ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានអះអាងថា អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា មិនជាប់ពាក់ព័ន្ធនឹងបទល្មើសគ្រឿងញៀន ដែលកម្លាំងនគរបាលរាជធានីភ្នំពេញ បង្ក្រាបបានជិត៥០គីឡូក្រាម នៅមជ្ឈមណ្ឌលកម្សាន្ដ រ៉ុក នោះទេ។ ការអះអាងនេះ ត្រូវបានបង្ហោះនៅថ្ងៃទី២៧ ខែកុម្ភៈ ឆ្នាំ២០១៩នេះ នៅក្នុងទំព័រហ្វេសប៊ុកផ្លូវការរបស់សម្ដេចក្រឡាហោម។
សម្ដេចក្រឡាហោម ស ខេង បានសរសេរ «បន្ទាប់ពីការបង្ក្រាបដោយជោគជ័យរបស់កងកម្លាំងនគរបាល លើករណីនេះ ក៏បានកើតមានពាក្យចចាមអារាមថា ករណីបទល្មើសគ្រឿងញៀននេះ មានការពាក់ព័ន្ធនឹងបុគ្គលផ្សេងៗ ដែលខ្ញុំសូមយកឱកាសនេះ ជម្រាបជូនសាធារណជន និងប្រជាពលរដ្ឋទាំងអស់ជ្រាបថា តាមរយៈការស៊ើបអង្កេត យ៉ាងយកចិត្តទុកដាក់ មកដល់ពេលនេះសមត្ថកិច្ចរកពុំឃើញភស្តុតាងណាមួយបញ្ជាក់ថា មានការពាក់ព័ន្ធនឹងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជានោះទេ»។
ជាមួយគ្នានេះ សម្ដេចក៏បានកោតសរសើរ ចំពោះកិច្ចខិតខំប្រឹងប្រឹង ក្នុងស្មារតីទទួលខុសត្រូវខ្ពស់ របស់ស្នងការដ្ឋាននគរបាលរាជធានីភ្នំពេញ ដែលបានធ្វើប្រតិបត្តិការបង្ក្រាបបទល្មើសគ្រឿងញៀន នៅមជ្ឈមណ្ឌលកម្សាន្ត រ៉ុក កាលពីថ្ងៃទី២៣ ខែកុម្ភៈ ឆ្នាំ២០១៩កន្លងទៅនេះ ដោយរឹបអូសបានវត្ថុតាងថ្នាំញៀនចំនួន ៥០គីឡូក្រាម និងបានឃាត់ខ្លួនជនសង្ស័យប្រមាណជា ៣០០នាក់។
សម្ដេច ស ខេង បានសរសេរយ៉ាងដូច្នេះថា៖ “ខ្ញុំសូមកោតសរសើរដោយស្មោះចំពោះកិច្ចខិតខំប្រឹងប្រឹង ក្នុងស្មារតីទទួលខុសត្រូវខ្ពស់ របស់ស្នងការដ្ឋាននគរបាលរាជធានីភ្នំពេញ ដែលបានធ្វើប្រតិបត្តិការ បង្ក្រាបបទល្មើសគ្រឿងញៀន នៅមជ្ឈមណ្ឌលកម្សាន្តរ៉ុក កាលពីថ្ងៃទី២៣ ខែកុម្ភៈ ឆ្នាំ២០១៩កន្លងទៅនេះ ដោយរឹបអូសបានវត្ថុតាងថ្នាំញៀនជាច្រើនគីឡូក្រាម និងបានឃាត់ខ្លួនជនសង្ស័យមួយចំនួនផងដែរ”។
សូមជម្រាបថា ក្នុងប្រតិបត្តិការបង្ក្រាបគ្រឿងញៀនខាងលើនេះ កម្លាំងនគរបាលរាជធានីភ្នំពេញ ដែលដឹកនាំដោយលោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ស្ថិតក្រោមការសម្របសម្រួលពីតំណាងអយ្យការ បានឃាត់ខ្លួនជនសង្ស័យជាង៣០០នាក់ ហើយគិតរហូតមកដល់ថ្ងៃទី២៧ ខែកុម្ភៈ ឆ្នាំ២០១៩នេះ មនុស្សស្ទើរទាំងអស់ត្រូវបានអនុញ្ញាតឲ្យត្រឡប់ទៅវិញ។
ចំពោះអ្នកមិនមានសារធាតុញៀន ក្រោមការធានាពីឪពុកម្ដាយ ឬអាណាព្យាបាល ហើយអ្នកដែលមានសារធាតុញៀន ត្រូវបញ្ជូនមណ្ឌលកែប្រែ ខណៈដែលជនពាក់ព័ន្ធមួយចំនួនទៀត ស្ថិតក្រោមការឃាត់ខ្លួន និងសួរនាំនៅឡើយ ពាក់ព័ន្ធទៅនឹងសកម្មភាពជួញដូរគ្រឿងញៀននេះ៕
