ផ្សារ​ទំនើប​អ៊ី​អន ៣ នឹង​បើក​ដំណើរការ​នៅ​ឆ្នាំ​២០២៣ ក្នុង​ទំហំ ១៨ ហិកតា​

1210

ភ្នំពេញ​៖ តាម​សេចក្ដីប្រកាស​ព័ត៌មាន របស់​ក្រុមហ៊ុន ផ្សារ​ទំនើប អ៊ី​អន បាន​ឲ្យ​ដឹងថា ផ្សារ​ទំនើប​អ៊ី​អន ៣ គ្រោង​នឹង​បញ្ចប់ និង​ដំណើរការ​នៅ​ឆ្នាំ ២០២៣ ខាងមុខនេះ ក្នុង​ទំហំ​ផ្ទៃដី ១៨ ហិកតា ធំ​ជាង ផ្សារ​ទំនើប​អ៊ី​អន ១ និង​ផ្សារ​ទំនើប​អ៊ី​អន ២​។

ក្រុមហ៊ុន ផ្សារ​ទំនើប អ៊ី​អន បន្ត​ឲ្យ​ដឹង​ទៀតថា គម្រោង​ផ្សារ​ទំនើប​អ៊ី​អន ៣ មាន​ទីតាំង​ស្ថិតនៅក្នុង​តំបន់​ទីក្រុង​រណប ING ភាគខាងត្បូង នៃ​រាជធានី​ភ្នំពេញ​។

ផ្សារ​ទំនើប​អ៊ី​អន ១

​ផ្សារ​ទំនើប​អ៊ី​អន ៣ នេះ មាន​ទំហំ​ធំ​ជាង​ផ្សារ​ទំនើប​អ៊ី​អន ១ និង​ផ្សារ​ទំនើប​អ៊ី​អន ២ ហើយក៏​អាច​ចាត់ទុកបាន​ថា ជា​ផ្សារ​ទំនើប​ធំជាងគេ​មួយ​នៅ​កម្ពុជា​ផងដែរ ដោយមាន​ផ្ទៃដី​សាងសង់​សរុប​រហូតដល់ ១៨ ហិកតា ខណៈ​ផ្សារ​ទំនើប​អ៊ី​អន ១ បាន​សាងសង់​លើ​ផ្ទៃដី ត្រឹមតែ ៧ ហិកតា និង​ផ្សារ​ទំនើប​អ៊ី​អន ២ មាន​ផ្ទៃដី​ត្រឹមតែ ១០​ហិកតា នោះ​។​

​ក្រុមហ៊ុន ផ្សារ​ទំនើប​អ៊ី​អន បាន​គូសបញ្ជាក់ថា ការសាងសង់​ផ្សារ​ទំនើប​អ៊ី​អន ៣ របស់ខ្លួន​នៅ​ទីតាំង​តំបន់​អភិវឌ្ឍន៍​ទីក្រុង​រណប ING នេះ គឺ​ដោយសារតែ​មើលឃើញ​ពី​សក្ដានុពល​អភិវឌ្ឍន៍​ខ្លាំង នៅ​តំបន់​ភាគខាងត្បូង​រាជធានី​ភ្នំពេញ ដែល​បច្ចុប្បន្ន​កំពុងមាន​សន្ទុះ​កើនឡើង​យ៉ាងខ្លាំង​។​

​ផ្សារ​ទំនើប​អ៊ី​អន ២

​គួរ​ជម្រាប​ថា គម្រោង​អភិវឌ្ឍន៍ ទីក្រុង​រណប ING Holding ត្រូវ​បានទទួល​សិទ្ធិ​អភិវឌ្ឍន៍​ពី​រាជរដ្ឋាភិបាល​កម្ពុជា លើ​ផ្ទៃដី​សរុប​ជាង ២.៥០០ ហិកតា ស្ថិតនៅ​ភាគខាងត្បូង រាជធានី​ភ្នំពេញ​។​ក្នុងពេល​បច្ចុប្បន្ន តំបន់​នេះ បាន​នឹង​កំពុងមាន​ការអភិវឌ្ឍ​ន៍​គួរ​ឲ្យ​កត់សម្គាល់​៕ ​