សម្ដេច ស ខេង​៖ ការប្រយុទ្ធ​ប្រឆាំងនឹង​ការលាង​លុយ យើង​អត់​ត្រូវ​រាថយ​ទេ

571

​​ភ្នំពេញ​៖ សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បាន​ជំរុញ​ឲ្យ​សមត្ថកិច្ច មិនត្រូវ​រាថយ​ចំពោះ​ការប្រយុទ្ធប្រឆាំង នឹង​សកម្មភាព​លាង​លុយ និង​ការសម្អាត​លុយ តាម​ច្រកទ្វារ​អន្តរជាតិ​ចេញចូល​ទូទាំងប្រទេស​។​

​ការលើកឡើង​របស់​ស​ម្តេច​ក្រឡាហោម ស ខេង បាន​ធ្វើឡើង​ក្នុងឱកាស​អញ្ជើញ​ជា​អធិបតី​ក្នុង​កិច្ចប្រជុំ​ផ្សព្វផ្សាយ​លទ្ធផល​ការងារ ដកហូត​ឯកសារ​រដ្ឋបាល​កម្ពុជា​មិន​ប្រក្រតី ដែល​ជនបរទេស​កាន់កាប់​ប្រើប្រាស់ និង​ការទទួល​ពាក្យសុំ​ប្រកាស​ទទួលស្គាល់ ជា​ជនបរទេស​អន្តោ​ប្រវេ​សន្ត និង​ប័ណ្ណ​ស្នាក់នៅ​អចិន្ត្រៃយ៍ កាល​ថ្ងៃទី​១៧ ខែកក្កដា ឆ្នាំ​២០១៩ កន្លងទៅនេះ​។​

សម្តេច​ក្រឡាហោម ស ខេង

សម្តេច​ក្រឡាហោម ស ខេង បាន​ថ្លែងថា​៖ “​បើ​និយាយ​ពី​គោលការណ៍​របស់​យើង ច្បាប់​ក៏មាន​គោលការណ៍ គោលនយោបាយ ទិសដៅ​របស់​រាជរដ្ឋាភិបាល​ក៏មាន ដែល​យើង​អត់​ត្រូវ​រាថយ​ទេ​។ អត់​ត្រូវ​រាថយ​ទេ​បញ្ហា​នេះ ពីព្រោះ​វា​ពាក់ព័ន្ធ​ដល់​កិត្តិយស​មុខមាត់ ពាក់ព័ន្ធ​នឹង​ច្បាប់​អន្តរជាតិ​ទៀត​។ ដូច​ខ្ញុំ​ធ្លាប់បាន​លើកឡើងថា បើសិនជា​គេ​ចាត់ទុក​កម្ពុជា ជា​ប្រទេស​ដែល​លាង​លុយ ជា​ប្រទេស​ដែល​ខ្មៅ នោះ​យើង​នឹង​ប៉ះពាល់​ដល់​ប្រព័ន្ធ​ធនាគារ​របស់​យើង រាប់ទាំង​ធនាគារជាតិ​ផង មិនថាតែ​ធនាគារឯកជន​ទេ​។ ជា​ឧបសគ្គ​មួយ​ធំ​ណាស់​”​។​

​សម្តេច​ក្រឡាហោម ស ខេង បាន​ប្រាប់​ទៅ​សមត្ថកិច្ច​គ្រប់លំដាប់​ថ្នាក់​ឲ្យ​គិតពី​ផលប្រយោជន៍​ជាតិ​ជាធំ ដោយ​សង្កត់ធ្ងន់ថា ៖ “​យកចិត្តទុកដាក់​អនុវត្តន៍​ឱ្យបាន​។ មិនត្រូវ​ស៊ុ​គ្រ​លុំ វា​បាន​ផលប្រយោជន៍​ទៅ​បុគ្គល បុគ្គល​នេះ បុគ្គល​នោះ​អ៊ីចឹង​មែន ប៉ុន្តែ​យើង​ត្រូវ​គិតដល់​ផលប្រយោជន៍​ជាតិ​ជាធំ ផលប្រយោជន៍​ប្រជាពលរដ្ឋ​ជាធំ​។ អ៊ីចឹង​ហើយ​ត្រូវ​ប្តេជ្ញា​ធ្វើ​បញ្ហា​នេះ​ឱ្យបាន​”​។​

​គួរ​រំ​ម្លឹ​ក​ផងដែរ​ថា គិត​រហូតដល់​ពេលនេះ សមត្ថកិច្ច​បង្ក្រាប​លុយ​ខុសច្បាប់ ដែល​នាំ​ចូលមក​ប្រទេស​កម្ពុជា នៅតាម​ច្រក​អន្តរជាតិ មាន​ចំនួន​សរុប ៧.៤​លាន​ដុល្លារ​អាមេរិក​ហើយ​។ លុយ​ទាំងនោះ ត្រូវបាន​យកទៅ​តម្កល់ទុក​នៅ​ធនាគារជាតិ ដើម្បី​ស្រាវជ្រាវ​រក​ប្រភពដើម ចំណែកឯ​ជនល្មើស​នាំ​លុយ​ខុសច្បាប់ ក៏​ត្រូវបាន​ឃុំខ្លួន​ផងដែរ​៕ ​