ឥណ្ឌូណេស៊ី៖ ប្រអប់ខ្មៅទីពីរ របស់យន្តហោះនៃក្រុមហ៊ុនអាកាសចរណ៍ Lion Air ដែលបានធ្លាក់នៅសមុទ្រជ្វា ភាគខាងលិចប្រទេសឥណ្ឌូណេស៊ី កាលពីចុងខែតុលា ឆ្នាំ២០១៨ ត្រូវបានក្រុមជំនាញរកឃើញហើយ បើតាមការចេញផ្សាយរបស់ ទីភ្នាក់ងារព័ត៌មានចិនស៊ីនហួរ កាលពីរសៀលថ្ងៃចន្ទទី១៤ ខែមករា ឆ្នាំ២០១៩។
ដំណឹងខាងលើត្រូវបានប្រកាសឲ្យដឹង ដោយអ្នកនាំពាក្យក្រសួងដឹកជញ្ជូនឥណ្ឌូណេស៊ី លោក ហេងគី អាំងកាសាវ៉ាន (Hengky Angkasawan) ដោយវាគឺជាប្រអប់ខ្មៅមានផ្ទុកនូវខ្សែអាត់សំឡេងសន្ទនា ក្នុងបន្ទប់របស់អ្នកបើកយន្តហោះ និងត្រូវបានរកឃើញដោយក្រុមអ្នកមុជទឹកនៅព្រឹកថ្ងៃចន្ទនេះ។
គួររំម្លឹកផងដែរថា យន្តហោះរបស់ជើងហោះហើរ JT610 នៃក្រុមហ៊ុនអាកាសចរណ៍ក្នុងស្រុករបស់ឥណ្ឌូណេស៊ី Lion Air បានដាច់ការទាក់ទង បន្ទាប់ពីបានហោះចាកចេញពីរដ្ឋធានីហ្សាការតា ដើម្បីឆ្ពោះទៅកាន់ទីក្រុងផាំងកាល់ ភីណាង (Pangkal Pinang) បាន ១៣នាទី និងបានផ្តាច់ជីវិតមនុស្សទាំង ១៩៨នាក់ ដែលធ្វើដំណើរលើនោះ ហើយវាគឺជាករណីធ្លាក់ដំបូងបង្អស់ នៃយន្តហោះស៊េរីថ្មី Boeing 737 MAX ដែលលក់ដាច់បំផុតក្នុងប្រវត្តិសាស្ត្រ Boeing៕
