតិ នាយ​ឧ​ត្ត​ម​សេនីយ៍ វង្ស ពិ​សេន អគ្គមេបញ្ជាការ ខ​ភម និង នាយ​ឧ​ត្ត​ម​សេនីយ៍ ណឹ​ម សុវត្ថិ ទីប្រឹក្សា​ពិសេស និង ជា​អគ្គនាយក អគ្គនាយកដ្ឋាន​នយោបាយ និង កិច្ចការបរទេស​ក្រសួងការពារជាតិ ។​

សម្តេច​ពិជ័យ​សេនា ទៀ បាញ់ និង លោក វ័យ ហ្វ៊ុ​ង​ហ​រ័ (Wei Fengh) រដ្ឋមន្ត្រី​ក្រសួងការពារជាតិ​ចិន

សម្តេច​ពិជ័យ​សេនា ទៀ បាញ់ ក៏បាន​ឡើង​ថ្លែង​សន្ទរកថា គន្លឹះ​ដើម្បី​ប្រាប់​ឱ្យ​ពិភពលោក​បានដឹង​អំពី​ភាពស្មុកស្មាញ និង ការ​ប្រឈម​ផ្នែក​សន្តិសុខ ក្នុងពេល​បច្ចុប្បន្ន ព្រមទាំង​បាន​ចែករំលែក​នូវ ទស្សនៈ សភាពការណ៍​ថ្មីៗ ចំណេះដឹង និង បទពិសោធន៍ ដើម្បី​ជា​ប្រយោជន៍​នាំមក​នូវ សន្តិភាព និង ស្ថិរភាព​ក្នុង​តំបន់​។ កិច្ចប្រជុំ​ក៏បាន​ពិភាក្សា​លើ​ប្រធានបទ​សំខាន់ៗ ដែល​ពាក់ព័ន្ធ​បញ្ហា​សន្តិសុខ​ក្នុង​តំបន់​ផងដែរ​៕​