ភ្នំពេញ៖ អង្គភាពប្រឆាំងអំពើពុករលួយ (ACU) ដែលមានលោកទេសរដ្ឋមន្ត្រី ឱម យ៉ិនទៀង ជាប្រធាន បានអះអាងថា កម្លាំងជំនាញរបស់អង្គភាពប្រឆាំងអំពើពុករលួយ បានបើកការស៊ើបអង្កេតតាំងពីមានតម្រុយមុននេះម្ល៉េះ លើអតីតមេបញ្ជាការកងរាជអាវុធហត្ថខេត្តរតនគិរី លោក គឹម រស្មី។ ការបើកការស៊ើបអង្កេតនេះ គឺមិនមែនធ្វើតាមពាក្យបណ្តឹងរបស់ អង្គការសង្គមស៊ីវិលមួយណានោះទេ។
លោកទេសរដ្ឋមន្ត្រី ឱម យ៉ិនទៀង បានថ្លែងបែបនេះនៅក្នុងជំនួបសម្ភាសផ្តាច់មុខជាមួយសារព័ត៌មាន Fresh News កាលពីព្រឹកថ្ងៃទី១១ ខែកុម្ភៈ ឆ្នាំ២០១៩ កន្លងទៅនេះ។
![](https://www.cambodianews.today/wp-content/uploads/2019/02/fn-2019-02-11-08-56-37-0-1024x648.jpg)
អង្គភាពប្រឆាំងអំពើពុករលួយ
គួររំម្លឹកថា កាលពីយប់ថ្ងៃទី០៥ ខែកុម្ភៈ ឆ្នាំ២០១៩ លោក គឹម រស្មី មេបញ្ជាការអាវុធហត្ថខេត្តរតនគិរី បានប្រកាស ចែកប្រាក់ដល់កូនៗចំនួន៥នាក់រូប ដោយម្នាក់ៗទទួលបាន១០ម៉ឺនដុល្លារ សរុប៥០ម៉ឺនដុល្លារ នៅក្នុងពិធីខួបកំណើតមួយ។
កន្លងមិនបានប៉ុន្មានថ្ងៃក្រោយមក ព្រះមហាក្សត្រ នៃព្រះរាជាណាចក្រកម្ពុជា តាមសំណើទូលថ្វាយរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញព្រះរាជក្រឹត្យត្រាស់បង្គាប់ឲ្យលុបឈ្មោះ ឧត្តមសេនីយ៍ត្រី គឹម រស្មី មេបញ្ជាការអាវុធហត្ថខេត្តរតនគិរី ចេញពីក្របខ័ណ្ឌនៃកងយោធពលខេមរភូមិន្ទ ជាបន្ទាន់តែម្តង។
![](https://www.cambodianews.today/wp-content/uploads/2019/02/fn-2019-02-09-19-58-49-0.jpg)
ភ្លាមៗនោះ ប្រធានសមាគមជ័យលាភីបញ្ញាជនកម្ពុជា លោក រស់ សារ៉ុម ក៏បានដាក់ពាក្យប្តឹងអង្គភាពប្រឆាំងអំពើពុករលួយ កាលពីថ្ងៃទី០៩ ខែកុម្ភៈ ឆ្នាំ២០១៩ ដើម្បីឱ្យបើកការស៊ើបអង្កេតលើ លោក គឹម រស្មី អតីតមេបញ្ជាការអាវុហត្ថលើផ្ទៃប្រទេសរូបនេះផងដែរ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដាក់ចេញនូវអភិក្រមចំនួន ៥ នៅក្នុងអាណត្តិទី០៦នេះ គឺមាន ១៖ ឆ្លុះកញ្ចក់ ២៖ ងូតទឹក ៣៖ ដុសក្អែល ៤៖ ព្យាបាល និង៥៖ វះកាត់ និងមិនលើកលែងចំពោះមន្ត្រីខិលខូច ប្រព្រឹត្តខុសច្បាប់នោះឡើយ៕
![](https://www.cambodianews.today/wp-content/uploads/2019/02/fn-2019-02-09-19-49-58-0-768x1024.jpg)
ប្រភព៖ Fresh News