លោក គង់ បូរ៉ា អតីតតំណាងរាស្រ្តមណ្ឌលខេត្តព្រៃវែង របស់អតីតគណបក្សសង្រ្គោះជាតិ ត្រូវបានព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា ចេញព្រះរាជក្រឹត្យតែងតាំងជាអនុរដ្ឋលេខាធិការនៃក្រសួងមហាផ្ទៃ។
ព្រះរាជក្រឹត្យនេះបានចេញកាលពីថ្ងៃទី២៦ ខែតុលា ឆ្នាំ២០១៩ បន្ទាប់ពីមានសំណើរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។
លោក គង់ បូរ៉ា ស្ថិតក្នុងចំណោមអតីតមន្ត្រីជាន់ខ្ពស់១១៨នាក់របស់សង្គ្រោះជាតិ ដែលត្រូវបានហាមឃាត់សិទ្ធិនយោបាយរយៈពេល៥ឆ្នាំ រួមជាមួយនឹងការប្រកាសរំលាយ CNRP ដោយតុលាការកំពូល។ ក្រោយមកលោកបានសម្រេចចិត្តតាមលោក គង់ គាំ ដែលជាឪពុកក្នុងការស្នើសុំសិទ្ធិនយោបាយឡើងវិញ ខណៈ លោក គង់ សភា ដែលជាបងប្រុសរក្សាជំហរជាមួយលោក សម រង្ស៊ី និង CNRP ដដែល។ ក្រោយមកទៀត លោក គង់ បូរ៉ា បានចូលរួមជីវភាពនយោបាយជាមួយ គណបក្សប្រជាជនកម្ពុជា CPP។
ពិធីប្រកាសទទួលស្គាល់ជាផ្លូវការ លោក គង់ បូរ៉ា ចូលរួមជាមួយ គណបក្សប្រជាជនកម្ពុជា CPP បានធ្វើឡើងកាលពីរសៀល ថ្ងៃទី១០ ខែតុលា ឆ្នាំ២០១៩ នៅទីស្នាក់ការគណបក្សប្រជាជនកម្ពុជា CPP រាជធានីភ្នំពេញ ក្រោមអធិបតីភាព លោក សក់ សេដ្ឋា សមាជិកគណៈកម្មាធិការកណ្តាល និងជាប្រធាន គណបក្សប្រជាជនកម្ពុជា CPP គ២៧៕
