ឧកញ៉ា គិត ធាង ត្រូវ​ឃុំខ្លួន​ដាក់ពន្ធនាគារ PJ ព្រោះ​រឿង​គ្រឿងញៀន​

3408

ភ្នំពេញ​៖ ឧកញ៉ា គិត ធាង ត្រូវបាន​សមត្ថកិច្ច នាំយកទៅ​ឃុំខ្លួន​បណ្តោះអាសន្ន​នៅ​ពន្ធនាគារ PJ រង់ចាំ​ជំនុំជម្រះ​ជា​ក្រោយ​តាម​នីតិវិធី​ហើយ ក្រោម​អំណាច​ដីកា​បង្គាប់ របស់​ចៅក្រម​ស៊ើបសួរ នៃ​សាលាដំបូង​រាជធានី​ភ្នំពេញ លោក សេង លាង​។​

​លោក គិត ធាង ដែលមាន​ងា​ជា​ឧកញ៉ា នៅឡើយ ត្រូវបាន​ជាប់ចោទ​ពីបទ “​ចាត់ចែង សម្រួល​ឲ្យ​មានការ​ប្រើប្រាស់​ដោយ​ខុសច្បាប់ នូវ​សារជាតិ​ញៀន និង​បទ​សមគំនិត​” ដែល​ធ្វើឡើង​នៅ​មណ្ឌល​កម្សាន្ត ROCK ស្ថិតនៅតាម​បណ្តោយ​មហាវិថី​ព្រះមុនីវង្ស សង្កាត់​ទន្លេបាសាក់ ខណ្ឌចំការមន រាជធានី​ភ្នំពេញ តាម​មាត្រា​៤២ និង​៤៤ នៃ​ច្បាប់​ស្តីពី​ការ ត្រួតពិនិត្យ​គ្រឿងញៀន និង​មាត្រា​២៩ នៃ​ក្រមព្រហ្មទណ្ឌ បន្ទាប់ពី​ត្រូវបាន​បញ្ចូនទៅ ទៅកាន់​តុលាការ​ក្រុងភ្នំពេញ កាលពី​ព្រឹក​ថ្ងៃទី ១២ ខែមីនា ឆ្នាំ​២០១៩​។​

​គួរ​រំ​ម្លឹ​ក​ផងដែរ​ថា ឧកញ៉ា គិត ធាង ម្ចាស់​ក្លឹប​កម្សាន្ត Rock ត្រូវបាន​សមត្ថកិច្ច នាំខ្លួន​ទៅកាន់​ស្នងការដ្ឋាន​រាជធានី​ភ្នំពេញ កាលពី​ល្ងាច​ថ្ងៃទី​១១ ខែមីនា ឆ្នាំ​២០១៩ ទៅតាម​ដីកា​របស់​តុលាការ បន្ទាប់ពី​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​បញ្ជា​ឱ្យកម្លាំង​សមត្ថកិច្ច​ទាំងអស់ តាម​ស្វែងរក​មេខ្លោង​គ្រឿងញៀន នៅ​ក្លឹប​កម្សាន្ត​រ៉ុ​ក (Rock) ឱ្យឃើញ ហើយ​ត្រូវ​ចាត់វិធានការ​តាមច្បាប់​ឱ្យបាន​ម៉ឺងម៉ាត់ នៅក្នុង​ពិធី​ប្រគល់​សញ្ញាបត្រ​ជូន និស្សិត​សាកលវិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច (RULES) កាលពី​ព្រឹក​ថ្ងៃទី​១១ ខែមីនា​៕