កម្ពុជា អាច​នាំចេញ “​អង្ករ​ពាក់កណ្តាល​សម្រេច​” ទៅ​ទីផ្សារ​អឺរ៉ុប ដោយ​មិន​ជាប់ពន្ធ​

8405

ភ្នំពេញ​៖ បន្ទាប់ពី​សហភាព​អឺរ៉ុប (EU) បានសម្រេច​យកពន្ធ​លើ​អង្ករ នាំចូល​ពី​ប្រទេស​កម្ពុជា អ្នកជំនាញ​ក្នុង​ឧស្សាហកម្ម​ស្រូវ​-​អង្ករ ១ រូប បាន​ប្រាប់​ទៅ​កាសែត​ភ្នំពេញ​ប៉ុស្តិ៍​ថា កម្ពុជា​នៅតែ​អាច​បន្ត​ការនាំចេញ​អង្ករ ទៅ​ទីផ្សារ​អឺរ៉ុប​ដោយ​រួច​ពន្ធ តាមរយៈ​ការលក់​អង្ករ​ពាក់កណ្តាល​សម្រេច ទៅ​ឲ្យ​ក្រុមហ៊ុន​រោង​ម៉ាស៊ីន​នៅ​អឺរ៉ុប​ជំនួស​វិញ​។​

​អ្នកជំនាញ​ក្នុង​ឧស្សាហកម្ម​ស្រូវ​-​អង្ករ​រូបនោះ គឺ​លោក សុង សារ៉ន ស្ថាបនិក និង​ជា​ប្រធាន​ក្រុមហ៊ុននាំចេញ​អង្ករ អេ​ម​រូ រ៉ា​យស៍​។ លោក​បាន​លើកឡើងថា វិធាន​របស់​សហភាព​អឺរ៉ុប ទាក់ទង​នឹង​ការដាក់​ពន្ធ​អង្ករ​របស់​កម្ពុជា និង​មី​យ៉ាន់​ម៉ា គឺ​នៅតែ​ទុក​អត្រាពន្ធ​សូន្យ​ដដែល ប្រសិនបើ​កម្ពុជា​លក់​អង្ករ​ពាក់កណ្តាល​សម្រេច ទៅ​ឲ្យ​ក្រុមហ៊ុន​រោង​ម៉ាស៊ីន ឬ រោងចក្រ​កែច្នៃ​នៅ​អឺរ៉ុប​។ គោលដៅ​របស់​សហភាព​អឺរ៉ុប គឺ​ដើម្បី​ទប់ស្កាត់ ការដួលរលំ​នៃ​ក្រុមហ៊ុន​កែច្នៃ​អង្ករ នៅ​ប្រទេស​ផលិត​ស្រូវ​នៅ​អឺរ៉ុប ដែលមាន​ដូចជា អ៊ីតាលី និង អេ​ស្ប៉ា​ញ​ជាដើម​។​

លោក សុង សារ៉ន ស្ថាបនិក និង​ជា​ប្រធាន​ក្រុមហ៊ុននាំចេញ​អង្ករ អេ​ម​រូ រ៉ា​យស៍

របាយការណ៍​របស់​ក្រសួងពាណិជ្ជកម្ម បាន​ឲ្យ​ដឹងថា កម្ពុជា បាន​នាំចេញ​អង្ករ​សរុប ៦២៦ ២២៥ តោន​កាលពី​ឆ្នាំ ២០១៨ ក្នុងចំណោម​នោះ​នាំទៅ​សហភាព​អឺរ៉ុប​មាន ៤៣% នៃ​ការនាំចេញ​សរុប ដែលមាន​ចំនួន ២៦៩ ១២៧ តោន​។​

​ការសម្រេច​របស់​សហ​ភាព​អឺរ៉ុប (EU) យកពន្ធ​លើ​អង្ក​រស​(​ស្រូវ​អ៊ី​អែរ​) របស់​កម្ពុជា​តែប៉ុណ្ណោះ មិន​ប៉ះពាល់​ដល់​អង្ករ​ក្រអូប​របស់​កម្ពុជា​ឡើយ​។ អង្ករ​ក្រអូប​និង​ក្រអូប​ប្រណិត មានតែ​ប្រទេស​កម្ពុជា​និង​ថៃ​ទេ ដែល​ដាំ​ដុះ​បានល្អ​និង​មាន​បរិមាណ​ច្រើន​។

​អ្នកសេដ្ឋកិច្ច និង​អ្នករក​ស៊ីក្នុង​វិស័យ​ស្រូវ​អង្ករ យល់ថា កម្ពុជា​អាច​ដោះស្រាយ​ចំពោះ​បញ្ហា​នេះ ប្រសិនបើ​រាជរដ្ឋាភិបាល​ជួយ​បន្ថែម​ដល់​វិស័យ​ស្រូវ​អង្ករ ដូចជា ជួយ​បន្ថយថ្លៃ​អគ្គិសនី​ដល់​រោង​ម៉ាស៊ីន​ស្រូវ បន្ថយថ្លៃ​កំពង់ផែ កសាង​ផ្លូវ​រឹងមាំ​នៅតាម​ជនបទ និង​មិន​យកពន្ធ​កាត់​ទុក​ប្រចាំខែ​។ ការកាត់បន្ថយ​ថ្លៃដើម នឹង​ជំរុញ​ឱ្យ​អង្ករ​កម្ពុជា កាន់តែ​មាន​ភាគ​ប្រជែង​ឈ្នះ​នៅលើ​ទីផ្សារ​ផ្សេងៗ ក្រៅពី​អឺរ៉ុប​ផងដែរ​៕