ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានបង្ហើបឲ្យដឹងថា នឹងមានគម្រោងសាងសង់ស្ពានឆ្លងទន្លេមេគង្គមួយទៀត នៅខេត្តក្រចេះ ដែលមានប្រវែងសរុប ១.៧៦១ ម៉ែត្រ ក្រោមកម្ចីសម្បទានពីរដ្ឋាភិបាលចិន។
លោករដ្ឋមន្ត្រី ស៊ុន ចាន់ថុល បានបង្ហើបប្រាប់ព័ត៌មាននេះ នៅក្នុងឱកាសដែលលោកអញ្ជើញចុះពិនិត្យ ទីតាំងសាងសង់ស្ពានឆ្លងទន្លេមេគង្គនៅខេត្តក្រចេះ កាលពីថ្ងៃទី២៣ ខែកក្កដា កន្លងទៅនេះ។
លោករដ្ឋមន្ត្រី ស៊ុន ចាន់ថុល បញ្ជាក់ថាទៀតថា លោកនឹងរៀបចំគម្រោងសំណើនៅឆ្នាំ២០២០ ហើយការសាងសង់ អាចនឹងធ្វើឡើងនៅឆ្នាំ២០២១ ។
បើតាមការឲ្យដឹងបន្ថែមពី លោករដ្ឋមន្ត្រី ស៊ុន ចាន់ថុល ស្ពាននេះ នឹងផ្តល់ភាពងាយស្រួលទៅដល់ប្រជាពលរដ្ឋ ក្នុងការធ្វើដំណើរពីខេត្តស្ទឹងត្រែង ទៅកាន់ខេត្តកំពង់ធំ ដែលស្ពាននេះ នឹងផ្តល់នូវផលចំណេញទាំងពេលវេលា និងថវិកា ច្រើនជាងមុន ។
ចំណែកការស្នើហិរញ្ញប្បទានពីប្រទេសចិន លោករដ្ឋមន្ត្រី ស៊ុន ចាន់ថុល បានប្រាប់ថា កុំរិះគន់មកលើរាជរដ្ឋាភិបាលកម្ពុជា ព្រោះជាកម្ចី គឺដើម្បីចំណេញជាតិ ចំណេញប្រជាពលរដ្ឋ ហើយ ខ្ចីមកដើម្បីសាងសង់ហេដ្ឋារចនាសម្ព័ន្ធ។
ម្យ៉ាងវិញទៀត បំណុលនៃការកម្ចីរបស់ចិននេះ មិនមែនជាអន្ទាក់នោះទេ ព្រោះថា ចិនមិនបានហៅកម្ពុជាឱ្យខ្ចីលុយនោះទេ តែកម្ពុជាជាអ្នកស្នើសុំ ដើម្បីជំរុញការអភិវឌ្ឍសេដ្ឋកិច្ចជាតិ ៕
