ប្រទេស​ថៃ យល់ព្រម​ផ្ដល់​ផ្លូវដែក ដែល​ខ្លួន​ប្រើប្រាស់​រួច​ប្រវែង ១៤០ គីឡូម៉ែត្រ ដល់​ប្រទេស​កម្ពុជា​

1831

ភ្នំពេញ​៖ សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​ថ្លែង​ប្រាប់ថា ប្រទេស​ថៃ បាន​ឆ្លើយតប​ជា​វិជ្ជមាន ចំពោះ​ការស្នើសុំ​ផ្លូវដែក​ដែល​ប្រើប្រាស់​រួច​ប្រវែង ១៤០ គីឡូម៉ែត្រ​របស់​ថៃ ដើម្បី​យកមកប្រើ​ប្រាស់​ក្នុង​ការពង្រីក​ការតភ្ជាប់​ផ្លូវដែក នៅក្នុង​ប្រទេស​បន្ថែមទៀត​។​

ការលើកឡើង​របស់ សម្ដេច​តេ​ជោ ហ៊ុន សែន បាន​ធ្វើឡើង​នៅក្នុង​ពិធីបើកការដ្ឋាន​សាងសង់​អគារ​ច្រកទ្វារព្រំដែន​ស្ទឹង​បត់ និង​ផ្លូវ​ត​ភ្ជាប់​ទៅ​ផ្លូវជាតិ​លេខ ៥ ដែល​រួមមាន ពិធី​ចុះហត្ថលេខា​លើ​កិច្ចព្រមព្រៀង​ប្រតិបត្តិការ​រួមគ្នា លើ​ការដឹកជញ្ជូន​ផ្លូវដែក​ឆ្លងកាត់​ព្រំដែន និង​ពិធី​ប្រគល់​ទទួល​ក្បាលរថភ្លើង ១ គ្រឿង ព្រមទាំង​ទូ​ដឹក​អ្នកដំណើរ​ចំនួន ៤​ទូ កាលពី​ថ្ងៃទី​២២ ខែមេសា ឆ្នាំ​២០១៩ កន្លងទៅនេះ​។​

​សម្ដេច​តេ​ជោ ហ៊ុន សែន បាន​ប្រសាសន៍ថា​៖ “​អម្បាញ់មិញ​យើង​ក៏បាន​ទទួល​នូវ​ការឆ្លើយតប​ជា​វិជ្ជមាន តាមរយៈ​សំណើ​របស់ខ្ញុំ ជូន​ចំពោះ​នាយករដ្ឋមន្ត្រី​នៃ​ព្រះរាជាណាចក្រ​ថៃ ឯកឧត្តម ប្រា​យុ​ធ ចាន​-​អូ​ចា និង​តាមរយៈ​ឯកឧត្តម​រដ្ឋមន្ត្រីក្រសួង​ដឹកជញ្ជូន​ថៃ​នោះ មិត្ត​ថៃ​មាន​នៅសល់​ផ្លូវដែក ១៤០ គីឡូម៉ែត្រ ព្រោះថា ដែក​ចាស់ៗ​របស់​ថៃ ត្រូវបាន​ដោះចេញ​ជំនួស​ដោយ​ដែក​ថ្មី អ៊ីចឹង​ទេ ចាស់​របស់​ថៃ ប៉ុន្តែ​ថ្មី​នៅ​កម្ពុជា​”​។​

សម្ដេច​តេ​ជោ ហ៊ុន សែន ក៏បាន​លើកឡើង​ផងដែរ​ថា ផ្លូវដែក​នៅ​ប៉ោយប៉ែត ក៏​ជា​ផ្លូវដែក​ចាស់​របស់​ប្រទេស​ម៉ាឡេស៊ី ប៉ុន្តែ​ជា​ផ្លូវដែក​ថ្មី​នៅ​ប្រទេស​កម្ពុជា​ដែរ ដោយ​ប្រទេស​ម៉ាឡេស៊ី បានផ្តល់​ឲ្យ​ប្រទេស​កម្ពុជា​នូវ​ផ្លូវដែក​ចំនួន ២០០ តោន​។​

​ជាមួយគ្នានេះដែរ សម្ដេច​តេ​ជោ ហ៊ុន សែន ក៏បាន​ឲ្យ​ដឹងផង​ដែរ​ថា នៅពេល​ខាងមុខ​ឆាប់ៗ​នេះ កម្ពុជា​-​ថៃ អាច​នឹង​បើក​ច្រកព្រំដែន​ថ្មី ៤ បន្ថែមទៀត​រួមមាន ច្រក​អានសេះ នៅក្នុង​ខេត្តព្រះវិហារ​, ច្រក​ជប់​គគី នៅក្នុង​ខេត្ត​ឧ​ត្ត​រ​មានជ័យ​, ច្រក​ភ្នំ​ដី នៅក្នុង​ខេត្តបាត់ដំបង និង​ច្រក​ថ្មដា នៅក្នុង​ខេត្តពោធិ៍សាត់​។​

​គួរ​រំ​ម្លឹ​ក​ផងដែរ​ថា រាជរដ្ឋាភិបាល​កម្ពុជា បាន​ស្តារឡើងវិញ​រួចរាល់ ១០០% ហើយ ចំពោះ​កំណាត់​ផ្លូវដែក​ភ្នំពេញ​-​ប៉ោយប៉ែត ព្រំដែន​កម្ពុជា​-​ថៃ ដែលមាន​ប្រវែង ៣៨៦ គីឡូម៉ែត្រ ហើយ​ផ្លូវដែក​នេះ រួម​ជាមួយនិង​ហេដ្ឋារចនាសម្ព័ន្ធ នៅ​ច្រកទ្វារព្រំដែន​អន្តរជាតិ ស្ទឹង​បត់ – បាន​ណង​អៀន ត្រូវបាន​រាជរដ្ឋាភិបាល​កម្ពុជា រំពឹងទុក​ថា នឹង​ដើរតួនាទី​យ៉ាងសំខាន់ ក្នុង​ការជួយ​ជំរុញ​កំណើនសេដ្ឋកិច្ច ការដោះដូរ​ពាណិជ្ជកម្ម និង​ការវិនិយោគ​រវាង​កម្ពុ​ជា​-​ថៃ និង​បណ្តា​ប្រទេស នៅក្នុង​មហា​អនុតំបន់​ទន្លេមេគង្គ​៕