“កងកម្លាំង​នគរបាល​ទាំងអស់ ត្រូវ​កាត់សក់​ឲ្យ​ខ្លី” នេះ​គឺជា​បទបញ្ជា​

1367

ភ្នំពេញ​៖ យោងតាម​ការ​បង្ហោះ​នៅក្នុង​គណនី​ហ្វេ​ស​ប៊ុ​ករ​បស់ អគ្គ​ស្នងការរង​នគរបាលជាតិ និង​ជា​ស្នងការ​នគរបាល​រាជធានី​ភ្នំពេញ លោក​ឧ​ត្ត​ម​សេនីយ៍​ឯក ស ថេត កាលពី​ថ្ងៃទី​១៥ កក្កដា បាន​ឲ្យ​ដឹងថា កងកម្លាំង​នគរបាល​ទាំងអស់ ដែល​ចំណុះ​ស្នងការដ្ឋាន​នគរបាល​រាជធានី​ភ្នំពេញ ត្រូវតែ​កាត់សក់​ឲ្យ​ខ្លី ឲ្យ​ស្របតាម​ផែន​ការណ៍​របស់​អគ្គស្ន​ង​ការ​នគរបាលជាតិ ឯកឧត្តម​នាយ​ឧ​ត្ត​ម​សេនីយ៍ សន្តិ​បណ្ឌិត នេ​ត សាវឿន​។​

លោក​ឧ​ត្ត​ម​សេនីយ៍​ឯក ស ថេត

​លោក​ឧ​ត្ត​ម​សេនីយ៍​ឯក ស ថេត បាន​បង្ហោះ​ថា​៖ “​តាម​ផែន​ការណ៍​របស់​អគ្គស្ន​ង​ការ​នគរបាលជាតិ ឯកឧត្តម​នាយ​ឧ​ត្ត​ម​សេនីយ៍ សន្តិ​បណ្ឌិត នេ​ត សាវឿន បាន​ណែនាំ​ឲ្យ​កម្លាំង​នគរបាល​ទាំងអស់ ត្រូវ​កាត់សក់​ខ្លី ដូច្នេះ​កម្លាំង​នគរបាល​ចរាចរណ៍ និង​កម្លាំង​នគរបាល​ទេសចរណ៍​នៃ​ស្នងការដ្ឋាន​នគរបាល​រាជធានី​ភ្នំពេញ ត្រូវ​អនុវត្តន៍​មុនគេ​”​។​

​បន្ថែម​ពីនេះ​ទៅទៀត លោក ស ថេត បានបញ្ជាក់​ទៀតថា កងកម្លាំង​នគរបាល ត្រូវ​មក​គោរព​ទង់ជាតិ និង​ជាពិសេស​ត្រូវ​ស្លៀកពាក់​ឲ្យ​បាន​ត្រឹមត្រូវ តាម​ឯកសណ្ឋាន​របស់​នគរ​បាល ចំណែក​កងកម្លាំង​នគរបាល​អន្តរាគមន៍ ត្រូវតែ​នាំគ្នា​ហាត់ប្រាណ​ជាប្រចាំ នៅពេល​ល្ងាច ដើម្បី​សុខភាព​ផង និង​ឲ្យ​រាងកាយ​មាំមួន​ផង​។​

កាត់សក់

​ក្រោយពី​ការប្រកាស​របស់ លោក​ឧ​ត្ត​ម​សេនីយ៍​ឯក ស ថេត កាលពី​ថ្ងៃទី​១៥ កក្កដា​រួចមក នៅ​ថ្ងៃទី​១៦ កក្កដា នេះ នគរបាល​ទេសចរណ៍ និង​ក្រុម​អន្តរាគមន៍​នៃ​ស្នងការដ្ឋាន​នគរបាល​រាជធានី​ភ្នំពេញ បានអនុវត្ត​ការ​កាត់សក់​ឲ្យ​ខ្លី​មុនគេ​បង្អស់​។​

លោក ស ថេត បាន​បញ្ជាក់ប្រាប់ទៅកាន់កងកម្លាំងនគបាលទាំងអស់ថា នឹងធ្វើ​ការត្រួតពិនិត្យ​លើ​បទបញ្ជា​នេះ នៅ​ថ្ងៃ​ចន្ទ​សប្តាហ៍​ក្រោយ នៅក្នុងពេល​គោរព​ទង់ជាតិ​៕​