សមយុទ្ធ ហនុមាន​មាស ឆ្នាំ​២០១៩ បានបញ្ចប់​ដោយ​ជោគជ័យ​

1630

​ភ្នំពេញ​៖ សមយុទ្ធ ហនុមាន​មាស រយៈពេល​៥​ថ្ងៃ នៅលើ​ទីលាន​បាញ់​គ្រាប់​ពិត​តេ​ជោ​សែន​ជុំ​គិរី ស្រុក​ជុំ​គិរី ខេត្តកំពត បាន​បញ្ចប់ទៅ​ជោគជ័យ តាម​ការគ្រោងទុក​។ នេះ​គឺជា​ការលើកឡើង​របស់ លោកនាយ​ឧ​ត្ត​ម​សេនីយ៍ ឈុំ សុជាត ដែលជា​អ្នកនាំពាក្យ​ក្រសួងការពារជាតិ​។​

​លោក ឈុំ សុជាត បានបញ្ជាក់​នៅលើ​បណ្តាញ​សង្គម​ហ្វេ​ស​ប៊ុ​ក ថា​៖ “​សមយុទ្ធ ហនុមាន​មាស ២០១៩ រយៈពេល​៥​ថ្ងៃ នៅលើ​ទីលាន​បាញ់​គ្រាប់​ពិត​តេ​ជោ​សែន​ជុំ​គិរី ខេត្តកំពត បានបញ្ចប់​ទៅដោយ​ជោគជ័យ និង​រលូន​តាម​ផែនការ នៅ​ថ្ងៃទី​០៨ ខែឧសភា ឆ្នាំ​២០១៩​នេះ​”​។​

​លោក ឈុំ សុជាត (កណ្ដាល)

​សមយុទ្ធ ហនុមាន​មាស ២០១៩ បានចាប់ផ្តើម​ពីថ្ងៃ​ទី​០៤ ដល់​០៨ ខែឧសភា ឆ្នាំ​២០១៩ ដើម្បី​ពង្រឹងសមត្ថភាព ចំណេះដឹង​បណ្តា​ជំនាញ​ដល់ នាយទាហាន នាយទាហានរង និង​ពលទាហាន នៃ​កងទ័ពជើងគោក ក្នុង​កិច្ចការពារ​បូរណភាព​ទឹកដី នាពេល​បច្ចុប្បន្ន និង​អនាគត ហើយក៏​ជា​ការវាស់ស្ទង់​សមត្ថភាព ក្រោយពី​ធ្វើការ​ហ្វឹកហ្វឺន​តាម​សាលា និង​កងឯកភាព​រួច​ផងដែរ​។ ម្យ៉ាងវិញទៀត សមយុទ្ធ ហនុមាន​មាស នឹង​ជួយ​លើកកម្ពស់​សមត្ថភាព គុណភាព ផ្តល់​ចំណេះដឹង​ការងារ​សេនាធិការ ក្នុង​ការធ្វើ​សមយុទ្ធ​ដល់​កម្មសិក្សា នាយទាហាន​សេនាធិការ ក្នុងការ​សហការ​រវាង​ប្រភេទ​ទ័ព និង​ទ័ព​ជំនាញ ក្នុងពេល​ហ្វឹកហ្វឺន ក៏​ដូច​ក្នុងពេល​ប្រយុទ្ធ​ថែមទៀត​។​

សមយុទ្ធ ហនុមាន​មាស

​សមយុទ្ធ ហនុមាន​មាស ២០១៩ បាន​ប្រើប្រាស់​យុទ្ធវិធី​វាយបក យក​ទីតាំង​ដែល​ខ្មាំង​ដណ្តើមបាន​ត្រឡប់មកវិញ ខណៈ សមយុទ្ធ នាគ​មាស ២០១៩ វិញ គី​ប្រើប្រាស់​យុទ្ធវិធី​វាយ​រំដោះ ចំណាត់​ខ្មាំង​ពី​ជំរុំ​ខ្មាំង​។​

សមយុទ្ធ ហនុមាន​មាស

​កម្លាំងយោធា​ចូលរួម​ចំនួន ២៣៣២​នាក់ មកពី​អង្គភាព​ផ្សេងៗ​នៃ​កងទ័ពជើងគោក ហើយ​ចំណែក​អាវុធយុទ្ធភណ្ឌ​ដែល​ប្រើ​ក្នុង​សកម្មភាព​សមយុទ្ធ​នោះ រួមមាន​រថក្រោះ​, រថពាសដែក​, ឧ​ត្ថ​ម្ភា​ចក្រ​, ត្រូ​ន រួមទាំង​កាំភ្លើងត្បាល់​120mm ផងដែរ នៅក្នុង សមយុទ្ធ ហនុមាន​មាស ២០១៩ រយៈពេល​៥​ថ្ងៃ​មកនេះ​៕​