សម្ដេច​ ​ហ៊ុន​ ​សែន​៖ ​ផ្លូវ​ខូច​ដោយសារ ប្រធាន​ស្ថានីយ​ជញ្ជីង ថ្លឹង​រថយន្ត ទទួល​សំណូក​

295

​សម្ដេច​តេ​ជោ ​ហ៊ុន សែន នាយករដ្ឋមន្ត្រី​កម្ពុជា បាន​បង្ហើប​ឲ្យ​ដឹងថា បន្ថែម​ពីលើ​ការខូចខាត ដោយ​គ្រោះធម្មជាតិ ផ្លូវ​មួយចំនួន​រង​ការខូចខាត ដោយសារ​ប្រធាន​ស្ថានីយ​ជញ្ជីងថ្លឹង​ រថយន្ត​ទទួល​សំណូក ហើយ​អនុញ្ញាត​ឲ្យ រថយន្ត​ដឹក​លើស​ទម្ងន់ បន្តដំណើរ​ទៅមុខទៀត ដោយ​មិនបាន​ឃាត់ទុក​ដោះស្រាយ ទៅតាម​នីតិវិធី​នៃច្បាប់​។​

​ សម្ដេច​តេ​ជោ ​ហ៊ុន សែន បានបង្ហើបបែបនេះ នៅក្នុង​ពិធី​សម្ពោធ ដាក់ឱ្យ​ដំណើរការ រោងចក្រ​ផលិត​ស៊ីម៉ង់​តិ៍ របស់ ក្រុមហ៊ុន ថៃ ប៊ុន​រ៉ុង ដែលមាន​ទីតាំង ស្ថិតនៅ​ស្រុក​ដងទង់ ខេត្តកំពត​ កាលពី​ព្រឹក​ថ្ងៃទី​១៤ ​ខែវិច្ឆិកា ​ឆ្នាំ​២០១៩។

សម្ដេច​តេ​ជោ ហ៊ុន សែន​ បាន​បញ្ជាក់ថា៖ “​យើង​ពង្រឹងគុណភាព​(​ផ្លូវ​)​ឡើង​បន្តិច ​ប៉ុន្តែ​វា​មិន​ស្រប​ជាមួយ​ទម្ងន់ ដែលជា​ស្ដង់ដារ នៃ​ប្រទេស​នានា ដែលគេ​បាន​ផលិត​រថយន្ត សម្រាប់​ប្រើប្រាស់​នោះទេ (រថយន្តកែច្នៃ ដើម្បីឲ្យដឹកបានច្រើន)។ អីចឹង​យើង​ត្រូវដាក់​ជញ្ជីង​ថ្លឹង​ ហើយ​ជញ្ជីង​មាន​ណា គិតតែ​ពី​ថ្លឹង​ទៅ ​ត្រង់​ថ្លឹង​ប៉ុន្មាន​ អី​ប៉ុន្មាន​អត់​ដឹង​! ជួនកាល​ សូកលុយ​បន្តិច​ ទៅ​ប្រុ​ច​បាត់​”។​

​ជាមួយគ្នានេះដែរ ដោយសារផ្លូវ​មួយចំនួន ចាក់​កៅស៊ូ​មិនមាន​គុណភាព ជាប់​បានយូរ​នោះ សម្ដេច​តេ​ជោ ហ៊ុន សែន ​បានលើកឡើង​ថា នៅ​ថ្ងៃ​ខាងមុខ ​ការស្ថាបនាផ្លូវ​ នឹងត្រូវ​ប្រើប្រាស់ ស៊ីម៉ង់​តិ៍ ចាក់​បេតុង​ជំនួស​ឲ្យកៅស៊ូវិញ ព្រោះ​ កម្ពុ​ជា មាន​ថ្មភ្នំ​ច្រើន តែ​ថ្ម​ដែល​អាច​យកទៅ​ធ្វើជា​ ស៊ីម៉ង់​តិ៍ បាន​មានតែ​ក្នុង​ខេត្ត​៣ តែប៉ុណ្ណោះ គឺ​ ខេត្តកំពត បាត់ដំបង និង​បន្ទាយមានជ័យ ។​

​សម្ដេច​តេ​ជោ ហ៊ុន សែន បានថ្លែង​ឲ្យ​ដឹង​បន្តទៀតថា ទោះបីជា​ការចាក់​បេតុង ចំណាយ​ថវិកាអស់​ច្រើនជាង​ការចាក់​កៅស៊ូក៏ដោយ តែវាមាន​គុណភាព ​ជាប់បាន​យូរ ហើយ​ការចាក់​កៅស៊ូ ធ្វើ​មុខខូច​ក្រោយ ​ធ្វើ​ក្រោយខូច​មុខ​ បង្ក​ការរំខាន​ដល់​ការធ្វើដំណើរ របស់​ប្រជាពលរដ្ឋ​ និង​ខាតបង់​ថវិកា ច្រើន​ផងដែរ។ ជាក់ស្ដែង​ផ្លូវ​ក្នុង​ក្រុងព្រះសីហនុ នឹងត្រូវ​ចាក់​បេតុង ជាមុន​ ទើប​ក្រាលកៅស៊ូ​ ពីលើ​ដើម្បី​អាច​ទ្រ​ទម្ងន់ កុងតឺន័រ ​យ៉ាងច្រើន​ដែល​ចរាចរក្នុង​មួយថ្ងៃៗ សម្រាប់​ការនាំចេញ​ និង​នាំចូល​៕​