ផ្លូវ​ល្បឿន​លឿន ភ្នំពេញ​-​ព្រះសីហនុ តម្លៃ​១៩០០​លាន​ដុល្លារ នឹង​ចាប់ផ្ដើម​សាងសង់​នៅ​ខែកុម្ភៈ​

1556

ភ្នំពេញ៖ ផ្លូវ​ល្បឿនលឿន ភ្នំពេញ-ព្រះសីហនុ ត្រូវបាន លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តី​ក្រសួង​សាធារណការ និង​ដឹកជញ្ជូន រំពឹងថា នឹងអាច​បើក​ការដ្ឋាន​សាងសង់​ នៅក្នុង​អំឡុងខែ​កុម្ភៈ ឬដើមខែ​មីនា ខាងមុខ​នេះ។ លោកទេសរដ្ឋមន្រ្តី បានថ្លែង​ដូច្នេះ ក្នុង​ពិធី​បើក​សន្និបាត​បូកសរុប​ការងារ របស់ក្រសួងសាធារណការ និង​ដឹកជញ្ជូន​ឆ្នាំ​២០១៨ និង​ទិសដៅ​ការងារ​ឆ្នាំ​២០១៩ នៅ​ព្រឹកថ្ងៃទី​៩ ខែ​មករា ឆ្នាំ​២០១៩។

លោក​ទេសរដ្ឋមន្រ្តី​បន្តថា គ្រឿងចក្រ​ នឹងមកដល់នៅដំណាច់ខែ​មករា​ខាងមុខ​នេះ ឯ​អ្នក​បច្ចេកទេស-វិស្វកម្ម​ចិនប្រហែលបានមកដល់អស់ហើយ តែខាងរដ្ឋាភិបាល ​មិនទាន់​បាន​ដោះស្រាយ​ផល​ប៉ះពាល់​ លើបញ្ហា​ដីធ្លី​រួចរាល់​នៅឡើយទេ និងកំពុងតែ​រៀបចំ​ជំរុញការងារនេះ ដើម្បី​អាច​បើក​ការដ្ឋាន​បាន។ 

ផ្លូវ​ល្បឿន​លឿន ភ្នំពេញ-ព្រះសីហនុ ​នេះ គ្រោង​នឹង​ចំណាយ​ថវិកា​ប្រមាណ ១៩០០លាន​ដុល្លារ ទទួលការ​សាងសង់​ដោយ​ក្រុមហ៊ុន​ចិន ក្នុង​រូបភាព​វិនិយោគ​សាងសង់-ធ្វើអាជីវកម្ម-ផ្ទេរ (BOT)។

គម្រោង​ផ្លូវ​ល្បឿនលឿន​នេះ នឹងឆ្លងកាត់ ៤​រាជធានី​ខេត្ត រួមមាន៖ រាជធានី​ភ្នំពេញ, ខេត្ត​កណ្តាល, ខេត្ត​កំពង់ស្ពី, ខេត្ត​ព្រះសីហនុ ក្នុងនោះ​គឺ​ឆ្លងកាត់ ៦​ស្រុក ១​ខណ្ឌ ២​ក្រុង ៣១​ឃុំ/សង្កាត់ និង​១១០​ភូមិ។ ស្ដង់ដារផ្លូវ​ល្បៀនលឿន​នេះ គឺក្រាល​​បេតុង​កៅស៊ូ AC មាន​ប្រវែង​សរុប​ជាង ១៩០​គីឡូម៉ែត្រ (គិតរួម​ទាំង​ស្ពាន និង​លូ​ទាំងអស់) ហើយមាន​ទទឹង​សរុប ២៤,៥​ម៉ែត្រ ក្នុងនោះ​មាន​គន្លង​ផ្លូវ​រថយន្ត (២x៣,៧៥​ម៉ែត្រ) សងខាង ជាយផ្លូវ​កៅស៊ូ​២ (២x២,៥ម៉ែត្រ) សម្រាប់​ម៉ូតូ ជាយ​ផ្លូវ​ដីក្រហម ២(២x០,៧៥) សម្រាប់​ថ្មើរជើង និង​សួន​នៅ​អ័ក្ស​កណ្តាល​ទ្រូងផ្លូវ ៣​ម៉ែត្រ ព្រម​ទាំង​មាន​ស្ពាន ៨៩​កន្លែង។

ផ្លូវ​ល្បឿនលឿន​នេះ ​មាន​កន្លែង​សម្រាប់​ឈប់​សម្រាក​ចំនួន​៤​កន្លែង និង​ស្ថានីយ​ប្រេង​ឥន្ធនៈ ៣​កន្លែង។ ផ្លូវនេះ​ក៏មាន​របង​អម​តាម​សងខាង​ផ្លូវនោះ​ដើម្បី​ការពារ​សត្វ​ពាហនៈ​ឆ្លងកាត់ និង​របាំង​ការពារ​សំឡេង​រំខាន​ សរុប​ប្រហែល​​ ៥៧,១៩​គីឡូម៉ែត្រ ព្រមទាំង​មាន​កន្លែង​មនុស្ស និង​សត្វ​ព្រៃ​ឆ្លងកាត់​ចំនូន ៣៥២​កន្លែង​ផងដែរ៕