ខេត្តព្រះសីហនុ៖ រថភ្លើងស៊េរីទំនើប ៣គ្រឿង ដែលក្រុមហ៊ុន Royal Railway Cambodia បានបញ្ជាទិញ ពីប្រទេសម៉ិកស៊ិក បានដឹកមកដល់កំពង់ផែស្វយ័ត ក្រុងព្រះសីហនុ និងបានស្ទូចដាក់លើផ្លូវរថភ្លើង រួចរាល់អស់ កាលពីព្រឹកថ្ងៃទី០៩ ខែមករា ឆ្នាំ២០១៩ នេះហើយ។
![](http://cambodianews.today/wp-content/uploads/2019/01/fn-2019-01-09-09-56-22-0.jpg)
រថភ្លើងស៊េរីទំនើបនេះ នឹងប្រើប្រាស់សម្រាប់ដឹកអ្នកដំណើរ ពីស្ថានីយរថភ្លើង រាជធានីភ្នំពេញ ឆ្ពោះទៅកាន់អាកាសយានដ្ឋានអន្តរជាតិភ្នំពេញ។
រថភ្លើង Tramway ថ្មីនេះ មានក្បាលម៉ាស៊ីនចំនួនពីរ គឺមុខមួយ និងក្រោយមួយ ហើយមានបច្ចេកវិទ្យាចុងក្រោយបំផុត ប្រកបដោយសុវត្ថិភាពខ្ពស់ និងទំនើប ដូចជា៖ ទ្វារស្វ័យប្រវត្តិ, ជណ្តើរ, កៅអី, ម៉ាស៊ីនត្រជាក់, បន្ទប់ទឹក, កន្លែងដាក់អីវ៉ាន់, ប្រព័ន្ធ WiFi, ទូរទស្សន៍ និងប្រព័ន្ធផ្ដល់ព័ត៌មានតាមវីដេអូ និងរត់បានល្បឿនលឿន ដោយចំណាយពេលត្រឹមតែ២៥នាទីប៉ុណ្ណោះ ពីស្ថានីយរថភ្លើងរាជធានីភ្នំពេញ ទៅព្រលានយន្តហោះអន្តរជាតិភ្នំពេញ។
![](http://cambodianews.today/wp-content/uploads/2019/01/fn-2019-01-09-09-56-22-5.jpg)
គួររំលឹកថា ដើម្បីសម្រួលការធ្វើដំណើររបស់អ្នកដំណើរ ទៅកាន់អាកាសយានដ្ឋានអន្តរជាតិភ្នំពេញ កាលពីថ្ងៃអង្គារ ទី១០ ខែមេសា ឆ្នាំ២០១៨ កន្លងទៅរាជរដ្ឋាភិបាលកម្ពុជា តាមរយៈក្រសួងសាធារណការ និងក្រុមហ៊ុន Royal Railway បានដាក់ឱ្យដំណើរការ រថភ្លើងធុនស្រាលដឹកអ្នកដំណើរ ពីស្ថានីយនៅក្នុងសង្កាត់ស្រះចក ទៅកាន់អាកាសយានដ្ឋានអន្តរជាតិភ្នំពេញ ដែលជាទូទៅក្នុងមួយថ្ងៃ ជើងរថភ្លើងនេះ អាចរត់បានជាមធ្យម ២០ជើង៕
![](http://cambodianews.today/wp-content/uploads/2019/01/fn-2019-01-09-09-56-22-1.jpg)