សម្តេច​ក្រឡាហោម ស ខេង នឹង​ចេញ​វិធានការ​ថ្មី​សម្រាប់​អ្នកជិះ​ម៉ូតូ អត់​ពាក់មួក​សុវត្ថិភាព​

540

ភ្នំពេញ​៖ សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បានប្រកាសថា នឹង​ដាក់ចេញ​វិធានការ​ថ្មី សម្រាប់​អ្នកជិះ​ម៉ូតូ អត់​ពាក់មួក​សុវត្ថិភាព​ក្នុងពេល​ឆាប់ៗ​ខាងមុខ​។​

​ការប្រកាស​នេះ​បានធ្វើ​ឡើង​នៅក្នុង​ពេលដែល​សម្តេច​ក្រ​ឡា​ហោម ស ខេង អញ្ជើញ​ជា​អធិបតី​ក្នុង​ពិធីបុណ្យ​បញ្ចុះ​ខណ្ឌសីមា​ព្រះវិហារ និង​ឆ្លង​សមិទ្ធផល​នានា នៅ​វត្ត​បុញ្ញ​ខេ​ត្តា​រាម​(​ហៅ​វត្ត​ថ្មី​) ស្ថិតក្នុង​ភូមិ​លេខ​៨ សង្កាត់​កំពង់លាវ ក្រុង​/​ខេត្តព្រៃវែង នា​ព្រឹក​ថ្ងៃទី​១៣ ខែកក្កដា ឆ្នាំ​២០១៩​នេះ​។​

សម្តេច​ក្រឡាហោម ស ខេង

​មូលហេតុ​ដែល​នាំ​ឲ្យ​មានការ​ដាក់ចេញ​វិធានការ​ថ្មី​នេះ ត្រូវបាន​សម្តេច​ក្រឡាហោម ស ខេង លើកឡើងថា អត្រា​គ្រោះថ្នាក់​ចរាចរ​នៅ​កម្ពុ​ជាមាន មិនមាន​ការ​ថម​ចុះ​នោះឡើយ គឺ​ក្នុង​រយៈពេល​៦​ខែ​ឆ្នាំ​២០១៩​នេះ គ្រោះថ្នាក់​ចរាចរណ៍​បាន​កើន​ជាង ១០០​ករណី បើ​ធៀប​រយៈពេល​ដូចគ្នា​ទៅនឹង​ឆ្នាំ​២០១៨​។ ចំនួន​អ្នកស្លាប់ និង​របួស​ក្នុង​ហេតុការណ៍​គ្រោះថ្នាក់​ចរាចរ​នេះ​នៅតែមាន​ការកើនឡើង​។

​សម្តេច​ក្រឡាហោម ស ខេង បញ្ជាក់ថា គ្រោះថ្នាក់​ចរាចរ​នេះ គឺ​បណ្តាលមកពី​ការមិន​គោរព​ច្បាប់​ចរាចរណ៍​របស់​អ្នកបើកបរ ហើយ​ចំនួន​អ្នកបើកបរ​ម៉ូតូ មិន​ពាក់មួក​សុវត្ថិភាព នៅតែមាន​ចំនួន​ច្រើន​ផងដែរ​។​

​វិធានការ​ថ្មី​ដែល​ដាក់ចេញ​នេះ គឺ​នឹង​ឱ្យ​មន្ត្រីនគរបាល​ចរាចរ​ណ៍​ឃាត់ខ្លួន រាល់​អ្នកបើកបរ​ម៉ូតូ មិន​ពាក់មួក​សុវត្ថិភាព​ទាំង​អៃ់​។ តែ​ការឃាត់ខ្លួន​នេះ មិន​យក​ម៉ូតូ​ទៅណា​នោះទេ គឺ​ទុកឱ្យ​ម្ចាស់​ម៉ូតូ​មើលថែ​ខ្លួនឯង ហើយ​ត្រូវ​ទាក់ទង​ទៅ​សាច់ញាតិ ឬ​តាម​វិធី​ណាក៏ដោយ រក​មួកសុវត្ថិភាព​ម​កពាក់​ឱ្យបាន​សិន ទើប​អនុញ្ញាតឱ្យ​ធ្វើដំណើរ​ទៅមុខ​បន្ត​៕