ភ្នំពេញ៖ គណៈប្រតិភូសហភាពអឺរ៉ុប ដឹកនាំដោយ លោកស្រី Paola Pampaloni នាយករងផ្នែកគ្រប់គ្រងប្រចាំតំបន់អាស៊ី និងប៉ាស៊ីហ្វិក បានមកធ្វើទស្សនកិច្ចនៅកម្ពុជារយៈពេល ២ថ្ងៃ ចាប់ពីថ្ងៃទី១៩ ដល់ថ្ងៃទី២០ ខែមីនា ឆ្នាំ២០១៩ ដែលត្រូវបានគេដឹងថា ពាក់ព័ន្ធទៅនឹងដំណើរការ ព្យួរជាបណ្តោះអាសន្ន នូវប្រព័ន្ធអនុគ្រោះពន្ធ ក្រោមកម្មវិធី គ្រប់មុខទំនិញលើកលែងតែសព្វាវុធ (EBA)។
ក្រោយពីជំនួបជាមួយសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ នៅព្រឹកថ្ងៃទី២០ ខែមីនា ឆ្នាំ២០១៩នេះរួចមក លោក ផាត សុផានិត ដែលជាប្រធាននាយកដ្ឋានទំនាក់ទំនងអន្ដរជាតិ និងអ្នកនាំពាក្យរងក្រសួងមហាផ្ទៃ បានប្រាប់ក្រុមអ្នកសារព័ត៌មាន ថា ប្រតិភូសហភាពអឺរ៉ុប មកកាន់ប្រទេសកម្ពុជា មិនមែនសិក្សារឿងដក EBA នោះទេ គឺមកដើម្បីបង្កើនកិច្ចសហប្រតិបត្តិការ។
លោកបានលើកឡើងថា៖ “លោកស្រី (Paola Pampaloni) បានបញ្ជាក់ថា គណៈប្រតិភូ ដែលមកកម្ពុជានៅពេលនេះ គឺមិនមែនមកដក EBA នៅកម្ពុជានោះទេ ប៉ុន្ដែមកធ្វើការជាមួយគ្នា បើកកិច្ចសន្ទនាជាមួយគ្នា ស្វែងរកចំណុចរួម និងដំណោះស្រាយ ដើម្បីបង្កើនកិច្ចសហប្រតិបត្តិការ រវាងកម្ពុជា និងសហភាពអឺរ៉ុប ដើម្បីបម្រើផលប្រយោជន៍រួម របស់ប្រទេសទាំងពីរ”។
បន្ទាប់មកទៀត គណៈប្រតិភូសហភាពអឺរ៉ុប ក៏បានទៅជួបប្រជុំជាមួយ លោកឧបនាយករដ្ឋមន្ដ្រី ប្រាក់ សុខុន រដ្ឋមន្ដ្រីក្រសួងការបរទេស និងសហប្រតិបត្ដិការអន្ដរជាតិ។
បន្ទាប់ពីកិច្ចប្រជុំ លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្ដរជាតិ ថ្លែងប្រាប់ក្រុមអ្នកសារព័ត៌មានថា៖ “កិច្ចពិភាក្សានៅថ្ងៃនេះ គឺជាការបន្ដសន្ទនារឿងនីតិវិធី EBA ហើយភាគីទាំងពីរ សុទ្ធតែបានប្ដេជ្ញាថា នឹងរក្សាស្ថានភាព EBA មិនឲ្យបាត់បង់ទេ”។
គួររំម្លឹកថា នៅមុនពេលគណៈប្រតិភូរបស់សហភាពអឺរ៉ុប មកធ្វើទស្សនកិច្ច លោក សម រង្ស៊ី បានសរសេរលិខិតរំឭក លោកស្រី Federica Mogherini តំណាងជាន់ខ្ពស់ នៃសហភាពអឺរ៉ុបសម្រាប់កិច្ចការបរទេស និងគោលនយោបាយសន្តិសុខ កាលពីថ្ងៃសុក្រ សប្តាហ៍មុន ឲ្យសហភាពអឺរ៉ុបប្រកាន់ខ្ជាប់ឲ្យបានម៉ឺងម៉ាត់ នូវផែនការក្នុងការជួយស្តារប្រជាធិបតេយ្យ នៅក្នុងប្រទេសកម្ពុជា។
ទោះបីជាយ៉ាងណាក៏ដោយ សហភាពអឺរ៉ុប មិនអាចស្ដាប់តែខាង លោក សម រង្ស៊ី នោះទេ គឺប្រទេសកម្ពុជា មានរយៈពេល៦ខែក្នុងការតវ៉ា និងចរចាជាមួយគណៈកម្មការអឺរ៉ុប ដើម្បីរក្សានូវ EBA បន្ទាប់ពី គណៈកម្មការអឺរ៉ុបបានប្រកាសដំណើរនីតិវិធី ព្យួរជាបណ្តោះអាសន្ននូវប្រព័ន្ធអនុគ្រោះពន្ធ ក្រោមកម្មវិធី «គ្រប់មុខទំនិញលើកលែងតែសព្វាវុធ (EBA)» ចាប់ពីថ្ងៃទី១២ ខែកុម្ភៈ ឆ្នាំ២០១៩ កន្លងទៅនេះ។
ការសម្រេចព្យួរ EBA ពីកម្ពុជា ត្រូវការរយៈ ១៨ខែ គិតចាប់ពីថ្ងៃទី១២ ខែកុម្ភៈ ឆ្នាំ២០១៩ ទើបអាចចូលជាធរមាន ប្រសិនបើគណៈកម្មការអឺរ៉ុប មិនទទួលការបកស្រាយរបស់កម្ពុជានោះ៕
