“​កម្ពុជា​ចុះហត្ថលេខា​ ​ជាសម្ងាត់​ជាមួយ​ចិន ប្រើប្រាស់​មូលដ្ឋាន​យោធា​” គឺជា​ព័ត៌មាន​ប្រឌិត ប្រឆាំង​កម្ពុជា​

507

ភ្នំពេញ​៖ សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បានចាត់ទុក​ការចេញផ្សាយ របស់​សារព័ត៌មាន​បរទេស ដែលថា “​កម្ពុជា បាន​ចុះហត្ថលេខា​លើក​កិច្ចព្រមព្រៀង ជាសម្ងាត់​ជាមួយ​ប្រទេស​ចិន ដើម្បី​ឲ្យ​ប្រទេស​ចិន ប្រើប្រាស់​មូលដ្ឋាន​យោធា​ទ័ពជើងទឹក​កម្ពុជា​” គឺជា​ព័ត៌មាន​ប្រឌិត ដ៏​អាក្រក់​បំផុត​ប្រឆាំង​ជាមួយ​កម្ពុជា​។​

សម្ដេច​តេ​ជោ ហ៊ុន សែន

​ការឆ្លើយតប​របស់​ស​ម្ដេច​តេ​ជោ ហ៊ុន សែន ចំពោះ​ការចេញផ្សាយ​របស់​សារព័ត៌មាន​បរទេស​នេះ​បានធ្វើ​ឡើង​កាលពី​ព្រឹក​ថ្ងៃទី​២២ ខែកក្កដា ឆ្នាំ​២០១៩ នេះ តាមរយៈ​សារព័ត៌មាន​ក្នុងស្រុក Fresh News ដែល​ស្និ​ទ្ធិ​នឹង​រដ្ឋាភិបាល ក្រោយពី​សារព័ត៌មាន​ប​រទេស​នេះ​បាន​ចុះផ្សាយ​ថា “​ប្រទេស​ចិន បាន​ចុះហត្ថលេខា​លើ​កិច្ចព្រមព្រៀង​ជាសម្ងាត់​មួយ ដើម្បី​អនុញ្ញាត​ឲ្យ​កងទ័ព​របស់ខ្លួន ប្រើប្រាស់​មូលដ្ឋាន​ទ័ពជើងទឹក​កម្ពុជា​។ កិច្ចព្រមព្រៀង​នោះ​គឺ កម្ពុជា​ផ្តល់​ឲ្យ​ភាគី​ចិន​នូវ​សិទ្ធិផ្តាច់មុខ ធ្វើជា​មូលដ្ឋាន​ទាហានជើងទឹក​ចិន នៅ​ឈូង​សមុទ្រ​ខ្មែរ នៅ​ជិត​ព្រលានយន្តហោះ​ធំ​មួយ ដែល​កំពុង​កសាង​ដោយ​ចិន នឹង​អនុញ្ញាត​ឲ្យ​ចិន ប្រើ​ជា​មូលដ្ឋាន​យោធា​នោះ រយៈពេល​៣០​ឆ្នាំ ដោយ​ដាក់​កងទ័ព ដាក់​គ្រឿង​សព្វាវុធ និង​កន្លែង​ចត​ជាដើម​”​។​

សម្ដេច​តេ​ជោ ហ៊ុន សែន

សម្ដេច​តេ​ជោ ហ៊ុន សែន ត្រូវបាន Fresh News ដកស្រង់​សម្ដី​ថា​៖”​នេះ​ជា​ព័ត៌មាន​ប្រឌិត​ដ៏​អាក្រក់​បំផុត ប្រឆាំង​ជាមួយ​កម្ពុជា​។ គ្មាន​រឿង​បែបនេះ​កើតឡើង​នោះទេ ព្រោះ​មូលដ្ឋាន​យោធា​បរទេស វា​បាន​ប្រឆាំងនឹង​រដ្ឋធម្មនុញ្ញ​រប​ស់​កម្ពុជា​”​។​

​សម្ដេច​តេ​ជោ ហ៊ុន សែន បានបញ្ជាក់​ប្រាប់ថា​៖ “​តើ​កម្ពុជា​ត្រូវការ​វត្តមាន​យោធា​ចិន​លើ​ទឹកដី​របស់ខ្លួន​ដើម្បី​អ្វី​? យើង​មិនដែល​បាន​ពិភាក្សា​ណាមួយ ជាមួយ​មេដឹកនាំ​ចិន​នោះឡើយ​កុំថាឡើយ​ដល់​មាន​ចុះហត្ថលេខា​លើ​កិច្ចព្រមព្រៀង​។ ល្មម​ឈប់​ប្រើ​ព័ត៌មាន​ក្លែងបន្លំ​អំពី​វត្តមាន​កងទ័ព​ចិន​លើ​ទឹកដី​កម្ពុជា ដើម្បី​ប្រឆាំង​និង​យើង​ហើយ​”​។​

​សម្តេច​ពិជ័យ​សេនា ទៀ បាញ់

​កន្លងមក សម្ដេច​តេ​ជោ ហ៊ុន សែន និង​ថ្នាក់ដឹកនាំ​ធំៗ​របស់​ប្រទេស​កម្ពុជា រួមមាន​សម្តេច​ពិជ័យ​សេនា ទៀ បាញ់ ធ្លាប់បាន​បកស្រាយ បដិសេធ​ជាច្រើនលើក​ច្រើនសារ​មក​ហើយ​ថា កម្ពុជា​ជា​រដ្ឋ​ឯករាជ្យ អធិបតេយ្យ ហើយ​រដ្ឋធម្មនុញ្ញ​រប​ស់​កម្ពុជា បានចែង​ច្បាស់​ថា មិន​អនុញ្ញាត​ឲ្យ​មាន​មូលដ្ឋាន​យោធា​បរទេស នៅលើ​ទឹកដី​ខ្លួន​ឡើយ​។​

​ដោយសារតែ​ការភ័យខ្លាច​ពី​ឥទ្ធិពល​របស់​ចិន​កាន់តែខ្លាំង នៅ​ទ្វីបអាស៊ី រួមជាមួយ ជម្លោះ​នៅ​សមុទ្រ​ចិន​ខាងត្បូង បានធ្វើ​ឲ្យ​អាមេរិក តែងតែ​ចិញ្ចឹមចិត្ត​របស់ខ្លួន ដោយ​មិន​ស្ដាប់​ការបកស្រាយ​របស់​កម្ពុ​ជា​ចំពោះ​រឿងនេះ​ទេ បើទោះបីជា​ប្រទេស​កម្ពុជា បើកចំហរ​ឲ្យ​ចុះមក​ត្រួតពិនិត្យ​ឲ្យ​បានច្បាស់លាស់​ដោយ​ខ្លួនឯង​ក៏ដោយ​។​

​ការចោទប្រកាន់​មក​លើក​កម្ពុជា គឺមាន​មូលហេតុ​មួយ​យ៉ាងពិត​ប្រាកដ ដែល​អាមេរិក​ចង់បាន ដូចដែល​ការចោទប្រកាន់​ចំពោះ ប្រទេស​អ៊ីរ៉ាក់ ក្រោមលេស​ថា​លោក សា​ដាម ហ៊ូ​សេន បាន​ឬ​កំពុង​ព្យាយាម​បង្កើត​អាវុធ​បំផ្លិចបំផ្លាញ​លោក​ដ៏​ធំ (​អាវុធ​នុយក្លេអ៊ែរ ដែល​ភាគច្រើន​គេ​ស្គាល់​) ហើយ​ចោទថា​រដ្ឋាភិបាល​អ៊ីរ៉ាក់ មាន​ទំនាក់​ទំនងជា​មួយក្រុម​ភេរវកម្ម​ជាច្រើន រួមទាំង​ក្រុម​អាល់​កៃ​ដា ផងដែរ ក្នុង​គោលបំណង​គឹ​ឈ្លានពាន គ្រប់គ្រង​ប្រទេស​នេះ​ដោយ​ដាក់​មេដឹកនាំ ដែល​ផ្ដល់​ប្រយោជន៍ ស្ដាប់​តាម​ការបញ្ជា​របស់​ប្រទេស​អាមេរិក​៕​