អាមេរិក រកឃើញ មានការ​ផ្ទេរ​កប៉ាល់​ទំនិញ​ចិន នៅ​កម្ពុជា ដើម្បី​គេចពន្ធ​នាំចូល​អាមេរិក​

585

Reuters៖ អ្នកនាំពាក្យ​ស្ថានទូត​អា​មេ​រិក​ប្រចាំ​កម្ពុជា លោក Arend Zwartjes បាន​ប្រាប់​ទៅ​សារព័ត៌មាន Reuters ថា សហរដ្ឋអាមេរិក​បាន​ផាកពិន័យ ក្រុមហ៊ុន​ចិន​មួយចំនួន ដែលមាន​មូលដ្ឋាន​នៅក្នុង ​តំបន់​សេដ្ឋកិច្ច​ពិសេស​ ក្រុងព្រះសីហនុ (SSEZ) ចំពោះ​ការនាំចេញ​ទំនិញ​ចូល​សហរដ្ឋអាមេរិក ដើម្បី​បាន​រួច​ពន្ធ ដោយសារតែ​សង្គ្រាម​ពាណិជ្ជកម្ម អាមេរិក​និង​ចិន​។​

​លោក Arend Zwartjes បាន​អះអាងថា​៖ ក្រសួង​សន្តិសុខ​អាមេរិក (Department of Homeland Security) បាន​ត្រួតពិនិត្យ និង​ពិន័យ​ក្រុមហ៊ុន​មួយចំនួន សម្រាប់​ការ​គេចវេស​ពន្ធ នាំ​ចេញទៅ សហរដ្ឋអាមេរិក ដោយ​ធ្វើការ​ផ្ទេរ​កប៉ាល់​ដឹកទំនិញ​របស់​ចិន នៅ​ប្រទេស​កម្ពុជា​”​។​

​លោក Arend Zwartjes បាន​បន្តថា​៖ “​ក្រុមហ៊ុន​ទាំងនេះ ស្ថិតនៅក្នុង​តំបន់​សេដ្ឋកិច្ច​ពិសេស​ខេត្ត​ព្រះសីហនុ​” តែ​លោក មិនបាន​បញ្ជាក់ថា តើ​មាន​ក្រុមហ៊ុន​ចំនួន​ប៉ុន្មាន ដែល​ត្រូវ​រង​ការពិន័យ​ចំពោះ​ការ​គេចពន្ធ​គយ​នេះ ក៏​ដូ​ជា​តើ​ត្រូវបាន​ពិន័យ​ជា​ប្រាក់​ច្រើន​ប៉ុណ្ណា និង​ទំនិញ​អ្វីខ្លះ​ដែល​ក្រុមហ៊ុន​ទាំងនោះ បាន​នាំចេញ​នោះទេ​។​

​គួរ​រំ​ម្លឹ​ក​ផងដែរ​ថា កាលពី​ដើមខែ​នេះ នាយកដ្ឋាន​គយ របស់​ប្រទេស​វៀតណាម បាន​និយាយថា ប្រទេស​វៀតណាម ក៏បាន​រកឃើញ​មាន​ករណី​នាំ​ទំនិញ​ចេញ​ខុសច្បាប់​ជាច្រើន ដោយ​ទំនិញ​ទាំងនោះ​ផលិត​នៅ​ប្រទេស​ចិន តែ​ដាក់​ស្លា​កថា “​ផលិត​នៅ​វៀតណាម​” ដើម្បី​គេច​ពី​ពន្ធគយ​នាំ​ចេញទៅ​អាមេរិក ដោយសារ​សង្គ្រាម​ពាណិជ្ជកម្ម​រវាង អាមេរិក​និង​ចិន​៕​