លោក ប្រា​យុទ្ធ ចាន់​អូ​ចា ប្រកាសបញ្ចប់ “​របប​យោធា​” ជា​ផ្លូវការ​

619

Channel News Asia ៖ ក្រោយ​រដ្ឋប្រហារ នៅក្នុង​ឆ្នាំ ២០១៤ ប្រទេស​ថៃ គឺ​ស្ថិតនៅក្នុង​របប​យោធា ដែលមាន​លោក ប្រា​យុទ្ធ ចាន់​អូ​ចា ឡើង​ធ្វើជា​នាយករដ្ឋមន្ត្រី នៃ​ប្រទេស​ថៃ​។ របប​យោធា​នៃ​ប្រទេស​ថៃ ត្រូវបាន​ប្រកាស​បញ្ចប់​ជា​ផ្លូវការ កាលពី​ថ្ងៃ​អង្គារ​ក្នុង​សប្តាហ៍​នេះ ក្រោម​បញ្ជា​ជា​លើកចុងក្រោយ ក្នុងនាម​ជា​ប្រមុខ​រដ្ឋាភិបាលយោធា​ថៃ របស់លោក ប្រា​យុទ្ធ ចាន់​អូ​ចា មុនពេល​រដ្ឋាភិបាល​ស៊ីវិល​របស់លោក នឹងត្រូវ​ស្បថ​ចូលកាន់​តំណែង ក្រោយ​ការបោះឆ្នោត​សកល កាលពី​ខែ​មិនា​កន្លងទៅនេះ​។​

​បទបញ្ជា​ចុងក្រោយ​នោះ រួមមាន​ការដកចេញ​វិញ​នូវ​កំហិត​នានា ដែល​ត្រូវ​បានដាក់​ទៅលើ​ប្រព័ន្ធ​ផ្សព្វផ្សាយ និង​ការសម្រេច​ផ្ទេរ​សំណុំរឿង​រដ្ឋប្បវេណី ពី​តុលាការយោធា ទៅកាន់​តុលាការស៊ីវិល​វិញ​ផងដែរ ប៉ុន្តែ​បញ្ជា​មួយចំនួន​ដែល​បានដាក់​ចេញ​ក្រោម​រដ្ឋាភិបាលយោធា នៅតែ​បន្ត​ដដែល ដូចជា​ការផ្តល់អំណាច​ឲ្យ​ប៉ូលិស និង​កងទ័ព​ធ្វើការ​ឆែកឆេរ កោះហៅ និង​ឃាត់ខ្លួន​ជនសង្ស័យ បាន​រយៈពេល ០៧​ថ្ងៃ ដរាបណា​វា​ស្ថិតក្រោម​ហេតុផល សន្តិសុខ​ជាតិ​។​

​តែ​ទោះជា​យ៉ាងណាក៏ដោយ លោក​ឧបនាយករដ្ឋមន្ត្រី វី​ស្សា​នុ គ្រា​ងាំ (Wissanu Kreangam) បាន​លើកឡើងថា ការរក្សា​ឲ្យ​នៅ​ដដែល នូវ​បទបញ្ជា​មួយចំនួន គឺ​ដោយសារ​ពួកវា​មាន​សារៈសំខាន់ ប៉ុន្តែ​សភា ក៏​អាចធ្វើ​ការកែប្រែ​បទបញ្ជា​ទាំងនោះ​បាន​។​
​លោក ប្រា​យុទ្ធ ចាន់​អូ​ចា ថា រដ្ឋាភិបាល​ស៊ីវិល​របស់លោក នឹង​ឡើង​គ្រប់គ្រង​ប្រទេស​ជា​ផ្លូវការ នៅ​ពាក់កណ្តាល​ខែកក្កដា​ខាងមុខនេះ​៕​