កម្ពុជា នឹង​រៀបចំ​កម្មវិធី​ថ្នាក់ជាតិ​ដ៏​ធំ​មួយ ឈ្មោះថា “​ឌីជីថល​កម្ពុជា ២០១៩ (Digital Cambodia 2019)”

1725

ភ្នំពេញ​៖ វិទ្យាស្ថាន​ជាតិ​ប្រៃសណីយ៍ ទូរគមនាគមន៍ បច្ចេកវិទ្យា​គមនាគមន៍ និង​ព័ត៌មាន (NIPTICT) បានប្រកាស​អំពី​ការរៀបចំ​កម្មវិធី​ថ្នាក់ជាតិ​ដ៏​ធំ​មួយ ដែល​មិន​ធ្លាប់មាន​កាលពីមុន​មក ឈ្មោះថា “​ឌីជីថល​កម្ពុជា ២០១៩ (Digital Cambodia 2019)” ចាប់ពី​ថ្ងៃទី ១៥ ដល់ ថ្ងៃទី​១៧ ខែមីនា ឆ្នាំ​២០១៩ នៅ​សាល​ពិព័រណ៍​កោះ​ពេជ្រ​។​

ការប្រកាស​នេះ​បាន​ធ្វើឡើង​នៅក្នុង​សន្និសីទ​សារព័ត៌មាន ស្ថី​អំពី​កម្មវិធី “​ឌីជីថល​កម្ពុជា ២០១៩ (Digital Cambodia 2019)”​ កាលពីសប្ដាហ៍មុន ក្រោម​អធិបតីភាព លោក កាន ច័ន្ទ​មេត្តា រដ្ឋលេខាធិការ​ក្រសួង​ប្រៃសណីយ៍​និង​ទូរគមនាគមន៍ (​ក្រសួង ប​.​ទ​.) និង​ជា​អនុប្រធាន​ទី​១ នៃ​ក្រុមប្រឹក្សា​មូលនិធិ​ស​.​អ​. តំណាង​ដ៏​ខ្ពង់ខ្ពស់ លោក ត្រាំ អ៊ីវតឹក រដ្ឋមន្ត្រីក្រសួង ប​.​ទ​. និង​ជា​ប្រធាន​ក្រុមប្រឹក្សា​មូលនិធិ ស​.​អ​. អមដោយលោក ជុន វ៉ាត អគ្គនាយក​នៃ​អគ្គនាយដ្ឋាន​បច្ចេកវិទ្យា​គមនាគមន៍​និង​ព័ត៌មាន​និង​ជា​ប្រធាន​លេខាធិការដ្ឋាន​នៃ​ក្រុមប្រឹក្សា​មូលនិធិ ស​.​អ​. លោក សេង សុភាព ប្រធាន​វិទ្យាស្ថាន​ជាតិ NIPTICT និង​ជា​សេនាធិការ​អនុវត្ត​គម្រោង ស​.​អ​. តំណាង​ក្រុមហ៊ុន Smart Axiata និង​តំណាង​ក្រុមហ៊ុន Viettel (Cambodia)​។​

សន្និសីទ​សារព័ត៌មាន ស្ថី​អំពី​កម្មវិធី “​ឌីជីថល​កម្ពុជា ២០១៩ (Digital Cambodia 2019)”

នៅក្នុង​សន្និសីទ​សារព័ត៌មាន​បានបញ្ជាក់​ថា កម្មវិធី Digital Cambodia 2019 នឹងត្រូវ​បានរៀបចំ​ចាប់ពី​ថ្ងៃទី ១៥ ដល់ ថ្ងៃទី​១៧ ខែមីនា ឆ្នាំ​២០១៩ នៅ​សាល​ពិព័រណ៍​កោះ​ពេជ្រ ដែលមាន​វិទ្យាស្ថាន​ជាតិ NIPTICT ជា​ម្ចាស់​កម្មវិធី​, គាំទ្រ​ដោយ​ក្រសួង​ចំនួន ០៦ រួមមាន ក្រសួង​ប្រៃសណីយ៍​និង​ទូរគមនាគមន៍​, ក្រសួង​សេដ្ឋកិច្ច​និង​ហិរញ្ញវត្ថុ​, ក្រសួង​អប់រំ យុវជន និង​កីឡា​, ក្រសួង​ឧស្សាហកម្ម​និង​សិប្បកម្ម​, ក្រសួងពាណិជ្ជកម្ម​, និង​ក្រសួង​ការងារ​និង​បណ្តុះបណ្តាល​វិជ្ជាជីវៈ ដោយ​ប្រើប្រាស់​កញ្ចប់​ថវិកា​មូលនិធិ ស​.​អ​. ដែលជា​ចំណែក​វិភាគទាន​ធំ​ទី​១​បង់​ដោយ​ក្រុមហ៊ុន Smart Axiata និង​ចំណែក​វិភាគទាន​ធំ​ទី​២​បង់​ដោយ​ក្រុមហ៊ុន Viettel (Cambodia) ព្រមទាំង​មានការ​ឧបត្ថម្ភ​ពី​ក្រុមហ៊ុន Huawei Technology (Cambodia) Co., Ltd. និង​ដៃគូ​មួយចំនួនទៀត​។ ព្រឹត្តិការណ៍​នេះ​ត្រូវបាន​សហការ​រៀបចំ​ដោយ​ក្រុមហ៊ុន Sabay Digital Corp. និង​ក្រុមហ៊ុន Two Way Public Relations ។​

​ការផ្ដួចផ្ដើម​ឲ្យ​មាន កម្មវិធី Digital Cambodia 2019 នេះ​ឡើង​ក្នុង​គោលបំណង​បង្កើត Platform ថ្នាក់ជាតិ​ដើម្បី​៖

១. បង្ហាញ​អំពី​បរិយាកាស និង Ecosystem ប្រកបដោយ​អំណោយផល និង​ភាព​ទាក់ទាញ​សម្រាប់​ការវិនិយោគ​វិស័យ​បច្ចេកវិទ្យា​គមនាគមន៍​និង​ព័ត៌មាន​នៅ​កម្ពុជា​,

២. បង្ហាញ​អំពី​វឌ្ឍនភាព​នៃ​ការអភិវឌ្ឍ​ក្របខណ្ឌ​គោលនយោបាយ​និង​គតិយុត្ត និង​ផលិតផល​និង​សេវា​ពាក់ព័ន្ធ​នឹង​បច្ចេកវិទ្យា​-​គមនាគមន៍​និង​ព័ត៌មាន​,

៣. បញ្ជ្រាប​អំពី​សារៈសំខាន់​និង​ភាព​មិនអាច​ខ្វះ​បាន​នៃ​វិស័យ​បច្ចេកវិទ្យា​គមនាគមន៍​និង​ព័ត៌មាន​ដល់​គ្រប់​មជ្ឈដ្ឋាន ជាពិសេស​យុវជន​និង​ស្ត្រី ក្នុងន័យ​ធ្វើឱ្យ​ប្រសើរឡើង​នៃ​ការអប់រំ​សម្រាប់​សិស្ស​-​និស្សិត និង​ជំនាញ​បច្ចេកទេស បង្កើន​ប្រសិទ្ធភាព​ការងារ​និង​ផលិតភាព និង​ពង្រឹង​ភាព​ប្រកួតប្រជែង​សហគ្រាស​ធុន​តូច​បំផុត ធុន​តូច និង​មធ្យម​របស់​កម្ពុជា​លើ​ឆាក​តំបន់​និង​អន្តរជាតិ​,

៤. កៀរគរ​គ្រប់​តួអង្គ​ពាក់ព័ន្ធ​ក្នុង​វិស័យ​ឧស្សាហកម្ម​បច្ចេកវិទ្យា​-​គមនាគមន៍​និង​ព័ត៌មាន រួមមាន ស្ថាប័ន​រាជរដ្ឋាភិបាល អ្នកវិនិយោគ​ជាតិ​និង​អន្តរជាតិ អាជីវកម្ម​ចាប់ផ្ដើម​ថ្មី (Startup) អ្នក​វិជ្ជាជីវៈ និង​គ្រឹះស្ថានសិក្សា​ស្រាវជ្រាវ ព្រមទាំង​សង្គម​ស៊ីវិល ដើម្បី​ផ្លាស់ប្តូរ​បទពិសោធន៍​និង​ឧ​ត្ត​មា​នុ​វត្ត​ន៍ និង​ពិភាក្សា​យោបល់​អំពី​និន្នាការ​ថ្មីៗ ក៏ដូចជា​អំពី​បញ្ហា​ប្រឈម​នានា​លើ​វិស័យ​ឧស្សាហកម្ម​បច្ចេកវិទ្យា​គមនាគមន៍​និង​ព័ត៌មាន​ក្នុង​ក្របខណ្ឌ​ជាតិ​និង​អន្តរជាតិ​,

៥. ជំរុញ​អំពី​សហគ្រិនភាព និង​នវានុវត្តន៍​ថ្មីៗ​,

​និង​៦. អភិវឌ្ឍ​បណ្តាញ​អាជីវកម្ម​រវាង​អាជីវកម្ម​ចាប់ផ្តើម​ថ្មី (Startup) ជាមួយ​សហគ្រាស​ធុន​តូច​បំផុត ធុន​តូច និង​មធ្យម​។​

​លោក ត្រាំ អ៊ីវតឹក រដ្ឋមន្ត្រីក្រសួង​ប្រៃសណីយ៍​និង​ទូរគមនាគមន៍ បានផ្តល់​ចំណាប់អារម្មណ៍​ចំពោះ​កម្មវិធី Digital Cambodia 2019 ថា “Digital Cambodia 2019 គឺជា​កម្មវិធី​ដែល​រៀបចំឡើង​ក្នុង​គោលបំណង​បង្ហាញ​ពី​សក្តានុពល និង​ភាព​រីកដុះដាល​នៃ​អាជីវកម្ម​បច្ចេកវិទ្យា​ក្នុងស្រុក ក៏ដូចជា​ដើម្បី​បង្កើត​បណ្តាញ​ទំនាក់ទំនង​និង​ទាញយក​ចំណាប់អារម្មណ៍​អ្នកវិនិយោគ​ខាងក្រៅ​ប្រទេស​ឱ្យ​ងាក​សម្លឹង​មក​កម្ពុជា​។ នេះ​ជាការ​បោះជំហាន​សម្រាប់​ការរៀបចំ​ខ្លួន​សម្រាប់​សេដ្ឋ​កិច្ច​ឌីជីថល​និង​ឆ្លើយតប​នឹង​បដិវត្តន៍​ឧស្សាហកម្ម​ទី​៤ ដែលមាន​កំណត់​ក្នុង​យុទ្ធសាស្ត្រ​ចតុកោណ​តំណាក់កាល​ទី​៤ សម្រាប់​រាជរដ្ឋាភិបាល​អាណត្តិ​ទី​៦​។ ក្រសួង​ប​.​ទ​. គាំទ្រ​នូវ​ការបង្កើត​នូវ​កម្មវិធី​ទំនាក់ទំនង​បែបនេះ​ក្រោម​ការប្រើប្រាស់​មូលនិធិ ស​.​អ​.​។ ក្នុង​ឆ្នាំ​២០១៩ និង​២០២០ ខាងមុខ មូលនិធិ ស​.​អ​. បាន​លៃលក​ថវិកា​មួយផ្នែក​សម្រាប់​ធ្វើឱ្យ​កាន់តែ​ប្រសើរឡើង​នូវ Ecosystem នៃ​ការបង្កើត​មុខរបរ​ខាង​ផ្នែក​បច្ចេកវិទ្យា​ក្នុងស្រុក​។ យើង​សង្ឃឹមថា​ប្រជាជន​កម្ពុជា​ជាច្រើន​នឹង​ទទួលបាន​ប្រយោជន៍​ពី​ការផ្តួចផ្តើម​ទាំងនេះ​។​”

លោក កាន ច័ន្ទ​មេត្តា រដ្ឋលេខាធិការ​ក្រសួង​ប្រៃសណីយ៍​និង​ទូរគមនាគមន៍

​ចំណែក​លោក កាន ច័ន្ទ​មេត្តា រដ្ឋលេខាធិការ​ក្រសួង​ប្រៃសណីយ៍​និង​ទូរគមនាគមន៍ បាន​មានប្រសាសន៍ថា “​ដើម្បី​ឆ្លើយតប​នឹង​គោលនយោបាយ​អភិវឌ្ឍន៍​វិស័យ​ទូរគមនាគមន៍​-​បច្ចេកវិទ្យា​គមនាគមន៍​និង​ព័ត៌មាន ឆ្នាំ​២០២០ និង​ក្របខណ្ឌ​ផែនការ​និង​ក្របខណ្ឌ​គតិយុត្ត​មួយចំនួនទៀត ក្រសួង​ប្រៃសណីយ៍​និង​ទូរគមនាគមន៍​បាន​ប្រឹងប្រែង​អនុវត្ត​នូវ​ផែនការ​ពង្រីក​ហេដ្ឋារចនាសម្ព័ន្ធ​ទូរគមនាគមន៍​ទូទាំង​ផ្ទៃ​ប្រទេស​រួមទាំង​ការពង្រឹង​នូវ​គុណភាព​សេវា​ស្របតាម​ការវិវត្ត​ន៍​របស់​បច្ចេកវិទ្យា​ទំនើប​, បាន​ចូលរួម​ជំរុញ​ការបណ្តុះបណ្តាល​ធនធាន​មនុស្ស​ជំនាញ​បច្ចេកទេស​, ព្រមទាំង​បាន​បង្កើត​បទដ្ឋាន​គតិ​យុត្ត​មួយចំនួន​ដើម្បី​ទ្រទ្រង់​ដល់​ការអភិវឌ្ឍ​ផ្នែក​ឌីជីថល​។ អ្វីដែល​សំខាន់​នោះ​គឺ​យើង​បាន​បង្កើត​យន្តការ​សហកា​រ​យ៉ាង​ស្អិតរ​មួ​ត​ជាមួយ​វិស័យ​ឯកជន​ដើម្បី​ជំរុញ​ការអភិវឌ្ឍ​វិស័យនេះ​។ ជា​ជំហាន​បន្ទាប់ ក្រសួង​នឹង​បន្ត​ប្រើប្រាស់​យន្តការ​ដែល​បាន​អនុវត្ត​ប្រកបដោយ​ជោគជ័យ​នាពេល​កន្លងមក និង​គិតគូរ​បន្ថែម​លើ​ការអភិវឌ្ឍ​ឧស្សាហកម្ម​បច្ចេកវិទ្យា​ក្នុងស្រុក​ឱ្យ​កាន់តែ​មាន​ភាព​សម្បូរបែប​តាមរយៈ​ការទាក់ទាញ​ការវិនិយោគ​ឧស្សាហកម្ម ប​.​គ​.​ព ខ្នាត​ធំ និង​ការធ្វើឱ្យ​ប្រសើរឡើង​នូវ​បរិ​យាស​កាស​អំណោយផល​ដល់​ការបង្កើត​អាជីវកម្ម​ចាប់ផ្តើម​ថ្មី (Startup)​ខាង​ផ្នែក​បច្ចេកវិទ្យា​ក្នុងស្រុក​។​”

វិទ្យាស្ថាន​ជាតិ NIPTICT ដែលជា​ម្ចាស់​កម្មវិធី​នេះ និង​មាន​លោក សេង សុភាព ជា​ប្រធាន បានលើកឡើង​ផងដែរ​ថា “Digital Cambodia 2019 នេះ មាន​សារៈសំខាន់​យ៉ាងខ្លាំង​ដល់​ការជួយ​ជំរុញ​កម្ពុជា​ឆ្ពោះទៅកាន់​ឧស្សាហកម្ម​ជំនាន់ ៤ តាមរយៈ ការពិភាក្សា​និង​ចែករំលែក​បទពិសោធន៍​ពី​អ្នកជំនាញ​ជាតិ​និង​អន្តរជាតិ​ដើម្បី​ឈានទៅ​បង្កើត​នូវ​បរិ​ដ្ឋា​ន​អំណោយផល​សម្រាប់​ការ​បំលាស់ប្តូរ​ទៅកាន់​ឌីជីថល​នៅ​កម្ពុជា​ដែល​នឹង​ជះឥទ្ធិពល​ជា​វិជ្ជមាន​ដល់​វិស័យសេដ្ឋកិច្ច​និង​សង្គម​តាមរយៈ​ការនាំមក​នូវ​គំរូ​អាជីវកម្ម​ដែលមាន​លក្ខណៈ​នវានុវត្តន៍ ការបង្កើន​លទ្ធភាព​ប្រកួតប្រជែង និង​ការបង្កើត​ការងារ​កាន់តែច្រើន​ដើម្បី​ជំរុញ​កំណើន​សេដ្ឋកិច្ចជាតិ​។​”

​គួរបញ្ជាក់​ផងដែរ​ថា Digital Cambodia 2019 នឹងមាន​ការចូលរួម​ពី​រដ្ឋមន្ត្រី​ទូរគមនាគមន៍ និង​ព័ត៌មានវិទ្យា​អាស៊ាន តំណាង​មកពី Regional ITU តំណាង​មកពី​លេខាធិការដ្ឋាន​អាស៊ាន ព្រមទាំង​មាន​វាគ្មិន​ប្រមាណ ៧០ រូប​។ កម្មវិធី​នេះ​ក៏មាន​ការតាំង​ពិ​ព័ណ៌​ប្រមាណ ១៥០ ស្តង់ និង​ស​ង្ឈឹ​ម​ថា​នឹងមាន​អ្នកចូលរួម​ប្រមាណ ២០, ០០០ នាក់​មកពី​ស្ថាប័ន​រាជរដ្ឋាភិបាល ប្រតិបត្តិ​ករ​ទូរគមនាគមន៍ ក្រុមហ៊ុន​ផ្តល់​សេវាកម្ម​បច្ចេកវិទ្យា​គមនាគមន៍​និង​ព័ត៌មាន ក្រុមហ៊ុន​អភិវឌ្ឍ​បច្ចេកវិទ្យា ធនាគារ មីក្រូហិរញ្ញវត្ថុ ក្រុមហ៊ុន​ចាប់ផ្តើម​ធុរកិច្ច​ថ្មី (startup) អង្គការក្រៅរដ្ឋាភិបាល គ្រឹះស្ថាន​អប់រំ និង​ដៃគូ​អភិវឌ្ឍន៍​៕