លោក ដូ​ណា​ល់ ត្រាំ គិតថា ការដាក់​មូលដ្ឋានទ័ព​នៅ​ជប៉ុន ជា​ថ្នូរ​នឹង​ការធ្វើជា​អ្នកកាង​ឲ្យ​ជប៉ុន អត់​ចំណេញ​ដល់​អាមេរិក​

1012

Bloomberg ៖ ក្នុង​លក្ខណៈ​ជា​ឯកជន លោក​ប្រធានាធិបតី​អាមេរិក​លោក ដូ​ណា​ល់ ត្រាំ គិតថា សន្ធិសញ្ញា​ការពារជាតិ​ជាមួយ​ជប៉ុន ជាង ០៦​ទសវត្សរ៍ កន្លងមកនេះ​មាន​ភាពលម្អៀង​ចំពោះ​អាមេរិក ដោយសារតែ​នៅពេល​ជប៉ុន​រង​ការវាយប្រហារ សហរដ្ឋអាមេរិក​មាន​តួនាទី​ត្រូវតែទៅ​ជួយ​ជប៉ុន ប៉ុន្តែ​ក្នុងករណី​អាមេរិក​រង​ការវាយប្រហារ​វិញ​នោះ ជប៉ុន​ពុំមាន​កាតព្វកិច្ច ត្រូវ​មកជួយ​ការពារ​អាមេរិក​ឡើយ​។​

លោក ដូ​ណា​ល់ ត្រាំ និង លោក អាមេ

ហេតុអ្វី​ជប៉ុន មិន​អាចជួយ​អាមេរិក​វិញ ក្នុងករណី​អាមេរិក​រង​ការវាយប្រហារ​វិញ​នោះ​?

ព្រោះ​ចាប់តាំងពី​ចាញ់​សង្គ្រាមលោក​មក ជប៉ុន​ពុំមាន​យោធា​ផ្លូវការ ឬក៏​សិទ្ធិ​ប្រកាស​សង្គ្រាម ជាមួយ​ប្រទេស​ណាមួយ​ទៀតឡើយ។ រដ្ឋធម្មនុញ្ញ ​ក្រោយ​សង្គ្រាមលោក របស់​ប្រទេស​ជប៉ុន កំណត់មិនអនុញ្ញាត​ឱ្យមាន​កងកម្លាំង​យោធា សម្រាប់​វាយលុក ឬសម្រាប់​ធ្វើសង្គ្រាម​នោះទេ​។ ប្រទេស​ជប៉ុន មាន​ត្រឹមតែ​កងកម្លាំង​ស្វ័យការពារ (Self Defence Force – SDF) ដើម្បី​រក្សា​សន្តិភាព​, ឯករាជ្យ និង​សុវត្ថិភាព របស់​ប្រទេស​ជប៉ុន​ខ្លួនឯង​តែប៉ុណ្ណោះ​។​

​លោក ដូ​ណា​ល់ ត្រាំ បានបង្ហាញ​នូវ​អារម្មណ៍​មួយ​នេះ តែ​ដូច​មិនទាន់មាន​វិធានការ​ណាមួយ ពាក់ព័ន្ធ​ចំពោះ​រឿងនេះ​នៅឡើយ​ទេនោះ​ទេ ព្រោះ​លោក ដូ​ណា​ល់ ត្រាំ មាន​ជំហរ​មួយ​គឺ​ធ្វើ​អ្វីៗ​ដើម្បី​អាមេរិក​ជាមុន (America First) ដើម្បី​ឲ្យ​សហរដ្ឋអាមេរិក​អស្ចារ្យ​ម្ដងទៀត (Make America Great Again)​។

ប្រទេសជប៉ុន

​សន្ធិសញ្ញា​ការពារជាតិ​ជាមួយ​ជប៉ុន ត្រូវបាន​ចុះហត្ថលេខា​កាលពី​ឆ្នាំ​១៩៥១ រួមជាមួយ​សន្ធិសញ្ញា​ទីក្រុង​សាន់​ហ្វ្រា​ន់​ស៊ី​ស្កូ ដែល​បាន​បិទ​បញ្ចប់​សង្គ្រាមលោក​ទី​ពីរ​ជា​ផ្លូវការ ហើយ​ត្រូវបាន​កែសម្រួល​នៅ​ឆ្នាំ ១៩៦០ ដែល​ផ្តល់​សិទ្ធិ​ឲ្យ​អាមេរិក​បោះ​មូលដ្ឋានទ័ព នៅលើ​ទឹកដី​ជប៉ុន​ជា​ថ្នូរ​នឹង​ការ​សន្យាថា អាមេរិក គឺជា​អ្នកការពារ​របស់​ប្រទេស​ជប៉ុន ប្រសិនបើ​ជប៉ុន​រង​ការវាយប្រហារ​ណាមួយ​នោះ​៕