ប្រាសាទអង្គរវត្ត គឺជា​ម៉ាស៊ីន​រកលុយដ៏​សំខាន់ របស់​ប្រទេស​កម្ពុជា​

3892

ប្រាសាទអង្គរវត្ត ស្ថិតនៅក្នុង​ខេត្តសៀមរាប នៃ​ប្រទេស​កម្ពុជា នៅតែ​បន្ត​រកបាន​ប្រាក់ចំណូល ខាង​ផ្នែក​ទេសចរណ៍​សម្រាប់​ប្រទេស​កម្ពុជា ដែលកើន​ឡើងជា​រៀងរាល់ឆ្នាំ បើទោះបីជា​ការលក់​សំបុត្រ ចូល​ទស្សនា​សម្រាប់​ភ្ញៀវបរទេស មានការ​ដំឡើងថ្លៃ​យ៉ាងណាក៏ដោយ ក៏​នៅតែ​មាន​ភ្ញៀវ​បរទេស បាន​ទិញ​សំបុត្រ​ចូល​ទស្សនា ស្ថាបត្យកម្ម​ដ៏​អស្ចារ្យ មួយ​គ្មាន​ពី​រលើ​លោក​នេះដែរ​។​

​អាជ្ញាធរ​មូលដ្ឋាន ដែល​គ្រប់គ្រង​តំបន់​ប្រាសាទអង្គរវត្ត បាន​ព្យាករណ៍​ថា តួរ​លេខ​នៃ​ប្រាក់ចំណូល អាច​កើន​ដល់ 117 លាន​ដុល្លារ​អាមេរិក​នៅ​ចុងឆ្នាំនេះ ដោយមាន​ភ្ញៀវទេសចរបរទេស​ប្រហែល ២.៦​លាន​នាក់ បានមក​ទស្សនា​ប្រាសាទអង្គរវត្ត​។​

ប្រាសាទអង្គរវត្ត

​ប្រាសាទអង្គរវត្ត នៅតែ​ជា​អ្នក​រកចំណូលបាន​ រាប់លាន​ដុល្លារ​សម្រាប់​ប្រទេស​កម្ពុជា បើ​ប្រៀបធៀប​ទៅនឹង​តំបន់​បេតិកភណ្ឌ​ពិភពលោក ២​កន្លែង​ផ្សេងទៀត​គឺ ប្រាសាទព្រះវិហារ​ ​ដែល​ស្ថិតនៅក្នុង​ខេត្តព្រះវិហារ និង​តំបន់​បុរាណវិទ្យា ប្រាសាទសំបូរព្រៃគុក ស្ថិតនៅក្នុង​ខេត្តកំពង់ធំ​។​

​លោកនាយក​ប្រតិ​ប​ត្ត របស់គ្រឺះ​ស្ថាន​អង្គរ បាន​ឲ្យ​ដឹងថា​៖ “​ភ្ញៀវទេសចរ មាន​កំណើន ៧% ក្នុងឆ្នាំនេះ ហើយ​ភ្ញៀវទេសចរមកពី ១៩៣ប្រទេស បានមក​ទស្សនា​ប្រាសាទអង្គរវត្ត ហើយ ៤៣% នៃ​អ្នកទេសចរ​សរុប គឺជា​ភ្ញៀវទេសចរ​មកពី​ប្រទេស​ចិន​។​”

​លោក​បន្តថា​៖ “​ភ្ញៀវទេសចរ​បរទេស នៅតែ​មក​មើល​បេ​តិក​ភ័​ណ្ឌ​ពិភពលោក ប្រាសាទអង្គរវត្ត ហើយ​នៅក្នុង​កំឡុងពេល​រដូវ​ការ​មនុស្ស​ច្រើន គឺថា​ភ្ញៀវទេសចរ​ពេញ​តែម្ដង សូម្បីតែ​សណ្ឋាគារ​ក៏​ពិបាក​កក់​បន្ទប់​ដែរ​។​”

​ក្នុង​ខែកុម្ភៈ​ឆ្នាំ ២០១៧ អាជ្ញាធរ​បាន​ដំឡើង​តម្លៃ​ចូល​ទស្សនា ប្រាសាទអង្គរវត្ត ដែលជា​បេតិកភណ្ឌ​ពិភពលោក សម្រាប់​ភ្ញៀវទេសចរ​បរទេស រហូតដល់ ៣៧​ដុល្លារ​អាមេរិក សម្រាប់​សំបុត្រ​មួយថ្ងៃ តម្លៃ ៦២​ដុល្លារ​អាមេរិក សម្រាប់​សំបុត្រ​បី​ថ្ងៃ និង ៧២​ដុល្លារ សម្រាប់​តម្លៃ​សំបុត្រ ​ចូល​ទស្សនា​រយៈពេល​មួយ​សប្តាហ៍​។​

​កាលពីមុន តម្លៃ​ចូល​ទស្សនា ប្រាសាទអង្គរវត្ត គឺ ២០​ដុល្លារ​អាមេរិក​, ៤០​ដុល្លារ​អាមេរិក និង ៦០​ដុល្លារ​អាមេរិក​ប៉ុណ្ណោះ។​

ការមកដល់​ទស្សនារ​បស់​ភ្ញៀវទេសចរ នៅ​ប្រាសាទ​អង្គរវត្ត បានបង្ហាញ​សញ្ញា​នៃ​ការធ្លាក់ចុះ​នៅក្នុង​ឆ្នាំ ២០១៨ ប្រហែល ៧% បើ​ប្រៀបធៀប​ទៅនឹង​កំណើន ១២% នៅក្នុង​ឆ្នាំ ២០១៧​។​

​គ្រឹះស្ថាន​អង្គរ បាន​ឲ្យ​ដឹង​ទៀតថា​៖ “​វា​លំបាក​ណាស់​សម្រាប់​យើង ក្នុងការ​រក្សា​កំណើន​ពីរ​ខ្ទង់​ជា​រៀងរាល់ឆ្នាំ សម្រាប់​ភ្ញៀវទេសចរ មក​ទស្សនា​ប្រាសាទអង្គរវត្ត ដែល​វា​មិន​ដូច​ការទិញ​ទំនិញ​នៅ​ផ្សារ​ទំនើប ក្នុងប្រទេស​សិង្ហ​បុរី​ ឬ​ម៉ាឡេស៊ី​នោះទេ​។ យើង​ត្រូវ​ការរំពឹង​ទៅលើអ្នកដំណើរ​ថ្មី និង​ត្រូវ​សាងសង់​ហេដ្ឋារចនាសម្ព័ន្ធ​បន្ថែមទៀត​។​”

​អាជ្ញាធរ​កំពុង​ងាក​ទៅរក ការប្រើប្រាស់​បច្ចេកវិទ្យា សម្រាប់​ការលក់​សំបុត្រ​ចូល​ទស្សនា​ប្រាសាទ​អង្គរវត្ត ដើម្បី​ទ្រទ្រង់​លំហូរ​ភ្ញៀវទេសចរ ​កើនឡើងជា​រៀងរាល់ឆ្នាំ​។​

​​គ្រឹះស្ថាន​អង្គរ បាន​ព្យាយាម​ធ្វើ​ឲ្យ​មាន​ភាពងាយស្រួល សម្រាប់​ការទិញ​សំបុត្រ ចូល​ទស្សនា​ប្រាសាទអង្គរវត្ត ដោយ​អនុញ្ញាត​ឲ្យ​សណ្ឋាគារ​លក់​សំបុត្រ និង​ផ្សព្វផ្សាយ​ការ​កក់​សំបុត្រ​តាម​អ៊ី​ន​ធឺ​ណែ​ត ដែល​កំពុងតែ​សាកល្បង​អនុវត្ត មុន​ពេលដែល​ប្រព័ន្ធ​នេះ​ដំណើរការ​ពេញលេញ​។​

​បច្ចុប្បន្ន​អ្នកទេសចរ ត្រូវ​ទៅ​ទិញ​សំបុត្រ​របស់​ពួកគេ នៅ​គ្រឺះ​ស្ថាន​អង្គរ នៅក្នុង​ខេត្តសៀមរាប ដែលមាន​ចំងាយ​ប្រហែល ៥ គីឡូម៉ែត្រ ពី​ទីតាំង​ប្រាសាទ ដែល​វា​អាចមាន​ភាព​ពិបាក នៅពេលដែល​បញ្ជរ​ទិញ​សំបុត្រ​ពេញ ក្នុងអំឡុង​រដូវ​មាន​ភ្ញៀវទេសចរ​ច្រើន​។​

​ជាមួយគ្នានេះដែរ រដ្ឋាភិបាល​កម្ពុជា បាននិងកំពុង​អនុវត្ត​ផែនការមេ​យុទ្ធសាស្ត្រ អភិវឌ្ឍន៍​ទេសចរណ៍ ឆ្នាំ ២០១២ ដល់​ឆ្នាំ ២០២០ ដើម្បី​អភិវឌ្ឍ​ឧស្សាហកម្ម​នៅតាម​បណ្តា​ខេត្ត និង​ក្រុង ក្នុងការ​ទាក់ទាញ​ការវិនិយោគ​បន្ថែមទៀត ដើម្បី​កែលម្អ​ហេដ្ឋារចនាសម្ព័ន្ធ និង​បង្កើត​ផលិតផល​ទេសចរណ៍​ថ្មី​៕