ការដាក់​បម្រាម​របស់​សហរដ្ឋអាមេរិក ចំពោះ​ក្រុមហ៊ុន Huawei អាចធ្វើ​ឲ្យ​ប្រទេស​ចិន កាន់តែខ្លាំង​ខាង​ផ្នែក​បច្ចេកវិទ្យា​

564

សង្គ្រាម​ពាណិជ្ជកម្ម​រវាង​សហរដ្ឋអាមេរិក និង​ចិន បាន​ផ្ទុះឡើង​កាលពីដើមឆ្នាំ ២០១៨ ហើយ​នៅ​ដើមខែ​នេះ សង្គ្រាម​ពាណិជ្ជកម្មមួយនេះ កាន់តែ​ក្តៅ​ឡើងៗ បន្ទាប់ពី​ការ​ការចរចា​រវាង​ប្រទេសចិន និង​សហរដ្ឋអាមេរិក មិនបាន​សម្រេច​ជា​លទ្ធផល​អ្វី​នោះ ពោលគឺ​ភាគី​ទាំងសងខាង បាន​តម្លើង​ពន្ធនាំចូល ​លើ​ផលិតផល​មួយចំនួន​រហូតដល់ ២៥%​។​

អ្វីដែល​ជាការ​កត់សម្គាល់​ខ្លាំង​នោះ​គឺ សហរដ្ឋអាមេរិក បានប្រកាស​ដាក់​ក្រុមហ៊ុន​បច្ចេកវិទ្យា​ដ៏​ធំ​របស់​ប្រទេស​ចិន​ឈ្មោះថា Huawei ទៅក្នុង​បញ្ជីខ្មៅ ដែល​ធ្វើ​ឲ្យ​ក្រុមហ៊ុន​របស់​ចិន​មួយ​នេះ មិនអាច​រកស៊ី និង​ប្រើប្រាស​បច្ចេកវិទ្យា ផ្ដល់​ដោយ​របស់​ក្រុមហ៊ុន​នៅ​សហរដ្ឋអាមេរិក ប្រសិនបើ​គ្មាន​ការអនុញ្ញាត​ ពី​រដ្ឋាភិបាល​សហរដ្ឋអាមេរិក​នោះ​។​

​ក្រុមហ៊ុន Huawei

​ការដាក់​សម្ពាធ​នេះ ត្រូវបាន​គេ​លើកឡើងថា ក៏​ព្រោះតែ​សហរដ្ឋអាមេរិក ​បាន​មើលឃើញ បច្ចេកវិទ្យា 5G របស់​ក្រុមហ៊ុន Huawei រីកចម្រើន​ខ្លាំងក្លា​ជាង​ខ្លួន​ខ្លាំងពេក ដែល​នាំ​ឲ្យ​ប្រទេស​ចិន ក្លាយជា​អ្នក​នាំមុខ​ខាង​ផ្នែក​បច្ចេកវិទ្យា​នេះ និង​ទទួលបាន​ផលចំណេញ​ច្រើន សម្រាប់​សេដ្ឋកិច្ច​របស់​ប្រទេស​ចិន​។ ដូចនេះ​សហរដ្ឋអាមេរិក ត្រូវ​ទប់ទល់​ចំពោះ​ការរីកចម្រើន​ដ៏​ខ្លាំងក្លា​នេះ ដោយ​​យក​លេសចោទប្រកាន់​ថា បច្ចេកវិទ្យា​របស់​ក្រុមហ៊ុន Huawei គំរាមកំហែង​ផ្នែក​សន្តិសុខ​ជាតិ ហើយ​ថែមទាំង​ប្រាប់​សម្ព័ន្ធមិត្ត​លោកខាងលិច​របស់ខ្លួន កុំ​ប្រើប្រាស់​បច្ចេកវិទ្យា 5G របស់​ក្រុមហ៊ុន Huawei ថែម​ទៀតផង​។​  ​ក្រុមហ៊ុន Huawei បានច្រានចោលការចោទប្រកាន់នេះ ហើយបានសុំឲ្យអាមេរិកបង្ហាញ  ភស្តុតាងពីហានិភ័យផ្នែកសុវត្ថិភាព សម្រាប់ការចោទប្រកាន់នេះ។

បន្ទាប់ពី​បម្រាម ដែល​បាន​ដាក់ចេញ​ដោយ​លោក ដូ​ណា​ល់ ត្រាំ ត្រូវបាន​ចូល​ជា​ធរមាន​រួចមក ក្រុមហ៊ុន​ធំៗ​របស់​សហរដ្ឋអាមេរិក មានដូចជា Google, Microsoft ជាដើម ដែល​រកស៊ី​ជាមួយ​ក្រុមហ៊ុន Huawei ចង់​មិន​ចង់ ត្រូវតែ​គោរព​ទៅតាម​ច្បាប់ បើទោះបី​ជា​ខ្លួន​​ត្រូវ​ខាតបង​ប្រាក់ចំណូល​ដ៏​ច្រើនសន្ធឹក​សន្ធាប់ យ៉ាងណាក៏ដោយ​នោះ​។ ក្រុមហ៊ុន​អាមេរិក​ទាំងនោះ បានចេញ​សេចក្ដីប្រកាស ផ្ដាច់ការ​ផ្គត់ផ្គង់​សេវាកម្ម​, ទំនាក់ទំនង និង​ផលិតផល ឲ្យទៅ​ក្រុមហ៊ុន Huawei ជា​បន្តបន្ទាប់​។​

ចំពោះ​ក្រុមហ៊ុន Huawei ដំបូង​ឡើង​ត្រូវបាន​មើលឃើញថា ក្រុមហ៊ុន​នេះ​នឹងត្រូវ​រងគ្រោះ​ខ្លាំង ព្រោះ​ក្រុមហ៊ុន​ផ្គត់ផ្គង់​ធំៗ សំខាន់ បានប្រកាស​កាត់​ផ្តាច់ទំនាក់ទំនង​ជា​បន្តបន្ទាប់​។ ក្នុង​កែវភ្នែក​របស់​អាមេរិក​មើលឃើញថា ការផលិត​ឧបករណ៍ ទូរគមនាគមន៍ របស់​ក្រុមហ៊ុន Huawei ត្រូវការ​គ្រឿងបន្លាស់​សំខាន់ៗ​មួយចំនួន ពី​ក្រុមហ៊ុន​អាមេរិក ដូច្នេះហើយ​ក្រុមហ៊ុន Huawei ច្បាស់​ណាស់​នឹងត្រូវ​ជាប់​គាំ​ដំណើរការ ហើយ​ប្រទេស​ចិន ច្បាស់​ជា​សុំ​អង្វរ ​សម្រាប់​ការចរចារ ហើយ​ប្រទេស​ចិន នឹងធ្វើតាម​អ្វី ដែល​សហរដ្ឋ​អា​មេ​រិក​ចង់បាន​។​

​ក្រុមហ៊ុន Huawei

ការគិត​បែបនេះ​របស់ សហរដ្ឋអាមេរិក អាច​ឲ្យ​អាមេរិក និង​គូប្រជែង​របស់​ក្រុមហ៊ុន Huawei ទទួលបាន​អត្ថប្រយោជន៍ ក្នុង​រយៈពេល​ខ្លី​តែប៉ុណ្ណោះ ព្រោះ​គោលការណ៍​គាំពារ​និយម របស់​សហរដ្ឋ​អា​មេ​រិ នឹង​ជំរុញ​ឲ្យ​ក្រុមហ៊ុន Huawei និង​ក្រុមហ៊ុន​ចិន​ដទៃទៀត ខិតខំ​អភិវឌ្ឍន៍​បច្ចេកវិទ្យារ​បស់​ខ្លួនឯង​ផ្ទាល់ ដោយ​មិនពឹងផ្អែក​ទាំងស្រុង​ពេក ​ចំពោះ​ក្រុមហ៊ុន​បរទេស ដែល​នៅ​ថ្ងៃ​ណាមួយ ប្រាកដ​ណាស់ នឺង​ត្រូវគេ​ខ្ទប់​ដង្ហើម តួ​យ៉ាងដូច​ក្រុមហ៊ុន Huawei​​ ជាគំរូ។ ម្យ៉ាងវិញទៀត​នោះ ដោយយោង​លើ​ទៅលើ​ភាព​រីកចម្រើន​យ៉ាង​ឆាប់រហ័ស នៃ​ក្រុមហ៊ុន​ធំៗ​របស់​ចិន ពួកគេ​ប្រហែលជា​អាចឈាន​មុខ ហើយ​ដណ្តើម​ឥទ្ធិពល​ពី​ក្រុមហ៊ុន​អាមេរិក នៅក្នុង​ទីផ្សារ​អន្តរជាតិ ផ្នែក​បច្ចេកវិទ្យា ថែមទៀត​ក៏​ថា​បាន​នាពេល​អនាគត​។​

បម្រាម​ពាណិជ្ជកម្ម​របស់​អាមេរិក បានធ្វើ​ឲ្យ​ក្រុមហ៊ុន Huawei បាត់បង់​ភាពជា​ដៃគូ​ជាមួយ​ក្រុមហ៊ុន Google ពោលគឺ​ក្រុមហ៊ុន Huawei ត្រូវ​ប្រឈមមុខ​នឹង​ការបាត់​នូវ​សិទ្ធិ​ប្រើប្រាស់ ប្រព័ន្ធ​ប្រតិបត្តិការ Android OS ព្រមទាំង​កម្មវិធី​ផ្សេងៗ​ទៀត ដែលមាន​នៅក្នុង ប្រព័ន្ធ​អេកូឡូស៊ី​របស់ Google​។ ការបាត់បង់​នេះ បានធ្វើ​ឲ្យ​អតិថិជន​មួយចំនួន នៅលើ​ទីផ្សារ​អន្តរជាតិ នឹង​ឈប់​ប្រើប្រាស់​ស្មា​ត​ហ្វូ​ន​របស់ Huawei នាំ​ឲ្យ​ក្រុមហ៊ុន Huawei ចុះខ្សោយ​។

​តែការបាត់បង់​នេះ បាន​នាំ​ឲ្យ Huawei ចាប់ផ្តើម​បង្កើន​សមត្ថភាពបង្កើតប្រព័ន្ធ OS និង​ប្រព័ន្ធ​អេកូឡូស៊ី​ផ្ទាល់​របស់ខ្លួន ឲ្យ​កាន់តែខ្លាំង​ថែមទៀត ព្រោះ​ក្រុមហ៊ុន Huawei បាន​ដឺ​ង​ជាមុន​ថា ​ថ្ងៃនេះ​នឹង​មកដល់ ហើយ​ក្រុមហ៊ុន Huawei បាន​ចំណាយពេល​សម្ងំ​បង្កើត ប្រព័ន្ធ​ប្រតិបត្តិការ​របស់ខ្លួន​ឯង ជាច្រើន​ឆ្នាំ​រួចស្រេច​មកហើយ ដែលមាន​ឈ្មោះថា Hongmeng (​សម្រាប់​ទីផ្សារ​ក្នុងស្រុក​ចិន​) និង Ark ឬ Oak (​សម្រាប់​ទីផ្សារ​សកល​)​។​

​ទោះបីជា ប្រព័ន្ធ​ដំណើការ បង្កើតឡើង​ដោយ​ក្រុមហ៊ុន Huawei មិន​ប្រាកដថា នឹង​អាច​យកឈ្នះ Android របស់ Google ក៏ដោយ​ក្តី តែ​នឹង​បង្កើត​ឲ្យ​មាន ប្រព័ន្ធ​ដំណើការ​ទី​៣ មួយទៀត​ នៅក្នុង​ទីផ្សារ​ពិភពលោក ដែល​នឹង​កាត់បន្ថយ​ចំណែក​ទីផ្សារ​របស់ Android របស់ Google សម្រាប់​ការប្រើប្រាស់​នៅក្នុង​ប្រទេស​ចិន ដែល​នេះ មិនមែនជា​អ្វីដែល Google ចង់ឃើញ​នោះទេ​។

ប្រព័ន្ធ​ប្រតិបត្តិការ Hongmeng

ក្រុមហ៊ុន Huawei ធ្លាប់​បញ្ជាក់​ជាច្រើន​ដង​ហើយ​ថា Android និង Windows នៅតែ​ជា​ប្រព័ន្ធ​ប្រតិបត្តិការ​ចម្បង ដែល​ខ្លួន​ចង់បាន តែបើ​កាលៈទេសៈ បង្ខំ នោះ​គឺ​គ្មាន​ជម្រើស​ទេ ដាច់ខាត​ត្រូវតែ​ខំប្រឹង​បន្ថែមទៀត ក្នុងការបង្កើត​ប្រព័ន្ធ​ដំណើការ របស់ខ្លួន​ឲ្យ​ខ្លាំង​។​

និយាយ​រួម​ទៅ​បម្រាម​ពាណិជ្ជ​កម្មនេះ មិនមែន​ត្រឹមតែ​ជា​ផ្នែក​មួយ​នៃ​សង្គ្រាម​ពាណិជ្ជកម្ម របស់​ប្រធានាធិបតី​អាមេរិក លោក ដូ​ណា​ល់ ត្រាំ ប៉ុណ្ណោះ​ទេ តែ​វា​ប្រហែលជា​អាច​ផ្លាស់ប្តូរ អនាគត​នៃ​អ្នកដឹកនាំ​បច្ចេកវិទ្យា​ស្មា​ត​ហ្វូ​ន​តែម្តង​។ បើ​គ្មាន​បម្រាម​នេះ ក្រុមហ៊ុន Huawei ប្រហែលជា​នៅតែ​ប្រើប្រាស់​ប្រព័ន្ធ​អេកូឡូស៊ី របស់ Google រហូត ព្រោះ​វា​ល្អ​សម្រាប់​ខ្លួន​។ ប៉ុន្តែ​ឥឡូវនេះ នៅពេល ដែល​ត្រូវ​ប្រឈមមុខ​ជាមួយ​បញ្ហា​យ៉ាង​ធំ ក្រុមហ៊ុន Huawei និង​បណ្តា​ក្រុមហ៊ុន​ចិន​ដទៃទៀត ត្រូវតែ​ត្រៀមខ្លួន​ប្រឆាំង​ឥទ្ធិពល​របស់ Google ប្រសិនបើ​ពួកគេ​ចង់​នៅ​ឈរជើង​ជាប់​។

​ក្រុមហ៊ុន Google ទំនងជា​យល់​ពី​ហានិភ័យ ដែល​នឹង​កើតមាន​ចំពោះ​ឥទ្ធិពល​របស់ខ្លួន ទើបបាន​ទទូច​សុំ​ឲ្យ រដ្ឋាភិបាល​អាមេរិក ផ្តល់​ការលើកលែង​ដល់​ប្រព័ន្ធ​ប្រតិបត្តិការ Android របស់ខ្លួន​ មិន​ឲ្យ​ជាប់​បម្រាម​ពាណិជ្ជកម្ម ពោលគឺ​ដើម្បី​ឲ្យ​ស្មា​ត​ហ្វូ​ន​របស់​ក្រុមហ៊ុន Huawei គ្រប់​ជំនាន់ ​នៅតែ​អាច​ប្រើប្រាស់ ​Android ​បាន​ត​ទៀត​។ យ៉ាងណាមិញ​វា​ក៏​អាច​ហួសពេល​ទៅហើយ​ដែរ ​ព្រោះ​ក្រុមហ៊ុន Huawei និង​ក្រុមហ៊ុន​ចិន​ផ្សេងទៀត បាន​មើលឃើញ​យ៉ាងច្បាស់ ពី​ហា​ន័យ ដែល​អាមេរិក​អាច​បង្កឡើង​ចំពោះ​ពួកគេ​៕​