ភ្នំពេញ៖ “មីល្ពៅ” ដែលស្រាវជ្រាវនិងផលិតឡើងដោយ អតីតនិស្សិតបរិញ្ញាបត្រជំនាញវិទ្យាសាស្ត្រចំណីអាហារ នៃសាកលវិទ្យាល័យខេត្តបាត់ដំបង ដែលបានល្បីរន្ទឺពេញបណ្ដាញសង្គម និងក្នុងប្រទេសកម្ពុជា រហូតដល់មានអ្នកវិនិយោគ មានបំណងបោះទុនវិនិយោគដើម្បីផលិត “មីល្ពៅ” ក៏ប៉ុន្តែបំណងប្រាថ្នានេះ ត្រូវបានអ្នកស្ថាបនិក លោក វ៉ាន់ គិមវ៉ាង បដិសេធមិនទទួល យកការសុំវិនិយោគជាដាច់ខាត។
លោក វ៉ាន់ គិមវ៉ាង វ័យ ២៦ ឆ្នាំរូបនេះ បានប្រកាសការពីសប្ដាហ៍មុននេះនៅលើទំព័រហ្វេសប៊ុករបស់ខ្លួនថា “មីល្ពៅខ្មែរបាត់ដំបងសូមប្រកាសជាផ្លូវការថា ខ្ញុំសូមបិទមិនទទួលការសុំវិនិយោគទេ ហើយខ្ញុំក៏មិនបានទទួលវិនិយោគពីខាងណាដែរ។ ខ្ញុំនឹងខំប្រឹងធ្វើវាដោយខ្លួនឯង ទោះលំបាកយ៉ាងណាក៏ដោយ”។
![](https://www.cambodianews.today/wp-content/uploads/2019/02/Khmer-Pumpkin-Noodle-1.jpg)
ទោះបីជាយ៉ាងណាក៏ដោយ យើងមិនអាចដឹងពីមូលហេតុ ឲ្យប្រាកដថាហេតុអ្វីបានជា ស្ថាបនិក “មីល្ពៅ” រូបនេះបដិសេធមិនទទួលយកការសុំវិនិយោគ ខណៈដែលការសិក្សាស្រាវជ្រាវរបស់ខ្លួន គឺមានបំណងជួយដល់កសិករខ្មែរ ដែលដាំដំណាំល្ពៅនោះ។
យោងតាមកាសែតភ្នំពេញប៉ុស្ដិ៍ បានចុះផ្សាយពីដំណើរជីវិត និងការឈានដល់ធ្វើការសិក្សាស្រាវជ្រាវផលិតមីល្ពៅនេះឡើង របស់ស្ថាបនិក “មីល្ពៅ” នេះថា ដើមទងដែលនាំឲ្យរូបគេ ស្រាវជ្រាវបង្កើត មីល្ពៅ នេះឡើងដោយសារតែ នៅឆ្នាំ២០១៥ ដំណាំល្ពៅរបស់កសិករខ្មែរទទួលបានផលច្រើន ធ្វើឲ្យឈ្មួញថៃឲ្យតម្លៃថោក រហូតដល់កសិករខ្មែរខឹងក៏យកល្ពៅទាំងនោះ ចាក់ចោលកណ្ដាលផ្លូវ។ ស្ថានភាពនេះបានធ្វើឲ្យ លោក វ៉ាន់ គិមវ៉ាង រំជួលចិត្ត ខឹងពួកឈ្មួញ និងអាណិតដល់កសិករខ្មែរ ដែលខិតខំដាំរហូតបានផលហើយ បែរជាមិនមានទីផ្សារ ឬត្រូវគេឲ្យតម្លៃទាបទៅវិញ។
![](https://www.cambodianews.today/wp-content/uploads/2019/02/Khmer-Pumpkin-Noodle.jpg)
លោក វ៉ាន់ គិមវ៉ាង ក៏សម្រេចធ្វើគម្រោងស្រាវជ្រាវ និងច្នៃផលិតផលចេញពីផ្លែល្ពៅ ដោយទទួលបានការណែនាំពីលោកគ្រូម្នាក់ និងជំរុញឲ្យធ្វើមីពីផ្លែល្ពៅ នៅពេលគេចូលសិក្សានៅឆ្នាំទី២ ផ្នែកវិទ្យាសាស្ត្រចំណីអាហារ។
ស្ថាបនិក “មីល្ពៅ” បានប្រាប់ទៅភ្នំពេញប៉ុស្តិ៍តាមរយៈទូរស័ព្ទថា “ព្រោះតែចិត្តស្រឡាញ់ ហើយចង់សិក្សាធ្វើមីហ្នឹង គឺខ្ញុំដេកនៅសាកលរហូត។ ខ្ញុំខំប្រឹងធ្វើមីហ្នឹងដាច់យប់ ហើយជួនកាលទល់ភ្លឺក៏មាន។ ពេលណាគេងអ៊ីចឹងទៅ ស្រាប់តែក្រោកកណ្តាលយប់ ពេលខ្លះក្រោកមកមានអ្វីពិសេស ឬជាគំនិតថ្មីអ៊ីចឹងខ្ញុំកត់ទុក ហើយយកវាទៅបន្ថែមក្នុងការផលិតហ្នឹង”។
![](https://www.cambodianews.today/wp-content/uploads/2019/02/Khmer-Pumpkin-Noodle-2.jpg)
ការស្រាវជ្រាវរបស់ លោក វ៉ាន់ គិមវ៉ាង ក្នុងការផលិតមីពីផ្លែល្ពៅ ក៏ជាសារណាបញ្ចប់ការសិក្សារបស់ខ្លួននៅឆ្នាំ២០១៧ដែរ ប៉ុន្តែបានតែសម្រេចបានតែ ៧០ភាគរយប៉ុណ្ណោះ តែបន្ទាប់ពីចូលបម្រើការឲ្យក្រុមហ៊ុនផលិតទឹកដោះគោនៅភ្នំពេញ ដើម្បីក្រេបយកចំណេះដឹងពីការផលិតអាហារមានគុណភាព និងសុវត្ថិភាពអស់រយៈពេល ៦ខែ រួមផ្សំនឹងការស្រាវជ្រាវបន្ថែមដោយខ្លួនឯង ក៏សម្រេចចេញជាលទ្ធផល នៅចុងខែកមរា ឆ្នាំ២០១៩នេះ។
តើការសម្រេចចិត្តមិនទទួលការវិនិយោគរបស់ ស្ថាបនិក “មីល្ពៅ” លោក វ៉ាន់ គិមវ៉ាង អាចជំរុញឲ្យក្ដីស្រមៃ ក្នុងការជួយដល់កសិករខ្មែរ ក្លាយជាពិតដែរឬទេ?